eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
Martin Luther, el Protestanismo, i los Djudios
——————————-
Inkosistensia i violensia karakterizan las allegasiones de Luther en todos los domenios, i puedeser en dingun otro domenio, en sus virulensia konsernando los djudios. La Eglisia Luterana, konservo paradoksalmente toda la rankor kontra los djudios, eredada de la Eglisia Katolika medievala – mizmo seando maz atrosa en no rekonosiendo el dover de protejarlos.
A lo largo de los siglos posteriores, las reprobasiones de Luther kontra los djudios kultivaron la malisia del antisemitismo, ke su erensia iva ser evidente en el Nazismo.
————————————————————————————————————————–
En la Edad Media, la Eglisia Katolika tuvo rekorso a varios metodos para obtener grandes kantidades de fondos. Entre estos, la vendidad de induljensias fue akeo ke iva danyar lo mas a su reputasion.
Asigun la ipoteza de la Eglisia, kristianos ke avian grasias a sus ovras akumulado munchos kreditos en el syelo durante la istoria, no nesesitavan kuando murereian la totalidad de estos kreditos.
sus 95 Tezas a la puerta de la
Katedrala de Wittenberg
De otra parte, los kreditos adisionales avian pasado a ser la propriedad de la Eglisia. De este modo, la Eglisia posedava una kasha enorme de buenas aksiones, ke puederan ser uzados para la abolision de los pekados de la djente, ke no tenerian bastante kreditos. I estos kreditos poederian ser komprados kon la moneda de la Eglisia. Este proseso era konosido komo la «vendidad de induljensias».
Kuando ay una grande kuantidad de moneda flotando de mano en mano, i la korupsion esta en kamino. De la moneda no nase lo mejor de la djente, mismo si se ajisa de monhes, klerikos, saserdotes, obispos, kardinales, etc… La korupsion avia aksedado a una tala natura, ke se avia konvertido en una burla en la Evropa.
Martin Luther (1483 -1546)
Martin Luther es el prekursario i la figura sentrala del movemiento de la Reforma Protestanta. Sus Ideas perturbaron la otoridad del Papa i de la Eglisia Romana Katolika.
Luther era de avizo ke la salvasion no se akiere kon ovras buenas i donasiones a la Eglisia, ma se resive solo komo un regalo gratuito de la grasia de Dio por el intermedio de la fey en el Kristo. Asigun ke el mizmo lo avia ekspresado, la razon no podería servir a entender el Dio, i ke la Biblia es la unika fuente por la konosensia divina.
En 1517, Luther komprometio la Eglisia Katolika en enklavando a la puerta de la Katedrala de Wittenberg sus 95 Tezas, ekspozando sus preguntas de la Eglisia. El obispo lokal lo relevo imediatamente de su kargo i mando un reporto a Roma, egzijando su ekskomunion. En segito, Luther viajo a traves las sivdades de Alemania en propajando sus ideas.
En desiembre 1520, Luther kemo en las puertas de Wittenberg, todos los livros del Derecho Kanoniko djunto kon la bula papala, Exsurge Domine, ke lo avia deklarado komo eretiko.
Es su refuzo de abrogar sus eskritos, a la demanda en 1521 del Papa León X i del emperador Carlos V en la asamblea konosida komo Dieta de Worms, ke iva provokar su ekskomunion i su kondanasion komo un proskrito.
Luther treslado la Biblia al alemano, konvertiendola ansi en una version mas aksesible al puevlo, lo ke tuvo un impakto enorme en la Eglisia i en la kultura alemana. De otra parte, su matrimonio kon Katharina von Bora konstituo un modelo para la otorizasion i la praktika del matrimonio por los klerikos protestantes.
La revolusion de Martin Luther insito uno de los mas destruktivos konfliktos de la istoria en Evropa, la Gerra de Trenta Anios. Aun ke aparamente era entre los protestantes i los katolikos, esta gerra teniendo munchas konnotasionas, rekurjito en mizmo tiempo konfliktos politikos.
Los djudios i las dos fachas de Luther
La aktitud de Luther verso los djudios se troko durante el korso de su vida. En la faza inisiala de su kariera, fina al deredor de 1536, se amostro preokupado por sus apreto en la Evropa i fue entuziasto para konvertirlos al Kristianismo en el konteksto de sus reformas.
