eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
El Shuenyo de Shelomo
Los shuenyos fueron konsiderados komo fenomenes de komunikasyon divina, i sus misteryos fueron el objeto de interpretasyones diversas. En syertas kulturas, shuenyos de este orden akontesen en sityos sakros o en momentos de importansa istorika.
En este konteksto, el shuenyo ke el rey Shelomo avia visto, en el empesijo de su reyno, tyene una sinyifikasyon muy partikulara. La Biblya raporta ke el Dio aparesyo en su shuenyo a Shelomo i le disho:
«Demanda todo lo ke keres, i te lo dare.»
Shelomo demanda del Dio de akordarle la saviduria. El Dio lo felisita por no aver demandado rikeza i poder militaryo, i le promete aparte de una saviduria sin igual, rikeza i onor, i una vida larga. Este shuenyo avia akontesido en Givon, ande Shelomo uzava a ofreser sakrifisyos al Dio, i ande el Tabernaklo se topava en akeyos tyempos.
La Biblia raporta ke Shelomo fue la mas savya persona de todos los tyempos. Su saviduria kontenia toda la saviduria del Este i akeya de l’Ayifto, i mizmo las depasava. Fue el otor de proverbos i kantes, supo rezolver misteryos, i konosiya la lingua de los arvoles i de todo modo de animales. De mizmo ke era un djuzgo kompetente i dirijiya su puevlo kon djustisya, savyendo apartar entre el bueno i el malo. I de esta manera, su fama era konosida i apresyada entre los puevlos.
Shelomo avia eredado de su padre un reynado ke se espandia del rio Prat en el Norte, fina Ayifto en el Sud. Portanto, malgrado su saviduria, Shelomo no pudo rezistir a sus dezeos. La Biblia evalua en tanto ke 1000, el numero de sus espozas i konkubinas, ke apartenyeron a diversos puevlos.
Verso la fin de su reyno, Shelomo adapto las kreyensas paganas de estas mujeres, i uzo la idolatria en adorando a sus dios. De este modo, se avia aleshado del Dio, ke fue la fuente del poder de Israel.
Su regreto sovre esto, lo eksprimyo el mizmo:
«Mas vale un mansevo prove i savyo ke un rey mareyado i ke no es mas respektado«.
La leyenda konta ke achakes de sus pekados, Shelomo avia pedrido gradualmente su trono, sus rikezas i mizmo su saviduria. En primero, avia reynado sovre el mundo de los syelos i de la tyerra, despues solo sovre los puevlos de la tyerra, mas despues solo sovre Israel, i a la fin se avia kedado solo kon su septro.
Asigun la leyenda, en su vejes, se avia arastado durante tres anyos enteros komo un mendiante de sivdad en sivdad en kontando ke un tyempo fue el Rey de Israel.
Despues de la muerte de Shelomo, el Estado Ebreo se avia apartado en dos estados diferentes. Esto fue el rezultado de la kriza de kreyensya provokada por su aleshamyento del Dio de Israel i por el enfasyo de su puevlo de abasteserle la mano de ovra i los dasyos para la fragua de sus edifisyos i
su vida de rikeza.
* * *
Shelomo fue deklarado rey a la edad de 12 anyos, ainda kuando su padre, el Rey David, bivia. Al pareser, reyno durante dos anyos endjuntos kon su padre de 967 fina 965 AE, i el solo de 965 fina 928 AE.
Syendo ainda un muchacho kuando le fue remetido el dover de governar su puevlo, tenia todas las razones para demandar del Dio, la saviduria ke le permeteria de ser un rey kompetente i djusto.
El fakto ke Shelomo fraguo el Bet AMikdash es konsiderado komo su prinsipal akto, ke le akordo su lugar onorable en la istorya del Puevlo Djudyo.
De otra parte, kon la pujidad de su poder, Shelomo fue la viktima de sus flakezas, i probablamente era konvensido ke su saviduria no sera debilitada por su kupididad i sus pekados. Su estorya prova ke, mismo en la saviduria, la perfeksyon no puede ser alkansado por el ser umano.
De este punto de vista, Shelomo es en mismo tyempo, el egzemplo trajiko de un poder leyendaryo i de su dekadansya, ke ivan a desidar de la suerte de
Israel.
—————————————–
Gad Nassi
