eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
La Piadad del Kastigo
Yeroboam fue el primer Rey de Israel, el estado del Norte, fondado en 928 AE. Yeroboam kijo de toda manera mentener la kontinuasion de la independensia de Israel. De otra parte, la relijion bazada en la kreyensiya en Dio en uzo en Yerushalayim, kapitala del estado del Sude, puedia atirar a sus sujetos i de este modo provokar la union de los dos estados, i meter fin a Israel.
Entonses, se avia desidado de kreer en su estado, su propria relijion. Kon este buto, alevanto un ternero de oro en los sanktuarios de Dan i de BetEl. Troko las datas de los ayunos. Los pretros fueron eskojidos no solo de la Kaza de Aaron, ma i de otras famiyas. Metyo guardes en las frontieras para empidir la djente de vijitar Yerushalayim i de orasionar ayi, i ordeno de egzekutir a los ke transgreseran a este orden.
La Biblia rakonta ke un diya, un ombre del Dio arivo de Yuda al sanktuario de BetEl, i avlo a Yeroboam kuando estava ofrisiendo el insenso i lo akavido ke todos los pretros ke lo segien seran masakrados, i adjusto:
«Este altar se va dezpedasar i toda su siniza se vazyara i se dispersera«.
Kuando Yeroboam oyo a esto, alevanto su braso, i grito en apuntandolo:
«Aferaldolo!”
En este momento, su braso se enrezesio i se le tomo, i no pudo meneyarlo. En mizmo tiempo, i el altar se dezpedaso i su siniza se vazyo i se disperso. De este modo, la palavra del Dio se avia realizado.
Yeroboam demando del ombre del Dio:
«Te rogo de orasionar al Dio para ke mi braso se libera«.
El ombre orasiono, i el braso de Yeroboam se libero.
En segito, Yeroboam lo invito a vinir a su kaza para komer i bever, i darle un regalo.
El ombre le respondio:
«Mizmo si me daras la meatad de tu bien, no komere ni pan i no bevere ni agua en este lugar, porke el Dio me lo enkomendo. I, me enkomendo de no aboltar por el mizmo kamino ke vine«.
I, se abolto de BetEl por un otro kamino.
Un viejo profeto ke bivia en BetEl fue metido al koriente de todo lo ke se avia pasado. Demando de sus ijos:
«Por ke kamino se abolto?»
I, kuando le amostraron el kamino les disho:
«Apareja mi azno«.
Se metyo al kamino detras del ombre. I, kuando lo topo repozandose debasho de un arvole, le disho:
«Si soz la persoa ke vino de Yuda, ven ande mi para komer un pedaso de pan«.
El ombre respondio:
«El Dio me enkomendo de no komer i de no bever en este lugar. I, de no aboltar por el mizmo kamino ke vini«.
«I, yo so un profeto del Dio,» le disho el viejo. «Un andjelo del Dio me demando de trayerte atras para ke puedes komer i bever«.
En esto, la persona de Yuda se kreyo en estas palavras, i se hue a su kaza para komer i bever kon el.
Kuando los dos estavan asentados en la meza, ensupito la boz del Dio vino al viejo, i echo un grito a su usped:
«Achakes ke no te submetites al orden del Dio, de no komer i de no bever en este lugar, tu puerpo no repozara en la tomba de tus avuelos«.
En segito, kuando el ombre del Dio se metyo de muevo en su kamino suvido a su azno, aparesio un leon i lo mato. Su puerpo kedo espandido en el kamino, i el leon i el azno se kedaron a su lado. I, esto se izo saver al profeto viejo.
«Este es la persona ke no se submetyo al orden del Dio,» deklaro. «I, el Dio lo delivro al leon«.
Despues se suvio a su azno, ayego ande el puerpo estava espandido. Vido ke el leon no lo avia komido, i no lo avia mizmo modrido.
Metyo el puerpo sovre su azno, i lo trusho a su sivdad. Lo enterro en el mizmo lugar ke se avia aparejado para si, en yorando:
«Ke desgrasia, mi ermano! » I, despues disho a sus ijos:
«Kuando me murire, me enterrerash allado del ombre del Dio. Porke, asigun ke lo predigo, el sanktuario en BetEl i todos los sanktuarios en Israel
dispareseran«.
* * *
Kuando, Israel se avia desidado de aparterse de Yuda, Rehoboam, el rey de Yuda, mando a Adoram a Israel para konvenserlo de no apartarse. Ma, Adoram topo la muerte en las manos del puevlo de Israel ke lo lapido. Sovre esto, Rehoboam arekojo una armada de diziocho mil de soldados eskojidos de los trivos de Yuda i de Binyamin, para kombatir kontra Israel.
Ma, la palavra del Dio vino a Shemaya:
«Dize a Rehoboam, el ijo de Shelomo i el Rey de la Kaza de Yuda i de la Kaza de Binyamin, de no salir a esta gerra. Ansi dize el Dio. No kombatiras kontra tus ermanos. Abolta a kada persona a su kaza, porke a esto yo lo esto ordenando«.
I, Rehoboam sintyo a la palavra del Dio, i no salio a la gerra.
Mas tadre Yeroboam fue akavidado por un profeto verdadero del Dio, viniendo de Yuda. Ma, este profeto fue la viktima de su kredulidad, en seando enganiado por una mintira, i entonses, fue kastigado.
El fakto ke no fue despedasado por el leon, es eksplikado por la piadad del Dio por su buena voluntad i su devosion.
El ombre de BetEl avia regretado de aver enganiado a un profeto verdadero. I, probablamente es achakes de su regreto, ke demando de ser enterrado allado de el.
—————————————–
Gad Nassi