Ansi se avia eksprimido en una letra en 1514:
«La konversion de los djudios deve ser solamente la ovra de Dio, i no del ombre…«
En 1519, avia denunsiado la mezura bizantina del siglo VI, kontra los djudios:
«Teologos absurdos defenden el odio kontra los djudios… Kual djudio konsenteria apartenir a muestros rangos, kuando ve la kruelidad i la enemistad ke kavzamos ande eyos, paresemos menos kristianos ke animales?»
En su ensayo de 1523, Ke el Kristo nasio Djudio, Luther kondeno la manera non umana de tratar los djudios i insito a los kristianos de tratarlos kon amabilidad. Luther avia aspirado ke los djudios oyerian el Evanjilo proklamado kon klaridad i se konvenserian a konvertirsen al Kristianismo:
«Si uviera sido djudio i avia konstatado estos torpes i bodokes governar i enseniar la fey kristiana, iva ser pronto en serka de konvertirme en un puerko ke un kristiano. Estos trataron los djudios komo si fueran perros al lugar de seres umanos; se tienen mas ke burlado de eyos i se apatronaron de sus bienes. Kuando los baptizaron no les amostraron nada de la doktrina kristiana i de la vida, ma solo los sometieron a sus idiosia i a la burla… Kuando somos prontos a gozarmos de muestra kristianidad, devemos akodrarmos ke no somos mas ke djentiles, mientras ke los djudios son del lineaje del Kristo… Si keremos en verdad ayudarlos, devemos komportarmos kon eyos, no asigun la ley papala, sino ke kon la fey del amor kristiano…»
Portanto, mas tadre, Luther kondeno los djudios i insito el puevlo a persekutarlos i a ekspulsarlos.
En 1537, Luther obtuvo la ekspulsion de los djudios de Saksonia, i en la dekada de 1540 reusho arondjarlos de munchas sivdades alemanas. Sus segidores sakearon la Sinagoga de Berlin en 1572 i en el anio segiente ayegaron finalmente a ekspulsar los djudios de todo el payis.
En 1538, kuando el Elektor de Saksonya, John Frederick, avia emetido un mandato proibando a los djudios de morar, de azer negosios i viajar en su reynado, Luther refuzo toda intervension. Referandose a sus tentativas fayitadas de konvertir los djudios, avia eskrito:
«… seria dispuesto a azer lo mijor para su djente, pero no va kontribuir a su obstinasion por mis propios aktos benevolentes. Usted deve eskojer un otro mediator.»
Von den Juden und Ihren Lügen – Sovre los Djudios y sus mintiras – publikada en 1543 i Vom Schem Hamphoras und vom Geschlecht Christi – Del nombre Inefable i las jenerasiones de Kristo – publikada sej mezes despues, son las prinsipales ovras de Luther blasfemando los djudios.
Ansi se eksprime Luther:
«Los djudios son una basha djente de putas, no el puevlo del Dio… i la sirkonsizion deve ser konsiderada komo una suziedad. Son yenos de la medra del diavlo en lakuala se arastan komo el puerko… No se deve de amostrarles dinguna piada i ni mizerikordia… estos guzanos venenozos deven ser rekrutados en lavoros forsados… Kale dezbarasar de eyos, por la konversion o por la ekspulsion.» Luther ekspoza un plan para la implementasion de este eskopo… i adjusta:
«Aki en Wittenberg, en la eglisia de muestra parokia, ay una puerka eskulptada en la piedra, basho de lakuala se enkontran dos puerkos jovenos i djudios ke estan chupando, detras de la puerka se topa un rabino ke esta alevantando la pierna derecha de la puerka, se alevanta detras de la puerka, se inklina i mira kon grande esfuerso al Talmud basho la puerka, komo si keria meldar i ver una koza mas difisil i eksepsional, sin duvdo ganaron en este lugar, sus Schem Hamphoras – Shem HaMefurash, en ebreo; la tetragamasion; el nombre del Dio».
Poko antes de su muerte en febrero 1546, Luther prediko kuatro sermones en Eisleben. Estas kontienen akuzasiones kontra los djudios por el asasinato ritual, la majia preta, i el entosigasion de los pozos. Luther no rekonose dinguna obligasion de protejar a los djudios. Defende el dirito de las otoridades de ekspulsar a los djudios de sus tierras, en kavzo ke estos no se konvertiran al Kristianismo… Adjusta:
«Eyos son muestros enemigos publikos. No kedan de blasfemar el Kristo muestro Senior, yamando puta a Maria la Virjina, ijo de una puta al Kristo, i a mozotros replikantes o avortados…»
Konsernando los djudios, Luther kometio la misma error ke Mahome. Estava seguro ke los djudios lo apoyorian i mismo, se konvertirian al Luteranismo. Avia sakudido la Eglisia Katolika en sus fondamientos, rezistio a la ekskomunion i konfronto el Sakro Emperor Romano. Penso ke era tan espesial ke los djudios ivan a ser prontos a konventirsen.
