Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

GIDON
El Djuzgo Eskojido por Dio 

Israel se avia de muevo aleshado del Dio en adorando los idoles. Entonses, el Dio mando a los medianites i a otros trivos kanaanites, para molestarlos. Kada ves ke los ebreos se preparavan a rekojer sus rekoltas, estos las destruiyan, i devastavan sus  teritorios. Para protejarsen de los medianites ke eran muy nombrozos en las valeyas, los ebreos trokavan de lugar i preferavan morar en las kavernas de las montanyas.

A la fin, no puedyendo mas suportar a esto, se lamentaron al Dio:

«Muestro Padre, salvamos de este puevlo!»

El Dio les respondio a traverso un profeto:

«El Dio vos salvo de Ayifto kon Moshe giyandovos en la Mar Korolada. Vos kito del dezierto ande estuvitesh arodeandovos durante kuarenta anyos. I, vozotros estash arogando a los idoles.

Entonses, vos mando a este puevlo para ke devaste a vuestras rekoltas i para ke vos molesta.»

Despues de un kurto tiempo un andjelo aparesyo a Gidon i le disho:

«El Dio esta kon vozotros gerreador vayante«.

Gidon le miro i disho:

«Si el Dio esta kon mozotros, deke los de Median estan ravajando muestras rekoltas i se estan vengando de mozotros? Kualo akontesyo a todos los miraklos, ke mos padres mos rakontaron?»

El andjelo no respondio:

«Va i salva a Israel kon tu poder. Es el Dio ke te esta mandando«.

«I komo puedo salvarlo? Mi klano es el mas chiko en Israel, i yo so la mas flaka persona de mi klano!» se eksklamo Gidon. «Si esto es vedra, dame un sinyo«.

La mizma noche, Gidon arogo al Dio:

«Muestro Padre, si mi destino es de salvar a mi nasyon, aze ke la rozada kayga solamente sovre mi tuazon i ke la yerva en su entorno keda seka«.

Metyo su tuazon a la tierra i se hue a su kama. A la demanyana kuando se esperto, la observo. Estava tan mojada ke kuando la esprimyo una payla entera se incho de su agua i la yerva en su entorno estava seka.

A  la noche, arogo de muevo al Dio:

«Dio santo, no te ensanyas por mi. Kero estar siguro ke me eskojites para salvar mi puevlo. Esta noche aze ke la tuazon keda seka, i ke la yerva en su entorno se moja«.

Esto todo era la prova ke el Dio lo avia eskojido para salvar a Israel. Gidon arekojo pishin una reunion:Metyo la tuazon de lana a la tierra i se hue a su kama. A la demanyana kuando se esperto, la observo. Estava enteramente seka i su pye desmudo se undio en el lodo de la yerva.

«Puevlo de Israel! El Dio me aparesyo i me disho ke mos va salvar. Tengo menester de gerreadores para desbarasarmos de los Medianites!»

Unos trenta i dos mil volontarios se arokejeron para kombatir. Ma, el Dio tenia otros planos. Aparesyo de muevo a Gidon i le disho:

«Tienes munchos soldados kon ti. Kuando venseras a los medianites kon estos dizeras ‘A esto lo izimos mozotros’. I Yo no aksedera a la glorya ke lo mereso. Konduiza a estos a la montanya, i yo te va dizirte a los kualos de estos, kero ke los tomas«.

Gidon izo asigun lo ke le fue demandado. Una vez en la Montanya de Gilad, el Dio ordeno de mandar atras a los ke se estavan espantando. I ansi, 22.000 de estos fueron retornados a sus kaza, kuando kedaron solo 10.000 soldados. I, esto era un numero muy grande por el Dio.

En esto, Dio avlo de muevo a Gidon:Entonses, ordeno de observar de ke manera los soldados beveran de un koriente de agua, i demando de guadrar solo a los ke beveran agua en uzando sus manos, i de liberar a los ke se abokaran a la agua para bever direktamente kon sus bokas. I, de este modo kedaron solo 300 soldados, ke fueron eskojidos para gerreyar kontra la armada de un milyon soldados del enemigo.

