eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
La Devosyon de Ritzpa
Verso la fin del reyno de David avia esbrochado una perioda de ambre de tres anyos. Kuando David demando del Dio la razon de esto, le fue respondido ke el ambre avia afitado achakes de la sangre de los Giveonites ke Shaul avia vazyado.
En esto, David yamo a los Giveonites i les disho:
«Kualo kale ke aga para vozotros para reparar los pekados, i ke rengrasiesh al Dio?»
«No keremos ni plata i ni oro de Shaul, i de su desendensya, i no keremos ke mates por mozotros a dinguno del puevlo de Israel,» le respondieron.
David les disho:
«Todo lo ke demandarash, lo azere«.
Le respondieron:
«La persona ke mos konsumo, i ke instrumento ke seamos destruidos de toda parte de Israel. Keremos ke mos delivres syete de sus ijos, i mozotros los enforkaremos delantre del Dio en el Monte Shaul«.
David aksepto a esta demanda i delivro a Armoni i Mefiboshet, los ijos de Shaul de su konkubina Ritzpa, i a los sinko ijos de Merav, la ija de Shaul.
Los Giveonites los enforkaron a todos los syetes en de una en una kolina delantre del Dio i los desharon ayi. Esto afito en los primeros diyas de la rekolta de la sevada.
Ritzpa kuvijo a los kadavres kon la ropa de dolyo i durante sinko mezes fin’a ke la sezon de las luvias ariva, los protejo de los pasharos en el ayre durante el diya i de los animales salvajes durante la noche.
Kuando el Rey David lo supo a esto, tomo los guesos del Rey Shaul i de su ijo Yonatan del payis YabeshGilad, los arekojo kon akeyos ke los Giveonites avian enforkado, i los enterro en la tomba del padre de Shaul, en el payis de Binyamin.
De este modo, el Dio se avia kalmado i el ambre se avia terminado.
* * *
Ritzpa fue una konkubina del Rey Shaul, i de este atadijo le avia nasido los dos ijos ke fueron egzekutidos. Despues de la muerte de Shaul, Ritzpa se avia retirado al palasyo de Ishboshet, el ijo de Shaul. Avner, el komandante en kapo de la armada de Ishboshet se avia atado a eya. Esto ensanyo a Ishboshet, i reprimandado a Avner por aver transgresado la prohibision de kazarse kon la mujer de un rey. Avner endinyado de esto avia, en segito, avia tomado la parte de David en su lucha por el trono kontra Ishboshet.
Shaul se avia abstenido de espandir su teritoryo ahuera del teritorio ande los Djudyos bivian i, aparte de los Giveonites, ke prezentavan un perikolo para la unitad etnika de su puevlo, no avia atakado a la populasion non-djudiya biviendo en este teritorio.
Ainda en la perioda de la konkesta del payis de Kanaan, antes kuaji tres siglos, los Israelis se avian engajado en djurando al nombre del Dio, de no atakar a los Giveonites. Achakes de este pakto, el kondukto de Shaul verso los Giveonites, fue konsiderado en tanto ke una traision a este promeso. El ambre ke avia esbrochado fue konsiderado en tanto ke el kastigo del Dio achakes del kondukto de Shaul i los desendientes de Shaul fueron delivrados a los Giveonites para amendar el sakrilejio kometido por Shaul.
En tanto ke una konkubina, Ritzpa no tenia dingun poder de intervenir en desiziones krusiales. Kon la muerte de sus ijos, Ritzpa devino una bivda sin kreaturas, lo ke arebasho maz su poder i la rendio maz vulnerable. Portanto, eya ovro kon koraje i devosyon en los limitos de su poder en protejando los restos de la projenitura de Shaul.
El Rey David fue profundamente afektado de este akto, i ordeno de arekojar a los puerpos de los egzekutidos kon akeos de Shaul i de su ijo Yonatan para ke sean enterrados en dinyitad asigun ke la Ley demanda.
Ritzpa reprezenta akeas personas sin poder, ma ke ovran en silensyo kon
devosyon i koraje para inchir sus dover.
—————————————–
Gad Nassi