En 1542, despues de aver meldado una treslasion del Koran al latino, se metio a publikar diferentes pamfletos kritikando el Islam. Kalifiandolo islamismo o el turko, Luther vido la fey muslumana komo un instrumento del diavlo, i fue indiferente a su praktika: «Desha ke el turko se kreyga i bive, asigun lo azen el papa i los otros kristianos falsos«.
Kuando Soliman el Magnifiko estava asiejando a Viena kon una grande armada, Luther se avia opozado a la rezistensia kontra los otomanos. Los avia konsiderado komo una kalamitad mandada por Dio para kastigar a kos kristianos, i komo adjentes de la apokalipsa biblika para destruir al antekristo, ke kreyia ser la papasia i la Eglisia Romana. Siempre se avia opozado a la idea de gerra santa de una armada kristiana kontra los turkos. De otra parte, Luther apoyo una gerra non-relijioza kontra los turkos. Al deredor de la epoka del asiejo de Viena, redijo una orasion por la liberasion nasionala de los turkos, pidiendo a Dio de «dar a muestro emperador una viktoria perpetuala sovre muestros enemigos«.
Sea achakes de su birra por la negasion de akseptar su ideolojia o por alguna kualkere otra razon, la rankor de Luther kontra los djudios se intensifio progresivamente durante su vida. Achakes ke munchos governadores protestantes de la epoka lo avian apoyado, reusho a ekspulsar los djudios de Saksonia.
Aun la benevolensia aparente de Luther verso los djudios ke avian apresiado esta aktidud en las primeras etapas de su kariera, los djudios avian rezistido a su mensaje.
Portanto, uvo siertos, komo Abraham Farissol, ke lo konsideraron komo un kripto-djudio i un reformisto en la defensa de la verdad relijioza i la ekitad, en viendo en su anti-idolatria un retorno al Djudaismo. Otros eruditos, en partikular en la Diaspora sefardi, asigun el egzemplo de José ha-Kohen (1496-c. 1575), fueron fuertamente impresionados en favor de sus ideas reformistas.
Kuando los djudios de la Evropa del Este eran relativamente insulados de la influensa eksteriora, djudios en la Evropa oksidentala fueron afektados por el shizmo interno del Kristianismo ke ensendio fuersas latentas, ke kambiaron definitivamente la facha de la sivilizasion, en insitando el proseso del modernismo.
Todo kon esto, i los reformatores inspirados de los preseptos de Luther, fueron i eyos persekutidos por los katolikos.
Aun su lucha kontra el Djudaismo, Luther tuvo un ondo i permanente amor por la Biblia Ebrea. Aksepto el ebreo komo la unika adekuata lingua para la ekspresion de la verdad relijioza. Mizmo ke su konosensia del ebreo era indijente i su prove grego era mijor, su traduksyon de la Biblia al aleman fue uno de los mas importantes alkansos en la istoria de la literatura oksidentala. De otra parte, en su traduksion de la Biblia i de sus interpretasiones, la intuision i la relijion relevada sovrepasaron los aspektos gramatikales o linguistikas. Ansi se avia eksprimido: «Yo no so un ebraisto, i no lo kero ser… Prefero traduizir libramente… Interpretasion egzakta es un regalo espesial de Dio”. Aun ke avia uzado frekuantamiente – i puedesor sin saverlo – las interpretasiones de Rashi, Luther avia en jeneral rechazado las otoridades rabinikas,mizmo ke avia rekonosido siertos de sus ideas.
Inkonsistensia i violensia karakterizan las allegasiones de Luther en todos los domenios, i puedeser en dingun otro domenio, en sus virulensia konsernando los djudios. La Eglisia Luterana, konservo paradoksalmente toda la rankor kontra los djudios, eredada de la Eglisia Katolika medievala – mizmo seando maz atrosa, en no rekonosiendo el dover de protejarlos.
A lo largo de los siglos posteriores, sus reprobasiones kultivaron la malisia del antisemitismo, ke su erensia iva ser evidente en el Nazismo.
—————————————–
Gad Nassi
