eSefarad Noticias del Mundo Sefaradi
La Destruksyon de Babel
El Profeto Daniel era desendiente de la Kaza de David. Asigun la leyenda, no egzistia otruna persona en el mundo komo el en la saviduria, i ke el Dio le avia mizmo revelado la data de la Fin de los Diyas. Daniel era en mizmo tiempo un eksperto en la interpretasion de los shuenyos, i Nabukadnezar, el Rey de Babel, ke avia deportado a los djudios, tenia grande konfiensa en el.
Aunke todos los perikolos en el korte de Babel, Daniel se komportava kon grande piedad relijioza. Refuzava de uzar el vino i el azyete de los goyim. Una vez, lo avian mizmo echado a un nido de leon, porke orasionava asigun el uzo de Israel. Ma, los leones no lo avian tokado.
John Martin, 1826
Nabonidus, el Rey de Babel, antes de retirarse al Oaziso de Tayma para dedikarse a orasionar a Sin, el dio de la luna, avia nomado a su ijo Belshazar komo el ko-rejente del payiz. Mas despues, Nabonidus abolto a Babel i komando a su armada en la gerra kontra los Persanos en el Norte, ke se estavan aparejando a atakar a Babel. Entonses, Belshazar se avia kargado de defender Babilon, la kapitala de Babel.
La Biblia deskrive un banketo majestuozo ke Belshazar avia organizado. Miles de nobles fueron invitados a esta fiesta, kon loskualos el Rey avia konsumado vino. Kuando todos se avian enborrachado, Belshazar ordeno de traer los objektos en oro i en plato del Bet Amikdash, ke su avuelo Nabukadnezar avia uzurpado, para ke sus uspedes, kon sus mujeres i sus konkubinas pueden uzar de sus kupas par bever vino. Despues, esta toda djente empeso a bendizir los dios paganes en oro, en plato, en fierro, en tavla i en piedra.
En este momento, aparesio una mano eskriviendo biervos misteriozos en la pared de la sala del palasio. Estos biervos: mene mene tekel upharsin, ke sinyifikavan unidades de mezura i ke en sus forma de verbo sinyifikavan «kontados, kontados, pezados, divizados» no puedieron ser interpretados de dinguna manera.
Entonses, Daniel ke fue konvokado para deshifrar este mesaje, se eksprimo ansi:
«El Dio eskapo de numerotar tu reynado. Fuites pezado i toparon ke mankas. Tu reynado esta divizado i sera dado a los Medes i a los Persanos. »
Sovre esto, Belshazar se avia alborotado i kreniando ke un adjente degizado del enemigo puederia matarlo, ordeno a los guardianos de la puerta del palasio de kortar la kavesa de kada uno ke iva mirar de entrar al palasio, mizmo si iva pretender ke es el Rey.
Belshazar, epuvantado de esta prediksyon salio en eskondiendose del palasio por una sortida sekreta. Kuando se abolto al palasio, los guardianos no le permetieron de entrar. I, kuando insisto ke es el Rey, los guardianos se konformaron a su orden, i tomaron un kandelabre pezgado i aharvaron a su kavesa fina ke la ahajaron.
Entretiempo los soldados del enemigo avian kampado al lado de Babilon. Una partida de eyos reusheron a kavakar en sekreto un kanal para deviar de su lecho el rio ke estava pasando ahuera de la sivdad. Kuando la fiesta de Belshazar se avia terminado, de mizmo los soldados avian terminado este proyekto. De este modo, pudieron traversar el lecho del rio ke se avia sekado i konkestar a Babilon.
La istoria nota ke i la armada de Nabonidus, el padre de Belshazar, se avia rendido a Kurus, el Rey de Persia, el diya de 10 de Oktobre, 539 AE, i ke dos diyas despues, el diya de 12 de Oktobre, 539 AE, Babilon avia kayido.
* * *
Belshazar es rekodrado pur su opresion tiranika de la populasion djudia de su reynado. El pranso ke avia organizado se avia trokado en una orjia, ande fueron blasfemados los objektos i las kupas en oro i en plato del Bet Amikdash.
Gustave Doré, 1832-1883
Esto fue la razon de l’aparision de una eskrituria divina en la pared, anonsando la muerte violente del rey i la destruksyon del imperio de Babel.
Dos ekspresiones en Ebreo paresen tener sus manadero en este evenemento. «Esta eskrito en la pared» – katuv al hakir – eufemismo por un dezastro ke es evidente; i, «tus diyas son kontados» – yameyha sfurim – eufemismo por la fin serka del poder de una persona.
Daniel avia mas tadre konvensido al rey persano Kurus, ke aviya konkistado a Babel, de retornar a los egzilados a la Tierra Santa i de permeterles de fraguar de muevo el Bet Amikdash en Yerushalayim.
No se save si Daniel, el mizmo se avia aboltado kon los egzilados, o, avia demandado de Kurus, de kargar a Zerubabel por esta mision. Siertas versiones de la Biblia rakontan ke se avia retirado a Shushan, kontinuando a bivir ayi una vida de piedad i ke fue enterado aya. El Talmud mensiona una sinagoga a su nombre, a tres miles de leshor de la sivdad de Barnish.
—————————————–
Gad Nassi
————————————————————————————————————————————————–
Nacido en Estambul, Gad Nassi se graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
