eSefarad Noticias del Mundo Sefaradi
Las Puertas de la Sivdad Vieja de Yerushalayim – 2° Parte
La Puerta de la Mizerikordia
La Puerta de la Mizerikordia – Sha’ar HaRahamim – La Puerta de Oro – La Puerta de la Eternidad – La Puerta Orientala. Se topa en la meatad de la pared orientala de la Sivdad Vieja, ke es en mizmo tiempo la pared del Monte del Templo. Es la sola entrada vizible a Yerushalayim en este lado.
La Puerta de Oro fue tapada en el anio 810 por los arabos, i dakel dia estuvo serrada durante 12 siglos.
Ay doz avierturas en esta puerta: la una se yama «La Puerta del Arepentimiento» – Sha’ar HaTeshuva – i la otra «La Puerta de la Mizerikordia», konosida en ebreo de la antikidad komo Sha’ar HaRahamim.
Se pensa ke en los tiempos biblikos fue uzada por rituales partikulares. Asigun la tradision djudia, la Shehina (Prezensia divina feminina) uzava apareser por esta puerta, i aparesera de muevo kon el arivo del Mashiah (Ezekiel 44:1-3) i una mueva puerta remplasara la puerta ke egziste; pormo de esto, los djudios uzavan arogar enfrente de esta puerta demandando del Todopoderozo su klemensia. I de aki su nombre ebreo, Sha’ar HaRahamim – Puerta de la Mizerikordia.
a la Sivdad Vieja de
Yerushalayim, por la
Puerta de Oro
La Biblia nota: “El Prens entrara por esta puerta i komera su pan delantre del Dio”. (Ezekiel 44:3) O, asigun la profesia de Zaharia, ‘kuando el Mashiah pasara atraverso de esta puerta, soflara el shofar, i todos los muertos de la semeteria del Monte de Olivos, se alevantaran de sus tombas. Kon la yegada del Mashiah se inisiara la rekonstruksyon del Templo. I empesara la Era Mesianika’.
Achakes de la proibision por un saserdose djudyo de entrar a un semeterio, los musulmanos establisieron un semeterio delantre de la puerta para empidir el arivo del Mashiah. Portanto, munchos djudios kreyendo ke el Mashiah sera de la desendiensa de de David, i no de la dinastia de Kohanim, le sera posible de traversar un semeterio sin komprometer la Ley.
Esta puerta tiene tambien un lugar importante en el Kristianizmo. Asigun el Muevo Testamiento, el Kristo, suvido a su azno, entro de esta puerta a Yerushalayim, el diya de Domingo de Ramos – primer diya de alhad antes del Pasko. Por esto, esta puerta fue nomada «La Puerta de Oro». Los kristianos kreen ke el Kristo era el Mashiah, i ke tambien aboltara para la Salvasion final en entrando a Yerushalayim por la Puerta de Oro.
Konosida en arabo i komo la Puerta de la Vida Etenela, los musulmanes esperan ke la Puerta de Oro azera parte del djuzgo en la Fin de los Días. Los musulmanes asemejan el djuzgo final de la umanidad komo pasar en el lado estrecho de un cuchillo ke se ekstiende de una montania (el Monte de los Olivos es mensionado munchas vezes en la leyenda araba) a la «Puerta del Syelo». Este ponte del lado de kuchio, se ekstiende evidamento por la Valeya de Kidron – asigun el trajektorio de un antiguo ponte de piedra ke egzistia en la epoka romana.
La Puerta de Oro tiene tambien interesado a los djudios i a los kristianos entanto ke el lugar del djuzgo final. Asigun las Eskriturias, las sentensias fueron dados en las puertas de la Sivdad de Yerushalayim (Livro de la Kreasion 19:01, 23:10). Achakes ke el Mashiah avia venido del Orientie (Mateo 24:27), fue konkluido ke el djuzgo tiendra lugar en La Puerta Oriental. Esto fue una de las razones, por los musulmanos, kristianos i djudios, de enterrar sus muertos en los lados orientales del Monte del Templo, en la Valeya de Kidron i en los lados oksidentales del Monte de los Olivos.
