La rubrika de Gad Nassi – Estorias de los tiempos biblikos: La Konkubina Despedasada

Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

La Konkubina Despedasada

Afito ke la konkubina de un Levit se avia fuyido a la kaza de su padre. En esto, su marido se hue para trayerla atras a su kaza. Fue resivido de una manera kaloroza, i aunke el padre de la konkubina insistio para ke kontinuan a kedarsen en su kaza, el Levit se desidio de aboltarse kon la mujer a su kaza.

Se alevanto a la madrugada i se metyeron en kamino, el, la konkubina, su servante i sus dos aznos. Kuando arivaron serka de Yerushalayim, ke akel tiempo se yamava Jebus, sintieron la nesesitad de repozarsan porke avia empesado a eskurisir, eran bastante kargados i kansados.

En esto, su servidor le disho:
«Ven entraremos a esta sivdad i mos kedaremos ayi la noche».

En akeos tiempos, aunke la sivdad de los Jebusitos era basho la dominasion de los Binyaminitos, una partida de los Jebusitos moravan ainda ayi. No teniendo konfiensa en los Jebusitos, el Levit prefero de pasar la noche en Gibea, ande moravan los Binyaminites.

Kuando arivaron a Gibea, se aretaron en la plasa de la sivdad. Portanto, dinguno no se ofrisio para resivirlos a su kaza. Despues ke sea avian kedado ayi un sierto de tiempo, un ombre aedado ke estava aboltando de su lavoro en los kampos, los apersivio i se aserko de eyos:
«De ande sosh, i ande vos estash indo?»

«Mos estamos indo a Betlehem, a mi kaza. Dinguno no mos ofresio a resivirmos. Tenemos bastante paja para muestros aznos i bastante pan i vino para mozotros, para mi, la mujer i el mansevo ke esta kon mozotros. »

El aedado respondio:
«Paz por vozotros. Yo va tener kargo de todo lo ke tenerash de menester. Solo, no pasesh la noche en la plasa».

Los yevo a su kaza, dyo a komer i a bever a los aznos. I eyos se lavaron sus pyezes, komieron i bevieron. Kuando ya se estavan repozando i avlando entre eyos, una djentorya salvaja enserklo la kaza i empeso a aharvar i a sakudir su puerta i a gritar a su balabay:

«Trayemos a esta persona ke vino a tu kaza, porke mos keremos gozar d’el».

El balabay salio ahuera, i les disho:
«No, mis ermanos, no vos komportesh de esta manera malisioza. Este ombre es mi usped, no le agash esta desgrasya. Aki, mi ija muchacha i su konkubina. Vo las puedo trayer, las puederas violar i azer kon eyas todo lo ke keresh. A este ombre no lo tokesh».

I, viendo ke la djentorya no estava pronta a oyirlo, el Levit afero a su konkubina i la delivro a eyos. Toda esta djente la violaron, se gozaron de eya toda la noche entera i a la fin la desharon partir.

Eya arivo kon sus ultimas fuersas fin’a la entrada de la kaza ande kayo i se espandio. Kuando avia amanesido, su marido la topo ayi, le avlo, ma, eya no le respondio. La metyo enriva de su azno i tomo el kamino para Betlehem.

Kuando arivo a su kaza, tomo un kuchiyo i despedaso el puerpo de la mujer en dodge pedasos, i a estos pedasos los enbiyo a los trivos de Israel, para azer saver la bashedad i la kruelidad de lo ke fue kometido.
En repuesta a esta atrosidad, los trivos se asemblaron en Mitzpa. Demandaron al Levito de ke manera este akto avia akontesido, i el Levito respondio:
«Arivi a Gibea ke apartiene a Binyamin, para pasar la noche ayi kon mi konkubina. Los fuertes de la sivdad se revoltaron kontra mi, i enserklaron la kaza para matarme. I violaron a mi konkubina fin’a ke kayo muerta. En esto, tomi a mi konkubina i la despedasi. Enbiyi a sus pedasos a todas las partes del teritorio de Israel, porke avian kometido un tal utraje».

Viendo ke dinguna persona de la sivdad Gibea no avia partisipado a esta reunion, los onze trivos de Israel se desidaron entre eyos de no kazar maz a dinguna de sus ijas kon los Binyaminites. De maz, solisitaron del tributo de Binyamin de delivrarles a los kulpantes para egzekutirlos i de este modo purifiar de esta bashedad el puevlo de Israel.

Los Binyaminites aviendo refuzado de konformarsen a esta demanda, los trivos arekojeron dodje mil soldados i los atakaron. Aparte de los sejesyentos de sus ombres ke se avian salvado, todos los Binyaminites inkluendo mujeres i ombres fueron masakrados. Portanto, fueron eparniadas la vida de kuatro syenes de sus muchachas ke no avian ainda konosido ombres.

Esta gerra, ke tenia por buto de desimar el trivo de Binyamin, se avia terminado kon una viktoria. Portanto, en el silensio ke avia segido a esta viktoria, Israel se avia horifiado de konstatar ke uno de sus trivos estava para despareser, i regretando esta suerte, se desidaron de empidirla.

La redampsyon de los Binyaminites nesesitava en este kavzo de abasteser las dozientas muchachas ke les mankava. Seando ke avian djurado de no dar a sus ijas a los Binyaminites, el puevlo de Israel bushko un kompromiso. Propozaron a los Binyaminites de arevatar a las muchachas de Shilo en sus bayles prenupsiales del anyo.

Entonses, mandaron a los dozientos Benyaminites solteros para ke se eskonden durante los bayles i para ke kada uno de eyos se arevata a una de estas muchachas. I, grasias a esta stratejia, el trivo Binyamin pudo enreziarse i garantizar su projenitura.

* * *

La Biblia rakonta ke porke no egzistia ainda un Rey en Israel, en akeos tiempos kuando esto todo avia afitado, el dezorden renyava en el payis.

De otra parte esta estoria, ke se asemeja a la estoria de Lot, reflekta de mizmo el lugar segundario de la mujer en la ierarkia sosiala en akeos tiempos.

Kuanto a Binyamin, su padre Yakov se avia adresado a el en su kama de la muerte en Ayifto, kon estas palavras:
«Soz un luvo predator ke devora su proya en la demaniana i partaja su butino durante la noche».
De los Binyaminitos iva naser Shaul, ke sera el primer Rey de Israel.

—————————————–

Gad Nassi