Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul.
Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Moshe, en el payis de Kush

La ija de Paro, no puediendo trayer kreaturas al mundo, avia adoptado a Moshe en tanto ke su ijo. Moshe fue elevado i edukado komo un prens en el korte del palasio, en ambezandose toda la saviduria del Ayifto.

Moshe bivyo kuarenta anyos en Ayifto. La leyenda rakonta ke kuando se avia engrandesido, aviya ensenyado al puevlo munchas kozas provechozas komo la konstruksion de naves, sistemas de transportar penyas, fabrikasion de armas, i temas de filozofia. Ansi, Moshe avia ganado el estimo del puevlo, i avia de este modo arivado a un posto alto komo administrator.

En akel tiempo, el puevlo de Kush – Etyopia o Nubia – avia invaido el Ayifto en apatronandose de todo su byen.

Los Ayiftianos uzavan rijirsen asigun las palavras de sus endivinos, i kuando les fue revelado de demandar ayudo del Ebreo, Paro nomino a Moshe komo el komandante de su armada.

Moshe avanso kon su armada verso el Payis de Kush por las tierras sekas, al lugar de azerla avansar, asigun era el uzo, en tierras mojadas al lado del rio.

De otra parte, era muy difisil de avansar en las tierras sekas, porke estas tierras eran yenas de kulevras. Portanto, Moshe briyo kon su jenia militara en uzando un alay de buhos ke trusho kon el en paniris de payla en forma de arko. Asigun se save, los buhos son los maz grandes enemigos de las kulevras, ke se fuyen kuando los buhos las atakan. De este modo, a la grande surpriza de los Kushes, arivo al Payis de Kush, i, vensio a sus armada.

A la fin los abitantes de Kush se retiraron a sus kapitala Shva, i fueron enserklados por Moshe. Shva era una sivdad muy difisila de konkestar porke era entornada por el Rio Nilo i otros rios, i los korientes de las aguas no permetian de traversarlos. Por esto, Moshe kon sus trupos fue detenido ahuera de la sivdad.

El Rey de Kush tenia una ija ke se yamava Tarbis. Tarbis avia apersivido a Moshe, i en observando la bravura i la kapachidad de Moshe, se avia enamorado d’el. No puediendo kontrolar su amor, mando sus servidoras las maz ermozas ande Moshe, propozandole de kazarse kon el.

Moshe aksepto a este ofre, en la kondision ke Shva se rendiera a Ayifto. En segito, firmaron un pakto en djurando ke Moshe se va kazar kon eya, i ke no va danyar de dinguna manera al puevlo de la sivdad.

I, todo afito ansina. Moshe se kazo kon Tarbis i incho su dover de marido. Asigun una leyenda, fue Rey en el Payis de Kush. I, despues de munchos anyos se abolto kon su armada a Ayifto.

Portanto, la gloria de Moshe en la gerra kontra Kush avia provovokado el selo en muncha djente, i mizmo en Paro, ke se izieron de negra sangre en pensando ke Moshe puederia uzar de su poder para dominarlos. Entonses se aliaron entre eyos para matar a Moshe. I, Moshe fue al koriente de este komploto.
Moshe de su parte, nunka se olvido ke era un Ebreo. Fue afliktado de ver ke sus ermanos estavan yevando una vida de esklavo i ke eran uzados en lavoros forsados. I kuando se avia embroliado kon Paro para defender  a su puevlo, se fuyo de Ayifto i se refujio ande Yetro en el Payis de Median

—————————————————————-

Gad Nassi