Es en 692 ke la Kopola de la Roka fue konstruida por el Kalif Abdel-Malik en la sima del Monte del Templo. Se pensa ke djusto en este mizmo tiempo los musulmanos taparon la Puerta de Oro para evitar la profesia de Zaharia en empidiendo el Mashiah djudio de entrar al Monte del Templo.
Los kruzados uzavan avrir estas puertas solo por butos relijiozos. Del dia ke Yerushalayim paso a los muslumanes asta oy, La Puerta de Oro esta blokeado por una grande kaza de kulto i una sala de estudios islamikos.
Fraguada en el siglo VI AE, es la maz vieja puerta de Yerushalayim i konsiderada komo su maz impresionante puerta. Piedras monolitikas ke fueron deskuviertas djusto enriva de la tierra fueron identifiadas kon la masoneria del siglo VI AE, del tiempo de Nehemia. Se pensa ke fue fraguada de muevo en el torno del anio 627 CE enriva de la pared vieja. Asigun una otra ipoteza, la puerta fue fraguada en los anyos 520, en el konteksto de la kampanya de restorasion del emperor Justinian I, en riva de las ruinas de la puerta antigua. Asigun los kristianos es de esta puerta ke el Imperor Bizantino Heraklion avia entrado a la Sivdad Vieja, despues de aver derotado la Persia, en el siglo VII, poko antes de la konkesta de la sivdad por los musulmanos. Una ipoteza alternativa sostiene ke fue fraguada en el siglo VII, por artizanos bizantinos, en el servisio de kalifes omayades.
La Puerta del Syerkol
kon
La Puerta de los Kuereros
La Puerta del Syerkol – Sha’ar HaAshpot – Bab al-Maghariba – Sha’ar HaMugrabim – Puerta de Siluan. Se topa en la pared Sude. Fue probablamente deskuvrida i restorada en los anyos 1538-40. Su nombre estranyo deriva del syerkol de la sivdad aronjada a su deredor del tiempo de la antikidad, ke yevava sus fedor a las leshores. Konduiza direktamente a la Pared Oksidentala del Templo i a la pared del Park Arkeolojiko. No se save si la lokalizasion de La Puerta del Syerkol, mensionada por Nehemia (2:13), se topava en este lugar.
Otruna posibilitad es ke su nombre se refero a los restos de los olokostos del Templo ke se kemavan en la Valeya de Hinnom. En el tyempo del Segundo Templo, ‘La Puerta del Syerkol’ era el nombre de una otra puerte en la muraya de Yerushalayim. Esta puerta se topava serka de la Payla de Shiloam ainda en el siglo XIX.
Es topografikamente la puerta en la mas basha parte de la pared de Yerushalayim.. Se topa en frente del kazal de Siluan. Por esto, fue de mizmo konosida de la Edad Media kon su nombre en arabo: Bab Silwan.
Durante la perioda mamluka i otomana, esta puerta se yamava Bab Almaghraba, al nombre de los moros de la Afrika del Norte ke se avian aresentado en Yerushalayim. El barrio mugrabi se topava en la plasa aktuala de la Pared Oksidentala del Templo.
En primero, avia en esta puerta una entrada chika ke se topava en la torre de la muraya. Enriva de esta entrada se topava un arko echo de piedras, i sovre el arko una rozeta. En el sentro de la fila de estas piedras i entre esta fila i el kadran superior de la entrada avia una estreya de David, ke era una figura dekorativa komuna en la perioda mamluka i otomana.
Esta puerta ke era en el tiempo muncho mas chika fue ancheada en 1952, kuando la Sivdad Vieja apartenia a la Jordania. Mas resientamente, su renovasion fue komplida i la puerta fue mas ancheada.
