Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

Masakro en el Dezierto  –   Parte I

——————————————————————————————————-

Un sierto tiempo Djudios bivian en el Dezierto Arabo. Se rakonta ke estos yevavan una vida prospera. De muestros diyas, solo las ruinas en las simas de las kolinas son el uniko vestijo de esta prezensia.

El Profeto del Islam, en sus primeros pasos se avia inspirado de la erensya espirituala de estos Djudios. Ma, en segito, los avia aisado.

Kuanto a las sirkontensias del aresentamiento de los Djudios en el Dezierto, egzisten diferentes asunsiones – siertas faktualas, otras spekulativas – sin ke estas las rezolven de una manera konkluziva.

Ma, un fakto es klaro: el Islam kon sus partikukaridades unikas, deve su egzistensia a estos Djudios.

——————————————————————————————————-

Achakes de la konspirasion de los sivdadinos de Meka, Mahome se avia fuyido en el anio 622, de Meka a Yatrib – ke kon el tiempo sera konosido komo Medina.

Las fuentes islamikas remarkan ke los Djudios de Medina observavan la Ley djudia en riguroza akordansia kon el Talmud en los domenos del kazamiento i el divorso, adulterio, las leyes de limpieza, proprietad, orasion, gerra i en otros sujetos. Son deskritos komo observadores del Shabat, i orasionando en la direksion de Yerushalayim.

Despues de aliarse a los trivos arabos de Medina, Mahome, kon el eskopo de konvenserlos a konvertirsen a su relijion, avia kontraktado de mizmo una aliansa kon los Djudios. En este konteksto, estuvo eskuchando sus savios i diskutiendo kon eyos, enrikisiendo de este modo sus konosensyas en sujetos de relijion. Lo ke tuvo una influensia enorma i sentrala sovre las kreyensias, mandamientos i kustumbres ke iva desvelopar en el Islam.

Aspirando a establisir un fondo komun entre la mueva relijion i la relijion djudia, Mahome adopto varias tradisiones del Djudaismo. Entre estas: la orientasion de la orasion verso Yerushalayim, el ayuno ke koresponde al dia de Kipur, la proibision de konsumar karne de sedro i las reglas de degoyo. Mahome se refero en sus sermones a las figuras biblikas komo Noah, Moshe i Korah, kon la esperansa ke de este modo sus argumentos konvenseran sus odiensias de la verasitad de de sus preseptos.

Mahome avia investido grandes esforsos a azer akseptar a los Djudios de Medina ke el era ultimo profeto del Dio, en la linyada de Moshe i el Kristo, i los yamo a adjuntarsen a su relijion. Portanto, los Djudios le disheron ke, asigun el Talmud, la edad de la profesia ya se avia de muncho antes terminado, i en konsekuensia refuzaron de konoserlo entanto ke un verdadero profeto. Esta aktitud ensanyo a Mahome i izo kulminar su aiso kontra los Djudios.

En konsekensia, los Djudios fueron masakrados o ekspulsados i la orientasion de las orasiones del Islam fueron trokadas verso Meka, al lugar de Yerushalayim.

Kronika de los Djudios de Arabia

Asigun una fuente islamika, la yegada de los Djudios a la Peninsula avia afitado ainda en el empesijo del Egzodo de Ayifto. Antes ke los Ebreos entren a la Tierra de Kanaan en el siglo XIV AEK, Moshe avia mandado a la Arabia ekspedisiones de gerreadores para ke maten a todos los Amalekites ke bivian en Medina. Aunke estos vinsieron a Amalek, eparniaron la vida del ijo del rey para ke Moshe deside de su sorte.

Portanto, kuando la ekspedision abolto, Moshe no estava mas en vida. El puevlo de Israel se ensanyo porke las lejiones no avian matado el prens amalekito i djuro ke los soldados ke avian aboltado de Medina, nunka entraran a Kana’an. No teniendo otro remedio, las lejiones aboltaron a Medina i se aresentaron ayi.(*)

Asigun la inskripsion en Harran del Rey de Babel, Nabonidus 556-539 AEK, egzilados de Yuda se establisieron en el Norte de Hidjaz en las oazises de Teyma, Dedan, Fadak, Haybar, Yadi i Yatrib (Medina), i formaron ayi postos babileos. Estas notisias koinsidan kon la informasion prokurada por el Rabino Yohannan en el Talmud Yerushalmi: «Ochenta mil saserdetos alumnos entre las fuersas de Nabukadnezar se fuyeron i fueron ande los Ismaelites». Asigun esto, el arivo de los Djudios a la Arabia akontesio en los siglos VII AEK o VI AEK.

