La rubrika de Gad Nassi – Estorias de los tiempos biblikos: Shimshon la estorya de un eroizmo estranyo

Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Shimshon
la estorya de un eroizmo estranyo

La estorya de Shimshon, parese en el «Livro de los Djuzgos». Su padre Manoah era kazado kon una mujer, ke durante anyos enteros no estava puediendo traer kreyaturas al mundo.

Un diya, un andjelo del Dio le aparesyo i le proklamo ke iva parir un ijo, i ke este ijo ya esta en su matris i es destinado a ser un nazirit – lo ke kere  dizir, al servisio del Dio. I, adjusto ke de agora endelantre, no kale ke bevga vino o kualkere beveraje fuerte o ke koma kozas suzyas. Proklamo ke su ijo salvara a Israel de los pilishtis, i del diya ke iva naser, no kalia ke le korte sus kaveyos, asigun ordena la tradision por los nazirites.

En efeto, nasyo Shimshon, i fue engrandisido asigun estos preseptos. Kuando se izo adulto, salyo de las kolinas ande su puevlo biviya para konoser a las sivdades de los pilishtis. Es ayi ke se enamoro de una mujer biviendo en Timna i se apronto a kazarse kon eya. Portanto, los paryentes de Shimshon, en no saviendo ke esto era una desizion del Dio para atakar a los pilishtis, se opozaron a su dezeo.

En kamino para demandar la mano de la mujer, Shimshon fue atakado por un leon. Shimshon  aferro al leon en sus brasos i kon el espirito del Dio ke vino a enforteserlo, lo despedaso en doz. Fue tanto impresionado ke a este evenimiento lo guadro en sekreto. Kontinuo en su kamino a la kaza de la pilishtiya, ande su demanda de kazarse kon eya fue akseptada.

Kuando se metyo de muevo en kamino, remarko ke bizbas avian inchido de miel la karkasa del leon. Komio una punyada de este miel i trusho una partida a sus parientes.

Durante la fiesta de su boda, propozo de rakontar una endevinansa a sus trenta ombres de onor del kazamiento – todos pilishtis – i les prometio, ke en kavzo ke saveran su repuesta, de aregalar a kada uno de eyos kon vistidos de valor en lana.

El endevinansa era ansi:

«Ahuera del komedor, koza de komer; ahuera del fuerte, koza dulse.»

Esto es un kuento disimulado de su segundo enkontro kon el leon. Los Pilishtim se enbirraron i se adresaron a su espoza i la menasaron ke, en kavzo ke no les deskuvrira su repuesta, la kemaran a eya i a su padre kon toda su kaza.

La novya de Shimshon le arogo en yorando de revelarla la solusyon del endevinansa. Entonses, Shimshon la revelo i su novya la transmetio a los trenta pilishtis. A la tadrada del syeten diya del kazamiento antes ke el sol se echa, los pilishtis dizieron a Shimshon:

«Kualo puede ser mas dulse ke el miel? i, kualo puede ser mas fuerte de un leon?»

Shimshon les respondio:

«Sin tener lavorado mi kampo, no es posivle ke arivatesh a solvar a esta kestion.»

Se arevato kon furya i mato a trenta pilishtis de Ashkelon, i a sus vistidos los trusho a los trenta ombres de onor. Todo ensanyado se abolto a la kaza de su padre.

Entretiempo a su novya la kazaron kon el mas valorozo ombre del lugar. El padre de la novya no permetio a Shimshon de verla, i le propozo de darle por mujer a su ermana mas manseva.

Shimshon tomo trezientos zorros i ato a sus kolas pedasos de lenyo enflamados, i los solto a los kampos sembrados de los pilishtis, i de este modo, kemo toda sus rekolta. Los pilishtis en saviendo la razon de este akto, mataron en kemandolos a la espoza de Shimshon kon su eshuegro. En vengansa, Shimshon masakro a munchos pilishtis.

Shimshon se eskondio en una kaverna en Etam. Una armada de pilishtis lo segio, i demando de 3000 ombres de Yuda de entregarlo en sus manos. Kon el konsentimiento de Shimshon, estos lo ataron kon kuedros. I, kuando lo estan delivrando, Shimshon aranko sus kuedros, i mato a unos miles de pilishtis kon el gueso del menton de un azno.

