eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
Los Misterios de la Reyna de Shva
Todos los reyes del mundo entero se avian arekojido en el pranso del Rey Shelomo para ke pueden ver de serka komo era kapable de avlar kon los animales. En esto, el Rey Shelomo yamo a todos los animales, i estos pasaron en parada delantre de los invitados.
Kuando los pasharos estavan pasando, el Rey Shelomo remarko ke el upupo no estava prezente entre eyos. Ordeno a sus servidores de trayerlo, mismo si era nesesario de enkadenarlo. En efeto, lo toparon i lo trusheron delantre de’l. Kuando fue interojado sovre la razon de su abstensia, el upupo respondio:
Rev. Hurlbut ,1904.
«Mi Rey savio, ke es savio de todos los savios, no kale ke te ensanyes! Porke boli en los syelos, diyas i noches, para bushkar si egzistiya un payis ande su fama no avia parvenido, i para avizar a Su Eminensia.»
El upupo kontinuo:
«A la fin deskuvri un payis bastante lesho, ke es governado por una reyna, la Reyna de Shva se yama. Su payis es adornado de arvoles i guertas, arozados por rios ke salen del Paradiso. Esta yeno de oro i de plata, i sus moradores no son peleadores i tienen koronas sovre sus kavesas».
En oyendo a esto, el Rey Shelomo tomo al pasharo en sus manos i ordeno a sus sekretarios de redijir una letra a la Reyna de Shva:
«Del Rey Shelomo. Onores a ti, i a tus sujetos. Para ke konoskas ke el Dio me nomino en tanto ke el rey de todos los animales del universo, i de todos los reyes del mundo, ven i saludame. Te resevira kon grande onor, maz de lo ke resivo a los otros reyes…»
Despues ordeno de atar a esta letra a la ala del upupo, i la mando al payis de Shva para ke sea remetida a su Reyna. Kuando el pasharo avrio sus alas, empeso a kantar en bolando. Un munchidumbre de pasharos, tan muncho ke era imposible de kontarlos, se adjustaron a el. Djusto kuando estos arivaron ande la Reyna de Shva morava, el sol estava amanesiendo. En este momento i la Reyna avia salido de su kastilio para orasionar al sol. Portanto, achakes de estos pasharos ke estavan tapando los rayos del sol, los syelos se avian aleskurisido.
La Reyna, fue tanto mareyeda de esto ke se arazgo sus vistidos. En este momento, el upupo abasho de los syelos delantre de la Reyna, ke remarko a la letra atada a su ala. Tomo al pasharo i dezato la letra. Kuando meldo lo ke estava eskrito, su enkanto fue de tan grande ke se arazgo de muevo sus vistidos. En esto, yamo a todos los savios i aedadaos de su reynado, i les demando por el Rey Shelomo. Estos le respondieron ke nunka tenian oyido su nombre i no konosian su reynado.
La Reyna ke no fue kontente de esta repuesta, ordeno de enbiyar a sus naves a la mar para ke se kargen de tavla de roza i de djoyas kon piedras presiozas i ke se aparejen por un viaje largo. De mismo, ordeno de kargarlas de gameyos ke puederan transportar a esto todo, despues ke akostaran. Aparte de sus ministros i servidores, sesh mil ijikos i ijikas fueron nominados para akompanyarla en este viaje,
Entretiempo, la Reyna avia enbiado una repuesta a Shelomo, avizandole ke lo iva vijitar, ma, su viaje puedera turar muncho tiempo.
Despues de tres anyos la Reyna de Shva arivo a Yerushalayim kon su eskorto, trayendo kon eya munchas rikezas.
El Rey Shelomo la estava asperando en su palasio de vidro. A la reyna le avia paresido ke Shelomo se estava asentando en en el oriyo de la agua, i por esto alevanto su fusta para no mojarse. I kuando Shelomo vido sus pachas yenas de velo, le disho:
«Tu ermozura es komo la ermozura de una mujer. Portanto, tus velos son apropriados a un ombre. Velo en el puerpo de un ombre lo aze lindo, ma, no la aze linda a una mujer«.
La Reyna despues ke se lavo las pachas kon una mikstura espesiala ke el Rey Shelomo avia deskuvrida, remarko ke los kaveyos en riva de sus pachas se avian espajado. I le plazio a Shelomo.
Durante los sesh mezes del sejorno de la Reyna, eya i Shelomo kontinuaron a vijitarsen kadal diya, i a arodearsen en Yerushalayim. I pozaron entre eyos todo modo de kestiones, i toparon sus repuestas djustas.
La Reyna se avia enamorado de la saviduria de Shelomo i ansi se avia ekspresado a su puevlo:
«Un reynado i rikezas no pueden egzistir sin la saviduria. Yo vo segir los pasos de la saviduria, i eya me va protejar eternalmente. Va bushkar azilo ande eya, i eya sera mi poder i mi fuersa».
Es ke el Rey Shelomo i la Reyna de Shva fueron amantes? La Biblia no responde direktamente a esta kestion. Portante, eskrive ke la Reyna vino ande Shelomo. De mismo, eskrive ke Shelomo avia dado a la Reyna todo lo ke avia demandado i dezirado.
Mismo ke una leyenda rakonta ke Shelomo se avia kazado kon eya, i ke la Reyna se avia konvertido a la relijion de los Ebreos en abandonando la idolatria, los faktos istorikos provan ke eya se avia aboltado a su payis.
* * *
La vijita de la Reyna de Shva koresponde a la perioda durante lakuala el Rey Shelomo estava en la altor de su poder.
Despues ke la Reyna partyo, Shelomo se avia rendido kuento ke nunka no iva renkontrar a una mujer komo eya ke puedera konsiderarla en tanto ke su ekual.
En segito, Shelomo tomo munchas mujeres i munchas konkubines. Una grande parte de estas eran etranjeras, i lo atiraron a sus dios. Shelomo fraguo templos paganos por sus mujeres.
—————————————–
Gad Nassi