Durante el tiempo del Segundo Templo, uvo asigun una leyenda islamika, una otra onda de imigrasion en Medina. La razon de esta imigrasion fue, las persekusiones seleusides, en la Tierra de Israel, en el siglo II AEK, i asigun una otra version, la razon fue las persekusiones romanas, en el siglo II EK. Djusto kon esto, siertos eskolarios pensan ke la imigrasion ke presedo la destruksion del Segundo Templo, fue el rezultado del desvelopamiento demografiko i politiko del tiempo en Yuda, i no de las persekusiones.

Las fuentes islamikas notan ke los Djudios de Medina eran los desendientes del Trivo de Yosef i de famiyas saserdotales de Aron i de Levites. Los Djudios de Medina avian gozado de una konsiderable influensia polítika i relijiosa. Durante la sejena i la syetena dekada del siglo VI, aktuaron komo governores i kolektores de dasios, asigun era de uzo en el Imperio Persano Sasanido. Esto turo fina ke la kompetision entre el Imperio Bizantino i el Imperio Sasanido ravajo el payis, i en konsekuansa, los Djudios sufrieron en las manos de los Kristianos. En segito, kon el arivo de los trivos arabos Banu Avs i Banu Kazradj, la supremasia de estos Djudios en la administrasion paso a los Arabos.

Los Djudios gozaron de una una vida de libertad i de rikeza en el dezierto, i fueron respektados i konsultados por los trivos arabos lokales, ke vieron en eyos un puevlo savio, kon una relijion evoluada i un nivel alto de kultura. Munchas famiyas arabas mandaron sus kreaturas a edukarsen ande los Djudios i adoptaron sus kustumbres.

Los Djudios de Medina se okuparon lo mas del komersio. Los de Banu Kaynuka lavoraron los metales eran i orfevros; los de Banu Nadir kultivaron datiles; i los Banu Kurayza negosiaron en el vino.

Los Djudios introduizyeron la agrikultura a Medina, kresiendo palmeras de datiles i sereales. Los artizanos djudios fraguaron kastilios en los somitos de las montanyas, aleshando de este modo sus komunidades de las malatias del dezierto. Seando agrikultores de valor, sus plantasiones enfloresieron entanto ke oazises, akordandoles rikeza i onor. Sus nivel kultural i ekonomiko favorizo a la Djudios a dominar politikamente los Arabos.

Aparte de Banu Kaynuka, Banu Nadir i Banu Kaynuka – los tres prinsipales Trivos djudios – egzistieron en la Arabia, i trivos djudios chikos komo Banu Avf, Banu Harif, Banu Hisham, Banu Nadjar, Banu Sayda i Banu Shutayba.

Komunidades djudias floresieron de mizmo, en el Kresiente Fertile, en Haybar, Teyma i Fadak (lo ke es oy Arabia Saudita), Edrei (en Yarden), Tadmor (en la Siria), Sura kon Pumpedita (en Irak).

Estas komunidades ekipadas kon kavaleria i armamiento avansado, reprezentaron un poder militar konsiderable. En segito del refuzo de los Djudios de akseptar su revelasion i de submetersen al Islam, fue este poder ke insito a Mahome a desimar a los Djudios de Medina para empidir su uzo kontra su armada.

—————————————————————————–
(*) Esta leyenda asemeja a la version biblika de la gerra entre Shaul i Amalek, i parese ser la kompilasion de esta version, kon akea de la primera gerra entre Amalek i Israel. La Biblia nota ke aunke su viktoria, la abstension de Shaul de matar a Agag, el Rey de los Amalekites kon toda sus desendensia, avia ensanyado el Profeto Samuel. De otra parte, se save ke la primera gerra entre Israel i los Amalekites avia akontesio en segito del egzodo de Ayifto. Konosido entanto ke un puevlo del Dezierto de Negev, los Amelekites avian atakado a Israel, en el Norte de la Peninsula de Sinay.
Ay de akodrar de mizmo, ke el Primer Livro de las Kronikas nota ke miembros del Trivo Shimon hueron al Monte Seir, i mataron a los Amelekites sobrebivientes, i se aresentaron ayi. Seir pudiendo ser el Oeste del Negev. Asigun esta mizma fuente, la desimasion kompleta de los Amalekites avia akontesido durante el reyno de Hezkiyau.

————————————————————————————————————

Gad Nassi