La rubrika de Gad Nassi – La Falsa Korespondensia entre los Djudyos de Arles i de Estambol

La Falsa Korespondensia entre
los Djudyos de Arles i de Estambol

Arles aze parte de las sivdades de la rejyon en el Sud-Este de Fransia, konosida en tanto ke Provence. Determinada por las partikularidades de su pasado, Provence tyene su propria istorya djudiya. En este konteksto, la alegasyon de una korespondensia entre los djudyos de Arles i akeos de Estambol, tuvo un impakto partikular en la istorya de los djudyos de Provence. De mismo ke konstituo mas tadre uno de los manaderos del antisemitizmo universal.

En 1481, Provence fue unida kon el Reynado de Fransia. Kon esto, aunke los djudyos fueron ekspulsados de este Reynado en 1394, los privilejios de los djudyos de Provence les fueron retornados en 1482.

Portanto, en 1484 manifestasiones kontra los djudyos empesaron de muevo a esbrochar en  Arles, Aix, Marsilya, Auvergne i Tarascon. En segito, se renovelo el egzodo de los djudyos de esta rejyon. Este egzodo se akselero kon la renovasion de estas manifestasiones despues de un anyo. En 1489, 1493 i 1495, los djudyos de Provence fueron otruna vez el obyekto de inimistad en Tarascon, Arles i Manosque. En 1498, fue proklamado por Louis XII el Dekreto de la Ekspulsion de los djudyos de Provence. Este dekreto ke no fue aplikado, fue renovado en 1500 i en 1501. I en esta ultima vez fue definitivamente aplikado. La unika alternativa ofrisida a los djudyos para no ser ekspulsados era la konversion al Kristianismo. Portanto, despues de un kurto tiempo – para kompensar la piedridad de revenidos kavzados por el departe de los djudyos – fue impozado a los konversos de Provence, una taksa espesiala, konosida en tanto ke «taksa de los neofites«. Un rejistro datando de 1512, enumera unos 150 nombres – probablamente shefes de famiyas – biviendo en 16 lokalidades importantes de Provence i ke fueron el obyekto de esta taksa. Esta diskriminasion egzersada a estos konversos i a sus desendientos, se iva prolongar en los siglos vinideros.

Publikada en el empesijo del siglo 18, kon la difuzion de una satira entitulada Critique du nobiliare de Provence – Kritika de la noblesa de Provence – un numero grande de famiyas aristokratas, stigmatizadas de ser de orijinen djudyo, fueron desveladas. Esto fue segido por la adaptasion a la lingua provensala de un dokumento falso sovre una korespondensia, ke a la fin del siglo XV, los djudyos de Arles tuvieron kon los responsables de la komunitad djudiya de Konstantinopla, en el buto de resivir sus konsejos para empidir la ekspulsion de los djudyos de Provence. Asigun el dokumento, los djudyos de Konstantinopla les konsejaron de akseptar el baptismo, ma en mismo tyempo de kedar djudyos en sus korason, i de este modo, despues de ser nominados a postos altos ke el fakto de ser kristiano les permetera, eyos puederian vengarsen de todas las mizerias ke yevaron. Aki abasho el teksto de esta sea-dicha korespondensia:

Primera letra.

«Onorables Djudyos, saludos i bendisiones!

Esta letra es para metervos en koriente ke el Rey de Fransia, ke devino de muevo el patron de Provence, proklamo publikamente ke devemos de konvertirmos al Kristianismo, o deshar el payiz. I el puevlo de Arles, de Aix i de Marsilya ke kere apatronarse de muestro bien, esta menasando a  muestra vida, ruinando muestras sinagogas, i mos kavza munchas molestasiones; i esto todo mos provoka muncha indesizion sovre muestro dover de observar la Ley de Moshe. Es por esta razon ke vos estamos demandando de ser benevolente verso mozotros, para azermos saver, kon vuestra savidura, lo ke devemos de azer.

HAMOR, Rabino de los Djudyos de Arles, el 13 de Shevat, 1489«.

Segunda letra.

«Muy keridos Ermanos en Moshe, resivimos la letra en lakuala mos kontash vuestras angustias i adversidades ke vos azen sufrir. El konsejo de los satrapes i rabinos son ansi:

Estash diziendo ke el Rey de Fransia demanda de konvertirvos al Kristanismo: azeldo a esto, porke no tenesh otro remedio, portanto konserverash la Ley de Moshe en vuestros korasones.

Estash diziendo ke sosh forsados de entregar vuestros bienes: alora, aze merkaderes a vuestros ijos, para ke apoko apoko, ke dezmuden a los Kristianos de sus bienes.

