eSefarad Noticias del Mundo Sefaradi
La Novya Arevatada
Era de uzo ainda del tyempo del Rey Ahav, ke mujeres bendichas se arekojen en la kaza de la novya para protejarla del maldicho guerko.
En akeos tyempos se kreyiya ke kada umano teniya una kontra-partida ke biviya en el mundo de los d’abasho i ke estos d’abasho no eran mas ke andjelos enviozos ke avian deviado del kamino de la Fey, i ke kerian kazarsen kon los umanos para gozarsen de sus karne i de sus sangre.
De mismo, se kreyiya ke los guerkos moravan al lado de los umanos, i por esto era nesesario de tomar prekosyones espesiales para ke los d’abasho no se arevatan las mas keridas de mozotros. Por esta razon, las novyas no eran nunka deshadas solas, partikularmente en los diyas antes de la boda.
Siertos las protejavan durante los syete diyas antes de la boda, i otros, durante trenta diyas. Para otros, protejar la novya durante un diya antes de la boda era bastante. Portanto, para todos el akavido era syempre nesesaryo.
Afito ke un diya, una novya manseva inyoro el konsejo de sus ansestros i salyo de la kaza de sus paryentes para bushkar a su ermano chiko ke no se avia aboltado. La novya no savia ke el guerko la estava segiendo kon el buto de arevatarla kuando se iva aleshar de su vizindad ande estava protejada.
Tanto mareyada estava la novya, no solo ke no demando de la djente de akompanyarla, i ni mizmo aviya tomado kon eya un punyado de sal para aleshar a los guerkos. I kuando miro abasho de la kaleja, le paresyo ke avia vido de leshos a su ermano. Lo yamo i empeso a korrer para arivar a el, sin ke saviya ke sus pasos la estavan yevando al reynado de los d’abasho.
No paso muncho ke todos del kazal, ya supieron lo ke avia afitado: la novya se avia desparesido! I a todos les avia tomado un sar muy negro, porke la novya puedia danyar a sus amigas muchachikas en prekantando ke asisten a su boda kon el prens de los guerkos.
Por modo de esto, todos los kazalinos se arekojeron en el entorno de las muchachas puras, asienderon kandelas i arogaron para ke la novya abolte sana i rezya. Estas rogasyones se oyeron durante una semana entera, i ay ke rakontan ke turaron mas de una semana.
Ma, los d’abasho se burlaron de esto todo, i al lugar de la novya, enbiaron un vistido de novya de velur blu, brodado de sirma de plata i de oro, ornado de perlas i de djoyas. Este vistido estuvo diyas enteros baylando i arodeandose en su entorno en las kalejas, sin ke se apersive una alma biva ke lo vistiya. I esto fue el kavzo ke los kazalinos se konvensieron ke la novya no iva tornar mas.
Despues de este evenemiento en todas las sivdades del Magreb se desidio de no deshar nunka solas a las novyas, i ni mizmo en las kazas ande se topan sal i kandelas ke pueden aleshar a los d’abasho!
——————————————————————————————————
Del folklor de los djudyos del Magreb.
Gad Nassi
———————————————————————
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores. ————————————————————————————————————————————————–