De muestras diyas es una de las mas limpias areas de la Sivdad Vieja.
Djunto a la Puerta del Syerkol egziste una puerta pietonal yamada Puerta de Kuereros (Curtidores). En realitad es una puerta medievala, ke fue deskuvrida durante las ekskavasiones en la dekada 1980. Durante los anyos 1990 i el anyo del millenium, uviendo muncho movimiento de vijitadores en esta puerta, la munisipalidad desidio de restorarla. En ebreo se yama Sha’ar HaBurskai, ke probablamente era su nombre durante la epoka de los Kruzados, kuando se topava ayi una zona industrial de los kuereros.
La Puerta de Sion
La Puerta de Sion – Sha’ar Tzion – La tomba del Rey David seando a unos kuantos pasos de esta puerta, allado del Monte Sion, se yama en arabo Bab El-Nabi Da’oud – Puerta del Profeto David. Yeva direktamente al kuartel ermeni i al kuartel djudio. Konosida i, en tanto ke ‘Puerta del Kuartel Djudyo’, esta puerta fraguada entre 1539 i 1542, se topa en la meatad de la parte del Sude de la sidad. Esta en el SudEste de la Meskita Omar, un poko despues del Monasterio Ermeni i de la Eglisia St. James. Mira al Monte Sion i a la sivdad de Hebron.
La puerta orijinala fue fraguada en la perioda ayyubi, por Malik AlMuazzam en 1212. Sus ruinas se topan a unos 100 metros al Este de su lokalizasion aktual.
Durante la Gerra de Independensia de Israel en 1948, el Palmah kombatio sin reushir en la entrada de la Puerta de Sion por el kontrol del Barrio Djudio.
La fasada ornemantala de Puerta de Sion sufrio grandes danyos por armas chikas el 18 del Mayo, 1948, despues de la konkesta del Monte Sion por las fuersas del Palmah. Sus komandantes desidieron de entrar kon la brigada Etzioni de la Hagana, por la Puerta de Sion al Kuartel Djudio assiejado, en el eskopo de establisir kontakto kon sus defensores.
La Puerta de Sion fue kapturada, ma los renforses prometidos a la fuersa de ataka no yegaron; Uzi Narkis, el komandante de la fuersa, ordeno a sus soldados de regresar a sus baza para otras tareas, i el kamino al barrio djudio fue abandonado.
Una fuersa de la Jejion Araba Jordana profito de esto i tomo la puerta, le permetiendo ansi el kontrol de toda la Sivdad Vieja. Mueve diyas despues, iva kayer i el Barrio Djudio.
Si los renforsos avrian arivado en tiempo, la istoria de Yerushalayim iva ser posiblamente diferente.
Las markas de las armas a fuego i los burakos de las balas provokados por este kombato se pueden ainda ver en muestros diyas en el entorno de esta puerta.
La Puerta de Sion es una de las puertas orijinales de la pared konstruida por los otomanos, portanto fue una puerta de manko importansa de la Puerta de Yafo, i sirvio komo punto de partensia, prinsipalmente uzada para arivar a los semeterios i a los edifisios relijiozas en el Monte Sion.
Las Puertas Tapadas
Aparte de la ‘Puerta de la Mizerikordia’, ke se topa en la pared orientala i ke fue relatada ariva, egzisten otras tres puertas tapadas, ke se topan en la pared del Sude.
Doz puertas de entre estas – La Puerta Tripla kon La Puerta Doble – son konosidas komo Las Puertas de Hulda, Sha’arei Hulda. Inkluen eskaleras ke yevan al Monte del Templo.
Las bazas de estas puertas apartienen a la epoka del Segundo Templo. Se pensa ke fueron konstruidas en el tiempo de Herod el Grande. Konosidas komo Ls Puertas de Hulda, estas puertas fueron yamadas al nombre de la Profetesa, porke, asigun la tradision yevavan a su klasa de estudios.