Estash diziendo ke atentos fueron echos kontra vuestras vidas: alora, aze de vuestros ijos medikos i apotikeres, para ke deprivan sus vidas a los Kristianos.

Estash diziendo ke estan destruyendo vuestras sinagogas: alora aze de vuestros ijos pretros i saserdotes, para ke destroyan sus eglisias.

Estash diziendo ke vos estan molestando en munchas otras maneras: alora, tene kargo de azer de vuestros ijos avokates i notares, para pueder meter  a los Kristianes basho vuestro yugo (dominasion), para ke puedesh dominar el mundo, i para ke puedesh vengarvos (de eyos).

No vos departesh de este orden ke vos estamos dando, porke vash a ver a traverso la eksperiensa, ke de la umiliasion en lakuala vos estash topando, atenyerash al sumito del poder.

V.S.S.V.F.F. Prens de los Djudyos de Konstantinopla, el 21 de Kislev, 1489.

El fondo istoriko

Estas letras, kuando fueron reportadas por Arsène Darmesteter en 1880, en la Revue des études juives⁽¹⁾, atiraron la atansion de la opinion publika i ke esta korespondensia parese en una otra ovra⁽²⁾ publikada en 1641, ande esta eskrito ke estas letras fueron deskuviertas en los arkivos de un kuvante en Provence, sin ke el nombre de este kuvante sea revelado en la ovra.

En un segundo artikolo⁽³⁾ publikado por Alfred Morel-Fatio, en la mizma revista, es sulinyado ke estas letras ya son konosidas i sus forjeria es atribuada al kardinal Juan Martinez Guijarro. Konosido, en mismo tiempo ke Juan Martinez Siliceo, Guijarro, fue Arsheveko de Toledo entre 1546 i 1557.

Guijarro es en mizmo tiempo el otor del famozo Estatuo de limpieza, pledando ke los prelatos de una eglisia deven ser submetidos a provar sus pureza de sangre – una kondision ke era antes egzijada solo para ser rekrutado en la armada. Asigun este artikolo, la primera letra tiene por titolo: Carta de los Judios de Espana a los de Constantinopla⁽⁴⁾, i es redaktada en los mismos terminos ke la version pronvensiala. De mismo ke, i la segunda letra es enteramente konforme a su version provensiala.

Es i notado en este artikolo ke, a la konosensia de Morel-Fatio, estas letras fueron publikadas a lo manko kuatro vezes en diferentes ovras en Espania, i ke fueron kopiadas en una otra ovra publikada en Leipzig. De mismo ke, munchas de sus kopias manuskritas abondan en las bibliotekas. El artikolo presiza, ke estos faktos son la prova ke estas letras fueron en primero fabrikadas en la Espania, i ke fueron adaptadas mas tadre a sus version en la lingua provensiala.

En un treser artikolo⁽⁵⁾ sovre este sujeto, publikado de mizmo en la Revue des études juives, Isidore Loeb diskuta de la otentisidad de estas letras en  analizando esta vez las sirkonstensyas kronolojikas posibles de sus epoka de redaksyon. Asigun Loeb, la primera letra avia pudido ser redaktada en Espania, solo entre 1480 i 1492 – 1480, seando el anyo de la introduksion de la Inkizision i  1492, seando el anyo de la Ekspulsion de sus djudyos. De mas, sulinya ke despues de la Ekspulsion en 1492, no avian kedado djudyos en la Espania, porke todos de eyos ke avian kedado ya se avian konvertido al Katolisizmo, i no puedian ser mas forsados a konvertirsen.

Loeb adjusta ke antes de la Ekspulsion, la komunitad djudia de Estambol era lesho de ser una komunitad bastante povlada, i ainda no posedava el prestijio nesesario para ke sea konsultada por los djudyos de Espania, i ke el espaniol no era ainda avlado por sus miembros. Loeb se refera i a otros partikularidades, ke kontredizen la otentisidad de estas letras.

Un kuatren artikolo⁽⁶⁾ por Heinrich Graetz, publikado en la misma revista, nota ke estas dos letras se topan en el apendiso del Libro verde de Aragon, publikado en 1507, por Juan de Anchias, el sekretario de la Inkizision. De  Anchias divulga de mismo la jenealojia i los diversos ramos de las famiyas muevo-kristianos, para empidir a los viejos kristianos de aliarsen kon eyos. Graetz nota ke estas letras son akompaniadas por un prefasio i un epilogo, ke desvelan klaramente la intension ke fueron fabrikadas para insitar el papa Paul  III, de no konfiar dingun posto a los ekleziastos de orijinen marano, en la grande eglisia de Toledo. Nota de mismo, ke parsialmente grasias a esta falsifikasion ke el arsheveko Siliceo avia obtenido del Padre-Santo Paul III, ke dingun konverso no pudo ser benefisiado en esta eglisia.      

