eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
Elisha i la Shunamita
Un diya, kuando Elisha vino a Shunem, renkontro una mujer rika, ke le dyo a komer. En segito, kada ves ke pasava por este kazal, el Profeto uzo de vijitarla para topar kualo de komer. La mujer disho a su marido:
«Mira, ya se ke este ombre es una persona sakra del Dio. Ven le azeremos una kamareta en el tejado de muestra kaza, i meteremos ayi una kama, una meza, una siya i una lamba, para ke puede kedarse aya kada ves ke vendra ande mozotros.»
Rembrandt Harmensz van Rjin, 1640.
En uno de los diyas, kuando Elisha se estava kedando en esta kamareta, disho a su servitor Gehazi:
«Yamala a esta Shunamita.»
I, kuando la mujer aparesio, Elisha se adreso a eya:
«Tomates tanta pena para mozotros. Komo te lo puedo pagar? Keres ke avle por ti al rey o al komandante de la armada?»
La mujer respondio ke mora entre su puevlo sin tener difikultades.
Kuando Elisha demando a Gehazi:
«Kualo es ke se puede azer por eya?»
Gehazi respondio:
«No tiene kreaturas i su marido es aedado. Yamala de muevo».
I, despues ke la yamo, i la mujer se prezento en la entrada de la kamareta, Elisha le disho:
«Despues de kuaji un anyo, en esta sezon, vaz a estrenyar a un ijo».
La mujer respondio:
«Por el nombre del Dio, no avles mintiras a tu servidora».
Portanto, la mujer kedo prenyada, i paryo un ijo, en el mismo tiempo del anyo, despues de la primavera, asigun lo ke Elisha avia previzido.
Kuando el ijiko ya se avia engrandesido, se fue ande su padre ke estava kon sus ovreros rekoltando en los kampos. En supito empeso a gritar:
«Atyo! Atyo mi kavesa!»
Su padre demando a su servidor:
«Tomalo ande su madre».
I despues ke la alevanto i la trusho, la kreatura kedo en los brasos de su madre fina el medio diya, i se murio. En esto, su madre suvyo ariva i metyo a la kreatura en la kama del ombre del Dio. Serro la puerta i salio ahuera de su kaza.
Yamo a su marido i le disho:
«Mandame a uno de tus servidores kon un azno, para ke me puede ir pishin ande el ombre del Dio i aboltarme».
El marido le respondio:
«Deke te keres irte ande el oy? No es no mez i ni Shabat!»
La mujer:
«Todo esta bueno».
Despues metyo el semer al azno, i disho al servidor:
«Aze kaminar al azno i no lo azes kedar fina ke te lo digo».
I, de este modo, arivo ande Elisha en el Monte Karmel.
Elisha kuando la apersivio disho a Gehazi, su servidor:
«Mira, la Shunamita viene. Korye para demandar si todo esta en regla. Si su marido esta bueno? Si su ijiko esta bueno?»
La mujer disho:
«Todo esta bueno».
I, kuando se aserko de Elisha, se echo a sus piezes. En esto, Gehazi vino para alesharla.
Elisha:
«Deshala, porke esta en grande detresa, i el Dio no melo disho, i lo guadro de mi».
La mujer:
«Es yo ke demandi un ijo del Dio? No te lo tengo disho de no desepsionarme?»
Elisha se adreso a Gehazi:
«Vistete i toma mi vara i vate. Si enkontraras a alguno en tu kamino, no lo saludes, si alguno te saluda, no le respondes. La vara miya pozala a la kara de la kreatura».
La mujer se adreso a Elisha:
«Todo el tiempo ke el Dio bivira i tu biviras, no me va apartarme de ti”.
En esto, Elisha se alevanto i empeso a irse detras de eya. Gehazi se fue endelantre, i pozo la vara enriva de la kara de la kreatura. Ma, no uvo dingun sinyo de vida o de bruido. Se abolto a eyos i les disho:
«El ijiko no se esperto».
Kuando Elisha entro a la kaza, lo vido al ijiko espandiendose muerto enriva de su kama. Entro a la kamareta, serro la puerta delantre de Gehazi i de la mujer, i empeso a orasionar al Dio. Despues, se alevanto i se estrenyo sovre la kreatura, en metiendo su boka sovre la boka de la kreatura, sus ojos sovre los suyos, i sus manos sovre las suyas. Asigun ke avia apretado a la kreatura, la karne de la kreatura se avia kayntado de muevo. Se estrenyo de muevo sovre la kreatura. La kreatura respiro syete vezes i avrio sus ojos.
En esto yamo a Gehazi i le disho:
«Yamala a la Shunamita».
Ansi izo Gehazi. I, kuando la Shunamita vino, le disho:
«Alevanta a tu ijo».
La Shunamito se aboko i se echo a los piezes de Elisha. Alevanto a su kreatura i se hue.
* * *
La leyenda no da detalios sovre la Shunamita i su pasado. Kuando Elisha le avia demandado si le puedia regalar kuala kere koza en retorno de sus servisios, eya avia respondido ke se sintia buena asigun ke estava. Esto probablamente amostra ke su situasion era buena. Portanto, en akeos tiempos, no tener kreaturas era konsiderado komo una pena por un kuple i espesialamente por la mujer. I, el regalo de Elisha fue de akordarle de parir una kreatura.
La arebivasion de una kreatura es de mismo relatado en la leyenda de la bivda de Zarefat i Eliyau Anavi, ke fue el mestro del Profeto Elisha. I es muy posible ke Elisha se avia ambezado de Eliyau, la orasion i el ritual de este akto.
—————————————–
Gad Nassi
