Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul.
Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

La Borrachez de Noah

Para meter una fin a sus komporto visiozo, el Dio se avia desidido de akonteser un mabul grande, i ansi, debarasarse de los umanos. Ma entre el puevlo se topava Noah ke era una persona onesta i ke nunka no salia del kamino del Dio.Por esto, el Dio avia desidido de salvarlo de este mabul, i ke sea el projenitor de una mueva rasa umana.

Entonses, ordeno a Noah de konstruizir una arka para salvar los miembros de su famiya kon syete pares de animales purifiados asigun el ritual, un par de kada animal no puro, i syete pares de kada djenero de pasharos.

De mizmo, le ambezo la manera de konstruizir una arka, i de ke manera akavidar su komanya. Despues ke el mabul se kedo, i los kestavan en la arka fueron salvados, Noah ofrisio sakrifisios al Dio. El Dio lo bendizo kon su famiya en aziendo una aliansa kon eyos.

El mabul avia turado 150 diyas i avia aniilado la projenitad yena de pekados de Adam i Hava. Despues el Dio kedo la luvya. Otros 150 diyas pasaron fin’a ke las aguas abashen bastantamente para ke la arka se poza al Monte Ararat. Durante 40 diyas otros Noah i su famiya asperararon para saver lo ke se estava pasando. En esto, mandaron una kolomba ke abolto porke no avia ttopado un lugar seko para pozarse. Kuando lo mandaron despues de una semana, la kolomba abolto kon un ramo de oliva en su boka. Esto era siman ke la tierra ya avia empesado a sekarse. I kuando la mandaron despues de una otra semana, la kolomba no abolto maz. Esto era siman ke la tierra era bastante seka.

Noah avia deskuvierto la manera de kultivar la vinya i el proseso de aparejar el vino. Un diya despues de aver bevido vino, se avia enborrachado i avia kedado durmiendo en kayendo en basho dezmudo en su tienda. Kuando su ijo Ham lo remarko, empeso a riirse i yamo a sus dos ermanos, Shem i Yafet, para ke veygan el hal de sus padre. Portanto, eyos se komportaron kon respekto enverso sus padre en kuvriendolo kon un pedaso de ropa. Djusto en este punto, Noah avrio sus ojos, maldizio a Ham, i bendizo a Shem i a Yafet::

«Seras esklavo de los esklavos a tus ermanos. Ke el Dio te bendize Shem, i ke Kanaan sea tu esklavo. Ke Yafet puje, i azelo morar en la tienda de Shem; i ke Kanaan sea su esklavo”.

* * *

Noah era el ijo de Lameh, i apartenia a la diezen jenerasion despues de Adam. De sus ijos, Shem, Yafet i Ham, kaminaron todas las rasas del mundo. Asigun la leyenda, Noah nasio kon un puerpo blanko komo la inyeve i sus kaveyos paresian a la lana. Kuando los avrio por la primera ves, la luz de sus ojos illumino a toda la kaza, i pishin se metyo en piez i a orasionar al Dio.

Se pensa ke Noah avia nasido para liberar la umanidad del kastigo de Adam i Hava. De mismo, se kreye ke asigun la Aliansa echa entre Noah i el Dio, el Dio se avia engajado a no destruir maz la umanidad kon mabul, i ke el arko-en-el syelo reprezenta a esta Aliansa.

Las syete Leyes ke se topan a la baza de esta Aliansa – konosidas en tanto ke las Leyes Noahitas – son konsideradas komo las reglas fundementalas i universalas a laskualas kada umano deve de konformarse. Esto es la razon por lakuala, Noah es el sembolo de la unitad i de la perpetuitad de la umanidad.

Aparte ke es konsiderado en tanto el primer agrikultor en la istoria, ke invento los instrumentos para lavorar la tierra i sembrar, se kreye ke el Andjelo Rafael le avia transmetido el saverisyo de kurar las hazinuras kon las yervas i plantas. El livro de Noah sovre este saverisyo fue tresladado en munchas linguas i fue transmetido de una jenerasion a la otra, i parvino a los medikos famozos de la Gresia i de la India.

La Biblia nota ke Noah fue la primera persona ke sembro i kultivo la vinya, i ke supo obtener el vino. La produksion del vino de la uva i la borrachez de Noah son konsiderados en tanto ke un fenomeno natural, ke no dever ser reprimandado. Esto deriva probablamente del rolo de la vinya i del vino en el patrimonio de las sivilizasiones.

Asigun syertos komentarios, el Guerko avia asistado a la plantasion de la primera vinya, en sakrifiendo en primero un kodrero, despues un leon, mas despues un munyako, i a la fin un puerko. Esto reprezenta el fakto ke despues de bever la primera kupa de vino, la persona es kalma komo un kodrero; a la segunda, kurajozo komo un leon; a la tresera, maskarakito komo un munyako; i a la kuatrena, suzyo komo un puerko ke se echa al lodo en fregando su puerpo.

La plantasion de la vinya por Noah i su borrachez fueron integradas a la leyenda, probablamente para elaborar i djustifiar el kastigo de los puevlos de Kanaan i de su entorno, ke se komportaron entanto ke el enemigo de Israel, en idantifiando a Ham en tanto ke sus projenitor.

—————————————————————-

Gad Nassi