«Si te estas espantando, tomalo i a Purah, tu servidor, i vate al kampo de los medianites para observar lo ke les esta afitando«.

La mizma noche, Gidon kon Purah se hueron al kampo de los medianites. Se aserkaron en kaminando en la punta de sus pyezes i kuando estavan allado de una tienda, oyeron a esta konversasion:

«Tuve un shuenyo,» disho una boz. «Una miga de pan arivo en abotandose a muestro kampo i abolto a todo de debasho enriva.»

«Esto puede ser el siman de una sola koza,» respondio la otra boz, «ke el Dio delivro muestro kampo a Gidon.»

Kuando Gidon oyo a esto, alevanto su kavesa verso el syelo i disho:

«Te rengrasyo mi Dio por averme dado el poder de akomplir lo ke me demandates«.

Se abolto pishin a su armada:

«Alevantavosh! El Dio mos dyo a los medianites en muestras manos. Agora, a mis ordenes, los segierash egzaktamente«.

Despues se suvyo a un pinyasko i ordeno:

«Moz vamos despartir en tres grupos i vamos enserklar el kampo de los medianites. Kada uno de vozotros va aferrar una trompeta, una bota i una torcha. Kuando vos dare el sinyal, vash a sonar la trompeta i yamar al Dio.»

Todos endjuntos aferraron sus trompetas, las botas i las torchas, i se aserkaron en silensyo  al entorno del kampo. I kuando Gidon les sinyalo, alevantaron sus torchas enflamadas, sonaron sus trompetas, rompieron las botas en echandolas a la tierra, i gritaron:

«Kon el nombre del Dio i de Gidon!»

Asigun ke los medianites oyeron el bruido de las trompetas i de las tinajas, se alborotaron del espanto i empesaron a koryer en ahajandosen. Fueron aharvados i vinsidos por los ebreos, i empesaron a fuyirsen.

*  *  *

La estoria de Gidon es una de las mas sinyifikantes epizodas del «Livro de los Djuzgos».

Gidon azia parte del Klano Aviezer del Trivo Menashe, i bivia en Ofra. Kon su viktorya, avia restorado la dominasion de Israel en la valeya del Rio de Yarden, i impozado su otoridad sovre otros trivos ebreos, espesialmente sovre Efraim i Naftali. En segito a su viktorya en el kampo de los medianites, los Trivos Menashe i Naftali, i mas tadre Efraim avian kontinuado el kombate en en la Valeya de Yarden kontra los medianites i los amalekites ke se avian adjuntado a eyos, i kaptivaron sus shefes, Zebah i Zalbunna. Sus kavesas kortadas fueron ofresidas a Gidon.

Gidon kastigo no solo el enemigo, ma i a dos sivdades, Sukot i Peniel, ke avian refuzado de abaster komida a su armada.

Despues de la viktoria, el puevlo kijo nomarlo Rey de Israel. Ma, Gidon se avia opozado a este ofre en proklamando ke solo el Dio puede tener el dirito de rijir la nasyon.

Portanto, despues ke todos avian aboltado de la gerra, Gidon les avia demandado:

«Ke kada uno de vozotros me de un aniyo, por el butino ke sakeo«.

La Biblia rakonta, ke Gidon avia fondado de estos aniyos un efod ke devino mas tadre, un obyekto de idolatria. Esto aviya ensanyado al Dio. Ma, en omaje a su viktorya, el Dio se detuvo de kastigarlo todo tiempo ke estava en vida.

En efeto, su projenitura tuvo una suerte trajika.

Despues de su viktorya, fue djuzgo de Israel durante 40 anyos. Bivio fina una edad avansado en kriando 70 ijos. Avimeleh, uno de sus ijos ke le avia nasido de una konkubina, mato, aparte de uno, a todos sus ermanos.

La estoria de Avimeleh, aze el sujeto de un otro artikolo, en esta seria. 

. —————————————–

Gad Nassi