eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
La Aliansa de Oshea
Despues de la muerte del Rey Shelomo en 931 AE, el Estado Ebreo se aparto en doz estados: akeo del Norte, konosido en tanto ke Israel, i akeo del Sude, konosido en tanto ke Yuda.
En el dererecho, Gomer.
Fransia, 1275-1300.
Oshea es akodrado en tanto ke un profeto del payis del Norte. Bivyo en la fin i en segito del reyno de Yeroboam II. Despues de la muerte de Yeroboam en 750 AE, su ijo Zaharya pudo governar solo sej mezes i fue asasinado por Shallum. Shallum a su torno fue asasinado un mez despues i fue remplasado por Menahem, ke reyno durante diez anyos. Un kurto tyempo despues de su muerte, el Reynado Israel fue derokado por la Asiriya en el anyo 722 AE. Durante toda esta perioda, Oshea interpreto el dezastro ke iva akonteser, en tanto ke el kastigo del Dio, achakes de la violasion de la Ley Divina.
Asigun el Livro de Oshea, el Dio ordena a Oshea de kazarse kon una mujer ke tiene un amante:
«Tomala a esta mujer para tener de eya kreaturas non lejitimas. Porke el payis no aze maz ke kometer el adultario en aboltandose del Dio«.
Oshea se kaza kon una putana. Esto es rekonosido en tanto ke un akto semboliko reprezentando la Aliansa del Dio kon el puevlo de Israel.
La mujer de Oshea se yama Gomer. Les nase en primero un ijo ke se yama Yizrael. Yizrael es en mizmo tyempo el nombre de una valeya en el Norte del payis de Israel, ande fue vazyado muncho sangre.
En segito, les nase una ija. Es yamado Lo-Ruhama, ke signifika «sin piadad». Esto es interpretado ke el Dio ainda se apiada del Reynado del Sude, ma no se apiadara mas del Reynado del Norte achakes de sus pekados, i ke su destruksion es iminante.
Despues les nase un otro ijo. Es yamado Lo-Ami, ke signifika «no de mi puevlo». Esto es interpretado ke el Reyno del Norte, no sera mas konosido en tanto ke el puevlo del Dio. Portanto, es profetizado ke en segito, el Dio se apiadara de Israel.
Matthaeus Merian the Elder, 1625-30.
La leyenda kontinua en deskriviendo el divorso de Oshea i de Gomer, achakes de la infidelitad de Gomer. Es muy posivle ke este divorso aviya enkontesido en realitad, ma esto es konsiderado en tanto ke un akto simboliko eksprimiendo el abandono por Dio del Reynado del Norte. Portanto, es sulinyado, ke en uno de los diyas, la aliansa entre Israel i el Dio se renovera, i ke el Dio se unira de muevo a su Puevlo.
Mas despues, kon el orden del Dio, Oshea se mete a bushkar de muevo a Gomer. Gomer bive kon un otro ombre. No se save si Gomer se vendio en tanto ke una esklava o bive kon su amante. Portanto, Oshea deve merkarla para tomarla atras. La yeva a su kaza, ma se detiene de tener atadijos kon eya. Esto es interpretado en tanto ke Israel kedara sin rey por munchos anyos, ma el Dio akseptara de muevo a su puevlo.
* * *
El metaforo del kazamiento en tanto ke el atadijo entre Dio i Israel es uzado por la primera vez por Oshea. Portanto, el konsepto de la union de un profeto kon una putana es tan problematiko ke durante siglos enteros munchos komentadores no supieron de ke modo eksplikarlo. Rambam interpreta el atadijo entre Oshea i su mujer en tanto ke una vizion i no en tanto ke un fakto. Otros pensan ke kale akseptar a esto literalmente i no en tanto ke un metaforo.
Lo ke es seguro es ke durante la epoka de Oshea, el Reynado de Israel se aviya aleshado del Ley del Dio, en adorando a otros dios, i prinsipalmente al dio de fertilitad kanaanito Baal. La prostitusion sakra i la idolatria eran de uzo en los sanktuarios.
Oshea, de mizmo ke los otros profetos de su epoka, deklara ke sin el repentimiento de estos pekados, la nasion djudiya sera destruyida i tomada en kaptividad. En fakto, Samarya el kapital del Reynado del Norte fue devastado por Ashur, i el puevlo de Israel fue deportado.
El livro de Oshea introduiza la profetizasion del retorno de Israel del egzilo, i la restorasion de su patria. De mizmo ke la fidelitad de Israel enverso
el Dio, i de su akseptasion por El en tanto ke su Puevlo.
—————————————–
Gad Nassi