Konsernando «HAMOR, Rabino de los Djudyos de Arles«, la notasion ke parese a la fin de la primera letra, Graetz  reporta ke el nombre Hamor parese en tanto ke Chamorro en el teksto de Espania, i ke Moise Chamorro era el avuelo de la famiya mueva-kristiana Clemente, muncho estimada en Aragon. Graetz adjusta ke  este nombre fue eskojido kon la intension evidente de allegar ke el buto verdadero de Moise Chamorro de aksepar el baptemo, fue de danyar a los kristianos.

V.S.S.V.F.F. Prens de los Djudyos de Konstantinopla

La manera ke la segunda letra fue sinyada, atira de mismo muestra atansion. Loeb nota ke Ussuff, utilizado por Yossef, en tanto ke el chefe de los djudyos de Estambol, no se konforma a la realitad istorika, porke antes de la Ekspulsion, el rabino Moshe Kapsali okupava este posto, en tanto ke granrabino. Adjusta ke en akel tiempo el chefe de esta komunidad no tenia el titolo prens, ekivalante del titolo nasi en ebreo.

A estos argumentos puederemos adjustar ke el marrano Joao Miguez, solo despues ke se avia aresentado en Estambol, en el empesijo de la segunda meatad del siglo XVI, fue konosido en tanto ke Yusuf Nasi i fue konsiderado en tanto ke el lidere de la komunitad djudiya de esta sivdad – sino ke, de todos los djudyos del Imperio otomano. De mismo, es en siglo XVI, ke los djudyos del Imperio otomano tomaron el lugar de los djudyos de la Espania, en tanto ke la komunitad djudiya la mas proeminente del mundo djudyo.

A muestro avizo, el eskojo de «V.S.S.V.F.F. Prens de los Djudyos de Konstantinopla» fue inspirado por la selebritad de Yusuf Nasi, en este konteksto, V.S.S.V.F.F., seando uzado por  por Yusuf, i prens, por Nasi. Lo ke es de mizmo, una otra prova de la fabrikasion de estas letras en el siglo XVI, i no en 1489.

El ebreo seando la lingua vehikulara valida entre las komunidades djudias de diferentes payizes en akeos tiempos, refuta de mizmo la otentisidad de estas letras.

* * *

En 1882, Abbé Chabauty, en su ovra intitulada, Les Juifs nos maîtres – Los Djudyos muestros mestros – iva deklarar, en referandose a sus publikasion en la Revue des études juives, en 1880, la «signifikansa sinistra» de estas dos letras, sovre la konspirasion djudiya de dominar el mundo. En efekto, la ovra de Chabauty iva en segito servir de fuente de inspirasion a otras publikasiones antisemitas, inkluido Los Protokoles de los Savios de Zion.⁽⁷⁾

———————————————

(1) Darmesteter, Arsène, «Lettres des juifs d’Arles et de Constantinople (1489)», Revue des études juives, 1880, 119-123.

(2) Bouis, M, I, prestre, La royalle couronne des roys d’Arles, Avignon, 1641, 475. Asigun  Darmesteter, Arsène, «Lettres….

(3)  Morel-Fatio, Alfred, «Les lettres des Juifs d’Arles et de Constantinople, Lettre à M. Arsène Darmesteter», Revue des études juives, 1880, 301-304.

(4) «Judios honrados, salud y gracia. Sepades ke el rey de Espana, por pregon publico, nos hace volver cristianos; y nos quitan las haciendas i las vidas y nos destruyen nuestras sinagogas y nos hacen otras vejaciones, las cuales nos tienen confusos e inciertos de lo que hemos de hacer. Por la ley de Moises os rogamos y supplicamos tengais por bien de hacer ayuntamiento, y enviarnos con toda brevedad la deliberacion que en ello hubiereis hecho. Chamorro, Principe de los Judios de Espana.«

(5) Loeb, Isidore, «La correspondance des juifs d’Espagne avec ceux de Constantinople», Revue des études juives, 1882, 262-276.

(6) Graetz, Heinrich, «But réel de la correspondance échangée entre les Juifs espagnols et provençaux et les Juifs de Constantinople», Revue des études juives, 1889, 106-114.

(7) http://www.the7thfire.com/Politics%20and%20History/protocols_of_the_elders_of_zion.htm

Gad Nassi

———————————————————————

Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Gad nos ofrecerá artículos de su creasion para compartir con nuestros lectores.
————————————————————————————————————————————————–