Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

Las ijas de Tselofhad 

Antes de aresentarsen en la Tierra de Kanaan, los ebreos se avian arodeado durante doz jenerasiones en el dezierte. La primera jenerasion no avia obeisado al Dio. Pormo de esto no le fue permetido de entrar a la tierra de Kanaan. La sigunda avia obeisado al Dio i le fue permetido de entrar a Kanaan.

El Dio avia avlado a Moshe, i le avia disho ke kada famiya iva tener un kampo en Kanaan, i ke su dimansion sera asigun el numero de los miembros de kada famiya. Las famiyas grandes ivan resivir kampos mas grandes ke las famiyas chikas.

Moshe avia kontado sus miembros doz vezes. En primero, kuando se avian kedado al lado del Monte Sinay, i la segunda vez en las planedadas de Moab, antes de entrar al payis de Kanaan.

El segundo resansamiento avia relevado ke, aparte de Kalev i de Yoshua, todos los ke fueron kontados la primera vez ya se avian murido. Todos de estos avian pekado, i el Dio avia dicho ke solo Kalev i Yoshua seran permetidos de entrar a Kanaan.

Asigun el uzo, solo los ijos de un shefe de famiya eran otorizados de resivir kampos, porke solo kon eyos el nombre de sus padre puederia kontinuar a ser nombrado.

Entre los ebreos se topavan los heferites, ke eran los desendientes de Hefer. El ijo de Hefer era Tselofhad. Tselofhad no tuvo ijos. Tuvo 5 ijas, ke se yamavan Mahla, Noa, Hogla, Milka i Tirtza.

Kuando los Ebreos se estavan aprontando a partajarsen la tierra de Kanaan, las ijas de Tselofhad se prezentaron delantre de Moshe en la entradadeltabernaklo, i delantre de Elazar el pretro grande i los nombradosdelpuevlo, i se adresaron a Moshe:

«Deke el nombre de muestro padre deve despareserse solo porke no tuvo ijos? Damos i a mozotros un pedaso de la  tierra destinada a sus ermanos.

En esto, Moshe demando al Dio lo ke kalia azer. I, el Dio le respondio:

«Las ijas de Tselofhad tienen razon. Siguro ke kale darles una parte de la erensia de los ermanos de sus padre, i kale ke resiven la erensia de sus padre.»

I, el Dio avia desidado las leyes de erensia. Si una persona no tiene ijos, su tierra sera dada a su ija. Si no tiene ni ijos i no ijas, su tierra sera dada a sus ermanos. I, si no tiene ermanos, su tierra sera dada a la famiya de su padre. En kavzo ke su padre no tendra dinguna famiya, esta tierra sera dada al pariente el mas serkano.

En esto, Moshe ordeno a las ijas de Tselofhad de kazarsen solo kon los miembros de la famiya de sus padre, para ke esta erensia keda en sus trivo.

I, ansi izieron Mahla, Tirtza, Hogla, Milka i Noa, las ijas de Tselofhad. Se kazaron kon los ijos de los ermanos de sus padre, ke eran los ijos de Menashe, ijo de Yosef.

La leyenda rakonta ke mizmo la maz manseva de las ijas de Tselofhad avia asperado fina la edad de 40 anyos, para pueder kazarse kon un marido apropriado. La leyenda rakonta de mizmo, ke eyas eran savias, estudiavan la Tora i eran djustas. I ke eran iguales en todas estas virtudas i ke por esto, sus

nombres no aparesen en la Tora syempre en el mizmo orden.

————————————————————————————————————

Gad Nassi