eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
El Tunel del Rey Hezkiyau
i la Inskripsyon de Shiloah
Kuando avia entendido ke Sanherib, el Rey de la Asiriya, avia arivado i se estava aparejondo a konkistar a Yerushalayim, el Rey Hezkiyau kon sus ministros desidio de blokar todas las aguas ke estavan ahuera de la sivdad.
Un grande numero de djente se asemblo, i taparon las fuentes i las aguas koriendo en el entorno de Yerushalayim. Se disheron:
«Parakualo ke los Asirianos vengan i topen muncha agua?»
Esto avia afitado en la fin del Siglo VIII AE.
Hezkiyau tenia de menester de la Fuente de Gihon para abasteser agua a Yerushalayim durante el siejo iminente de Yerushalayim, i en mismo tyempo deviya empidir los Asirianos de uzar la agua ke korriya ahuera de la sivdad.
La Biblia nota ke Hezkiyau tapo las avierturas eksterioras de esta Fuente i dirijo abasho la agua ariento de la montanya a la Valeya Gay en el Oeste de Yerushalayim. Un tunel – konosido en tanto ke el Tunel de Hezkiyau – fue kavakado simultanamente por dos ekipos, kada uno empesando de kada ekstremidad. De este modo, la agua de Gihon yego a un rezervuar konosido komo la Payla de Shiloah.
Los dos ekipos, ke se avian metido a kavakar en direksiones opozadas, se enkontraraon en un lugar en medyo del tunel. En este lugar, fue deskuvierta una inskripsion sovre una tableta de piedra, ke komemora a esta ovra.
Konosida en tanto ke la Inskripsyon de Shiloah o de Siloam, esta plaka fue deskuvierta en 1880 por un grupo de ijikos ke se estavan lavando en las aguas de Shiloah, i fue estudiada por el arkeologo Conrad Schick. La tableta fue kitada de su lugar en la pared del tunel, i fue transferada por los Otomanos ke dominavan en Eretz Israel en akeos tiempos, al Muzeo Arkeolojiko de Estambol.
gravada por J. Cousen,
primera meatad del Siglo XIX.
Konsiderada durante anyos enteros en tanto ke una inskripsyon non konosida, esta inskripsion kedo ayi fin’a ke un arkeologo israeliano la rekonosyo. Despues ke avizo los responsables del Muzeo sovre su orijin, esta Inskripsyon fue ekspozada en el Muzeo.
En esta tableta de 32 sm de otor i de 72 sm de anchor, son gravadas sesh linyas en grafia ebrea klasika vieja. El teksto deskrive las impresiones de los dos ekipos djusto antes de renkontrarsen kuando estavan kavakando el Tunel, en oyendo sus bozes, los bruidos de la achas i de los martiros de kada ekipo, i el bruido de la agua ke estava koriendo.
Al tiempo, la Payla de Shiloah era entornada de una pared. Esta pared se alargava verso el Oesto i entornava a Yerushalayim, deshando la Payla ariento de la sivdad.
Esta payla se topa en el Kuartye Djudio en la vieja sivdad de Yerushalayim. De mismo, el Tunel de Hezkiyau se puede vijitar en kaminando de esta Payla fina la Fuente de Gihon.
El Tunel de Hezkiyau es un tunel tortuozo, largo de 533 metros i la altura entre sus dos ekstremidades es de 44.5 metros. La largor del Tunel en linya direkta es 320 metros.
Es posivle ke su itinerario fue desidado asigun una fisura ke egzistia de antes en el roko, i ke las partes mas blandas del roko fueron eskojidas para su kavakasion. Otruna posibilidad es ke este itinerario fue eskojido, para no danyar a las tombas ke egzistian en la Montanya.
Durante jenerasiones enteras, la agua de la Payla de Shiloah fue utilizada para lavar la sangre de los sakrifisios en el altar del Beit Hamikdash. Antes de la destruksion del Templo por los Romanos, era de uzo de selebrar la Fiesta de Sukot en la Payla de Shiloah. Pelegrinos uzavan de trayer a este lugar, ofrandas de frutas rekoltadas freskamente komo datiles, agranadas, uvas, igos i azetunas. La seremonia era selebrada kon una prosesion muzikala de alegria, konosida komo Simhat Beit Hashoeva – en Ebreo «Alegria de travar la agua». Un rabino travava agua de la Payla de Shiloah, ke se yevava kon kantes i al sono de trompetas en un kuvo de oro al altar del Templo en la kolina. Sovre esta seremonia testigan las palavras de Yeshayau ke fue el Profeto del tiempo de Hezkiyau:
«Kon alegria va mos a travar agua de los pozos de la salvasion.»
La Inskripsion de Shiloah es un vestijo konkreto del tiempo del Templo de Shelomo. De mismo ke es, un testimonio valutozo, en la deskuvierta i en el ensenyamento de la istoria de Israel.
* * *
Aparte de este tunel, el Rey Hezkiyau se avia aparejado al atako asiriano en sinyando paktos de aliansa kon Ayifto i kon Babel. Avia engrandesido su armada, restorado las murayas de Yerushalayim i fraguado muevas murayas, avia amasado komanya de komer i fabrikado muevas armas.
La armada asiriana, despues de aver konkistado munchas sivdades en Yuda, asiejo a Yerushalayim en 701 AE, el mismo anyo ke el tunel fue eskapado. Portanto, no alkanso a konkistarla, i se abolto a la Asiriya.
—————————————–
Gad Nassi