Despues, Shimshon se hue a Gaza, i se kedo ayi en la kaza de una putana. Sus enemigos lo asperaron en la puerta de la sivdad para aferarlo. Ma, Shimshon deroko la puerta de la sivdad i la yevo a la kolina en frente de Hebron.

En segito, se enamoro en la valeya del Rio Sorek, de una mujer yamada Dalila. Los pilishtis se adresaron a Dalila i la konvensieron kon 1100 pedasos de moneda de plata, de aprovar de deskuvrir el sekreto de la fuersa de Shimshon.

Shimshon no kijendo revelar su sekreto, se burlo de eya en diziendo ke peryera su fuersa, si lo atan kon la kuedra freska del arko. I, ansi aze Dalila, kuando Shimshon esta durmiendo. Ma, kuando Shimshon se esperta, aranka la kuedra.

Dalila persista en su demanda, i Shimshon le dize ke lo puede atar kon kuedras muevas. Dalila lo ata kon kuedras muevas kuando Shimshon esta durmiendo, i Shimshon de muevo las aranka.

A la tresera demanda de Dalila, Shimshon responde ke kale enrezyar entre eyos las kadenas ke lo atan. I, esta vez Shimshon las rompe kuando se esperta.

A la fin, Shimshon le revela ke peryera su fuersa en kavzo ke le kortaran sus kaveyos. Entonses, kuando Shimshon esta durmyendo, Dalila yama a su servidora, para ke le korta sus syete buklas. Sovre esto, el Dio se alesha de Shimshon, porke avia revelado el sekreto de la djura de los nazirites, i Shimshon es kapturado por los pilishtis. Lo siegan en pasando un fierro en braza a sus ojos. Shimshon es enprizonado en Gaza i kondanado a aboltar la piedra de un molino.

Ariva un diya, kuando las personas de alto grado de los pilishtis se arekojan en un templo para una seremonia de sakrifisio a Dagon, uno de sus dios de los maz importantes, i para remersiarlo por aver delivrado a Shimshon en sus manos. Lo trayen a Shimshon kon otros kaptivos para ekspozarlos.

Entretiempo los  kaveyos de Shimshon ya tienen pujado. Demanda a su guardo de konduizirlo allado de las kolonas sentralas del templo para pueder apoyarse a estas kolones.

En esto, Shimshon aroga al Dio:

«Akodrate de mi, Te esto arogando esta vez, para ke me rendes mi fuersa, para ke puede vengarme de los pilishtis, por lo ke izieron kon mis doz ojos. Deshame ke me muere kon los pilishtis. Ke el templo se efondra sovre sus governadores i todo sus puevlo«.

Deroka a las kolonas, i el templo se efondra en matando a muncho maz pilishtis ke Shimshon avia matado en su vida.

Despues de su muerte, su familya rekupera su puerpo de los enkombros, i lo enterra allado de la tomba de su padre.

Dalila no es maz mensionada, i su destino no es konosido.

* * *

La Biblia presiza ke Shimshon governo a su puevlo durante vente anyos. Era tan fuerte ke era kapache de alevantar dos montanyas i arastarlas komo dos punyadas de tierra. Aunke su nombre parese en el «Livro de los Djuzgos», Shimshon no es akodrado en tanto ke un komandante konduizando a su armia al kombate. De mizmo es el uniko djuzgo ke kayo en las manos del enemigo i ke muryo en kaptividad.

En la perioda del Talmud, syertos niegaron ke fue un personaje istoriko en konsiderandolo en tanto ke una figura mitolojika. Otros remarkaron ke a su estoria manka la fervor relijioza i morala. En efeto, su involvamiento kon las tres mujeres, prova ke Shimshon fue giyado por su sensualidad. Portanto, el espanto provokado por su eroizmo fue tan grande, ke durante vente anyos ke segieron su muerte, los pilishtis no ozaron a atakar a los israelis.

. —————————————–

Gad Nassi