Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

La Bendision de Bileam 

Despues de la muerte de Miryam i Aaron, los israelis arivaron al lado del payis de Moab, i se kedaron en la oriya oryantala del Yarden. Kuando demandaron de pasar a su oriya oksidentala, Balak, Rey de Moab, se avia muncho supsonado de eyos.

Se penso de si parasi:

«Siguro ke estos  se estan aparejando a atakar mi payis, i a invaisarlo«.

Entonses, mando sus emisarios a Bileam, ke era un profeto i un ichizero, para ke enkoraje a sus soldados i ke maldiga al enemigo – asigun el uzo en akeos tyempos, de uzar de los profetos i ichizeros.

Los emisarios arivaron ande Bileam, i le demandaron:

«El Rey Balak demanda ke vengas ande el i ke maldizes a los israelis, para ke sean arondjados del payis«.

Bileam les respondio:

«Kedavosh la noche aki, i a la demaniana vos va dar la repuesta«.

La noche Bileam se sonyo ke el Dio se adreso a el i le disho:

«No te vaygas kon eyos, i no maldizes a Israel…»

A la demaniana, se alevanto Bileam, i disho a los emisarios:

Retornavosh a vuestro payis, porke no puedera vinir kon vozotros i no puedera maldizir a los israelis«.

Kuando arivo la repuesta de Bileam, Balak el Rey de Moab, penso en su korason:

«Puedeser ke Bileam se vekso porke los emisarios no eran bastante de alto rango? O puedeser ke el kere resivir regalos?»

Enbiyo esta vez, emisarios eskojidos entre los ministros del palasio, i le prometio de muncha moneda, kon munchos regalos valutozos.

Bileam respondio a estos ministros:

«No puedera vinir kon vozotros. El Dio no me permete de maldizir a su puevlo. Portanto, kedavosh aki esta noche, i a la demaniana vos dare mi repusta «.

La mizma noche se sonyo ke el Dio le disho:

«Vate kon los emisarios, i avlaras solo kuando Yo te dira.»

A la demaniana se alevanto Bileam, metyo el semer a su azno, i salio en kamino kon los ministros del Rey.

Suvido a su azno i kaminando porMoab, en supito el azno vido en frente de si a un malah kon su espada travada, tapandole el kamino.

I kualo izo el azno? Miro de evitar al malah i deviodelkamino.

Bileam ke no vido al malah, se ensanyo muncho kontra su azno. No entendyo deke el azno avia salidodelkamino, i empeso a aharvarlo.

El azno se vekso i se asento en basho. Bileam ke se arezvalo i se kayo del azno se ensanyo mas muncho i kontinuo a aharvarlo.

El Dio ke se apiado del povereto del azno, le dezazo su boka i el azno enpeso a avlar:

«Deke me aharvas? No estas viendo ke el malah mos esta tapando el kamino?»

Kuando oyo a estas palavras, a Bileam se le avriyo los ojos. Vido al malah i se aboko delantredel.

En esto, el malah libero el kamino i le disho:

«Puedes kontinuar tu kamino kon los emisarios. Ma, save ke deveras kitaras de tu boka solo las palavras ke el Dio te enkomendera«.

Bileam, enriva de su azno, kontinuo en su kamino, i detras del los emisarios de Balak, el Rey de Moab.

Kuando se aserkaron de Moab, Balak salio a sus kamino para resivirlos, i su korason estava yeno de alegria.

«Ya arivo la persona ke va maldizir a Israel i ke los va arondjar,» se penso de si para si.

Organizo una festividad grande al onor de Bileam, i invito a todos sus ministros los mas importantes.

A la amaniana kuando se suvio Bileam al tepe de una montania alta, todos  se estavan emosionando en asperando oyir lo ke iva aklamar.

Bileam miro al kampamiento de los Israelis. Apersivio la punta del kampamiento de leshos, i disho:

«Komo puedo maldizir a un puevlo ke el Dio no esta pronto ke lo maldizen? Este puevlo es fuerte i protejado por El. Solo, bendizirlo es lo ke puedo.”

Bileam bendizo a los djudyos i disho a Balak:

«No puedere trokar lo ke dize la boka del DioI«.

Disho Balak a Bileam:

«Iremos a un otro lugar, i  de ayi puederas maldizir a Israel«.

Se suvyeron al tepe de una otra montanya. De ayi vido Bileam el kampamiento entero de los israelis, formado de trivos, i  se aklamo:

Kulo puedeser mijor de tus tyendas Yaakov i de tus kazas Israel!« Kontinuo a alavar, a egzaltar i a bendizir al puevlo deIsrael, i despues partyo a su kaza.

Balak, la kavesa abokada i averguensandose, partyo i el a su kaza.

————————————————————————————————————

Gad Nassi