La tresera puerta serrada en la pared del Sude, formada de una entrada es konosida komo La Puerta Sola. Yeva a la aerea subterrena del Monte del Templo, konosida komo los Establos de Shelomo. Se pensa ke fue konstruida en el tiempo de Herod el Grande.
* * *
Yerushalayim es la unika sivdad, konsiderada komo sakra por las tres monoteistas relijiones: el Djudaismo, el Kristianismo i el Islam. Es el lugar ande el Rey Shelomo konstruizo el Primer Templo, ke fue destruido por Babel. El Segundo Templo fue rekonstruido en el tiempo de Ezra i Nehemia i destruido una segunda vez por los romanos en 70 CE.
Djudios se asamblan en el Muro de Lamentasiones, konosido komo el Muro Oksidental en ebreo – Kotel HaMaaravi – konstruido por Herod el Grande. Es todo es lo ke keda del Templo despues de su destruksion por los romanos.
Una de las fasinantes deskuviertas de la Geniza de Kairo es un Sidur – libro de orasiones – entitolado «Las Orasiones de las Puertas». Este Sidur, i una seksion de una otra orasion deskuvrida en la Geniza, tienen desvelado una antigua i espesiala kustumbre: akea de entornar las puertas de Yerushalayim.
El estudio de estos dokumentos ke datan de mil anyos, revelan ke los djudios kaminavan por las paredes en el entorno de la sivdad en kedando allado de kada puerta i en diziendo una orasion partikulara para kada una de estas puertas. A la fin de este torno, estas orasiones se dizian en sus totalidad. Esta antigua kustumbre fue de mizmo reflektada en los eskritos de un yerushalmi del siglo XIX: «Es muestra kustumbre en la sivdad santa de Yerushalayim, ke sea rekonstruida i establesida, de kaminar en el entorno de las paredes en Hol-HaMoed – diyas intermedios de las fiestas. Ombres, mujeres i ninyos partisipan, para kumplirla en resitando lo ke esta eskrito en los Salmos, Kapitolo 48: ‘Kamina sovre Sion, vate en su entorno, konta sus torres, kontalas bien sus murayas, mira a sus sitadelos’. Esto es una antigua tradision del puevlo santo de Israel».
El Profeto Ezekiel predizio ke el día kuando el numero de las puertas de Yerushalayim alkansaria a 12, una para kada uno de las trivos de Israel, el Mashiah governera el mundo de la Sivdad Santa. (Ezekiel 48:31-34).
La detresa dei egzilo i del esklavaje de Israel ansi ke la esperansa de su redampsion, asigun ke fueron atribuadas alegorikamente a las paredes de Yerushalayim kon sus puertas topan de mizmo sus ekspresion en estos versos de Nehenia, pronunsiados en su retorno del egzilo de Babel a Yerushalayim:
«… i vide ke las paredes de Yerushalayim estavan undidas i sus puertas konsumadas por el fuego. … les dishe: estash viendo la detresa en lakuala estamos, ke Yerushalayim esta dezierta, i sus puertas konsumadas por el fuego: veni, i edifiaremos la pared de Yerushalayim, i no estaremos maz en oprobio».
La Sivdad Vieja de Yerushalayim konosio una konstante evolusion i trokamientos, ainda antes de los tiempos del Rey David. Las gerras, los asiejos, kon la destruksion i la rekonstruksion tienen trokado su facha i el peyzaje alderedor de Yerushalayim.
Portanto, empesando del tiempo de los otomanos en el siglo XVI, las puertas prinsipales de Yerushalayim fueron prezervadas kuaji sin trokamientos. Asigun ke fue demonstrado, es posivle ke estas puertas fueron konstruidas en las puertas anteriores, mizmo ke remontan a los tiempos de Shelomo, i mas tadre a akeos de Nehemia. Estos misterios – enterrados en sus puertas famozas – asperan de muestras diyas a ser desvelados.
———————————————————————
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–
