Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

El Sakrifisio de Yiftah

Despues la muerte del djuzgo Gidon, los ebreos se avian de muevo aleshado del Dio, i estavan adorando a los dios paganos. Por esto, el Dio se avia ensanyado i permetyo ke los amonites opresan a los ijos de Israel. Los amonites avian kampado en Gilad en frente de los ebreos ke estavan asamblados en Mitzpe.

Entonses, los ebreos se lamantaron al Dio:

«Pekimos kontra Ti, no solo porke Te olvidimos, ma i porke adorimos a Baa«.

I el Dio se apiyado de eyos.

Los ebreos tenian de menester de un shefe poderozo ke sera kapache de reunirlos en tanto ke un puevlo solidario. Se demandaron:

«Ken sera la persona ke mos rijira en muestro kombato kontra los amonites?»

I eskojeron a Yiftah ke era una persona de valor, para ke los dirije. Ansi se adresaron a Yiftah:

«Ven i dirijamos para ke puedemos kombatir a los amonites.»

Yiftah les demando:

«Si kombato kontra los amonites i vos salvo de sus manos, sera vuestro shefe?»

«Ke el Dio sea muestro testigo entre ti i mozotros, si no mos konformamos a tus ordenes,» le respondieron.

Los Amonites ke no eran prontos a renonsar a dominar las tierras ke apartenian aIsrael, refuzaron el ofre de paz de Yiftah.

En esto, Yiftah  atako a los amonites i los vensio. La Biblia no da detalyos sovre esto, solo rakonta:

«Yiftah kamino sovre los ijos de Amon para kombatirlos, i el Dio salvo a Israel de sus manos. I a los amonites los arondjo de ande estavan, en devastando vente de sus sivdados, kon un grande masakro…”.

Durante sesh anyos, Yiftah fue uno de los shefes militares de Israelyamados shoftim, djuzgos. Aunke su viktoria sovre los amonites, Yiftah es lo mas akodrado kon un otro evenimiento en atadijo kon esta viktoria.

Antes de partir para gerreyar, Yiftah avia djurado al Dio ke en kavzo ke si salira viktoriozo de esta gerra, en su retorno a kaza, iva sakrifiarle el primero vivante ke salira en su kamino para aresivirlo. En efeto, Yiftah fue viktoriozo i kuando estava aboltando a su kaza, la primera persona ke lo aresivio fue su ija, su sola kreyatura. Lo estava aresiviendo kon muncho alegriya en baylando, kantando, i tanyendo el pandero.

Kuando Yiftah la vido, se arazgo sus vistidos i le disho:

«Ke dezastre mi ija, me amargates el korason, porke avri mi boka delantre del Dio, i no puedo tornar atras mi djuro«.

La Biblia rakonta ke la ija de Yiftah demando un relapso de dos mezes. I durante esta peryoda estuvo en las montanyas yorando su virjinitad, i fue konsolada por las ijas de Israel.

Si la ija de Yiftah fue despues sakrifiada reelmente o no, no se save. Ay ke pensan ke el fakto ke eya yoro su virjinitad i no se enluto por su muerte, es la prova  ke su suerte no era de murir. I adjustan ke, probablamente, el resto de su vida lo paso en tanto ke una muchacha sin kazarse en serviendo el Dio en el Templo.

—————————————–

Gad Nassi