Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

La Leyenda del Kulevro de Kovre

La kreyensa en el poder majiko del kulevro, aze parte de la erensia esprituala de munchas kulturas, komo akea del Ayifto i de la Mezopotamia. De maz, el kulevro entanto ke el manadero de la kurasion de una malatia, egzistio en el payis de Kanaan, i en otras relijiones arkaikas.
El poder majiko del kulevro es tambien relatado en la Biblia. Despues de la muerte de Aaron, kuando Israel estava errando en el dezierto, el payis de Edom estava tapando el akseso verso Kanaan. Entonses, Moshe mando mesajeros al Rey de Edom, para demandar su akordo para traversar este payis.

Portanto, el Rey de Adom no solo no permetio a Israel de pasar por su payis, ma, i lo amenaso de mandar su armada para kombatirlo. Esto provoko una grande deskontentes en Israel, ke se deskorajo, i komo lo avia echo antes, empeso a kesharse kontra el Dio.
Entonses, el Dio para kastigar a Israel, le mando un mabul de andjelos en forma de kulevros venimozos ke mataron a munchos en modriendolos. En esto, kayo un espanto grande en Israel, ke konfeso su pekado de averse revoltado kontra Dio.
El puevlo demando de Moshe, de orasionar por eyos, para ke el Dio alesha a estos oribles kulevros. I kuando Moshe orasiono, el Dio le disho de azer un kulevro en la forma de uno de estos kulevros, i de lo meter sovre un palo, i le prometio de kurar a kada uno ke era modrido, despues ke iva mirar a este kulevro.
Moshe izo un kulevro de kovre, i kada uno ke lo miro fue kurado del modrisko.

De otra parte, el segundo Livro de los Reyes eskrive ke el Kulevro de Kovre, se troko en un obyekto de adorasion, fin’a ke el Rey Hezkiyau, en la fin del siglo VIII AE, lo destruyo en pedasos, kon los otros obyektos de paganismo ke estavan en el Templo:
«… i rompio en pedasos el Kulevro de Kovre ke Moshe avia echo: porke los ijos de Israel uzaron fin’a estos diyas de kemar el insenso en el…»
En las relijiones monoteistas, achakes el egzemplo de su komporto en el enganio de Hava, el kulevro reprezanta la traision. Es posible ke el imajen del kulevro fue de mizmo, un obyekto de kulto, uzado en Kanaan, por la kurasion de su modrisko. De otra parte, en el pensamiento de las sektas gnostikas, ke se developaron mas tadre, el kulevro reprezanto la personifikasion de la saviduria.
Aun ke la reljion djudia repudiava la ichizeria, uzos de la majia fueron integrados al Djudaismo, sin ke sean konsiderados komo aktos de ichizeria, , asigun lo prove la estoria del Kulevro de Kovre.

————————————————————————————————————

Gad Nassi