eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
JEZABEL, La reyna pagana de Israel
Jezabel era kazada kon Ahav, Rey de Israel, el estado del Norte de los ebreos. Fue la madre de dos Reyes de Israel, ke suksedaron a Ahav: Ahazia i Yoram. Seando la ija del Rey de Sidon, su kazamiento avia favorizado una aliansa entre el Estado de Israel kon el Estado fenisiano Tzur. Grasias a esta aliansa, los atadijos komersiales i espirituales entre estos dos payizes se avian desvelopado en kontribuendo a sus enrikisamiento resiproko.
Ahav, fue rey durante 22 anyos, entre 874 i 852 AE. Su reyno es markado de mismo por el desvelopamiento de los atadijos kon Yuda, el Estado Ebreo del Sude. Ahav avia kazado su ija – asigun siertas fuentes, su ermana ? Atalia, kon Yoram, el Rey de Yuda. Kon esta tripla aliansa deTzur, Israel i Yuda, se formaron kaminos de komersio entre la Anatolia, en el Norte i Ayifto kon la Peninsula Araba, en el Sude, i Israel kontinuo a prosperar.
De otra parte, Jezabel avia establisido en Israel, el kulto del dio fenisiano Baal i de su konsorte Ashera, i avia fraguado un templo pagano en la kapitala, Samariya. En el Monte Karmel, en el bodre entre Israel i Fenisia, fue erijido un altar imenso a Baal. Unos 450 pretros de Baal i unos otros 400 de Ashera gozaron de la proteksyon reala i eran los uspedes de Jezabel en su meza.
Ahav, ke era atado a las tradisiones djudias, no fue un adepto ardiente del paganismo. Portanto, avia akordado a Jezabel, una libertad de aksion sin limito. Jezabel avia influensado el komportamiento de su marido, i tuvo una parte importante en el rejimiento del payis.
El konflikto kon Eliyau Anavi
Durante el reyno de Ahav, una sekura muy grava avia akablado el payis, en provokando un ambre terible. En esto, Eliau Anavi ke se avia revoltado kontra el paganismo, konsiderandolo komo la razon de la sekura, se adreso al puevlo:
«… Ke sus profetos aparejan un altar de sakrifisio por Baal; i mozotros un altar por Dio. Meteremos el fuego, i ke eyos dan lores a sus dio, i yo dare lores a muestro Dio. El dio ke respondera kon fuego, es el Dio verdadero.»
I, todo el puevlo respondio:
«Muy bien dicho!»
Entonses, 450 profetos de Baal, kon 400 de Ashera, se arekojeron en el Monte Karmel, i ensupito, el fuego del Dio abasho del syelo, en konsumando el sakrifisio, el lenyo, las piedras i la tierra. Kuando el puevlo vido a esto, se echo en basho sovre sus facha i grito:
«El es el Dio! El es el Dio!»
Kon el orden de Eliau, el puevlo atako a los profetos paganos, i los mato. Despues de este evenimiento, una luvya grande kayo de los nuves, en metiendo fin a la sekura.
Nabot i la trajedia
Nabot era el ptoprietaryo de una vinya, allado del palasio de Ahav. Ahav se avia adresado a Nabot:
«Dame tu vinya, para ke tenga una guerta de vedruras, porke es allado de mi palasio.» I, le prometio de darle mismo una vinya, muncha mas valutosa.
Nabot no fue d’akordo:
«El Dio no permete ke te de lo ke eredi de mis avuelos!»
La Biblia eskrive ke despues de la reprobasion de Nabot, Ahav abolto a su kaza, sintiendose aflijado, i adjusta ke ‘se enkamo, abolto su kara, i no komio‘.
Jezabel, konstatando la kara preta de su marido i rendiendose kuento de su detresa, se adreso a Ahav kon orgolyo:
«Ya vino la ora de amostrar ke sos Rey de Israel. Alevantate i koma kualkere koza, i alegrate. Me va apropriar de la vinya de Nabot por ti.«
Sin ke Ahav lo supe, Jezabel mando letras a los sivdadinos, en sinyandolalas kon el seyo de Ahav, ande akuzo falsamente a Nabot de aver blasfemado el Dio i el Rey. I eskrivio:
«Tomaldolo i lapidaldolofin’ a la muerte.»
Nabot kon sus ijos fueran matados. I, su vinya fue konfiskada para apartener al palasio, asigun era el uzo kuando una persona era topado kulpable de un krimen grave.
En estos momentos, el Dio aparesio a Eliyau:
«Abasha a la valeya (de Yizrael) i konfronta a Ahav ke mora en Samaria. Esta agora en la vinya de Nabot; esta aya para apatronarse de esta vinya. Dizele: ‘Ansi disho el Dio: Es ke asasinaras i te apatronaras? En este mismo lugar, ande los perros ke chuparon la sangre, chuparan i tu sangre.‘”
Kuando Eliyau renkontro a Ahav, le predizio ke la sorte le rezerva una muerte brutala i violente. Ke todos los miembros de su famiya seran matados. I adjusto:
«Los perros la devoraran a Jezabel en los kampos de Yizrael, i no avra dinguno ke la enterrera.»
La desimasion
Mas despues, Ahav fue aharvado kon un golpe de flesha, en la gerra kontra el Estado Arameo de la Siriya. Se kedo en piez en su karosa fina ke se murio a la kayida de la noche. Su armada regreso. I kuando su puerpo fue rekuperado para ser enterrado, los perros chuparon su sangre ke avia korido en la karosa.
Dos de sus ijos lo suksedaron en el trono. En primero, Ahazia ke reyno durante 2 anyos. Fue segido por su ermano, Yoram. Todo este tiempo, Jezabel fue ainda poderoza i aktiva detras del trono.
Kuando Yoram, despues de aver gerreado kontra la Siria, se estava repozando en la Valeya de Yizrael, su armada basho la komanda de Yehu, se revolto. Lo mato a Yoram, kon Ahaz, Rey de Yuda i su aliado. Yehu arivo al Palasio, ande Jezabel, vistida i yevando sus djoyas, lo asperava en mirando de la ventana. Yehu la apersivio i grito:
«Ken es kon mi? Ken?»
Konformamente a su orden, tres eunukes arondjaron a Jezabel de la ventana. Los kavayos de la armada de Yehu la ahajaron i su sangre se disperso sovre las paredes. I Yehu mizmo, se adjusto a eyos en trespizandola kon su karosa. Su kadavra fue despedasada i devorada por los perros.
Kuando los servidores de Yehu, se aparejaron a enterrar a Jezabel, toparon solo, sus manos, sus piezes i su kavesa, ke los perros avian deshado.
En segito, kon el orden de Yehu, los altares de Baal i Ashera fueron destruidos; los pretros paganos, i toda la dinastia de Ahav, kon sus 70 ijos i ijas, kon sus parientes i sus kurtizanos fueron masakrados.
* * *
Jezabel avia reynado por 36 anyos, i nunka no uvo otruna reyna komo eya en todo Israel.
—————————————–
Gad Nassi
