eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
El Rey Hezkiyau i la Salvasion de Yerushalayim
Hezkiyau avia suvido al trono de Yuda en la edad de ventisinko anyos. Reyno durante 29 anyos de la segunda meatad del Siglo VII AE fina la primera meatad del Siglo VI AE.
Su reyno es markado por sus alkansos en el domeno de la restorasion de la relijion djudiya, su aktividad para enrezyar i sovrebivir el Estado de Yuda, i en este konteksto, la salvasion de la kapitala Yerushalayim del siejo de los Asirianos.
La restorasion relijioza
Hezkiyau purifio la relijion de Israel en abolisando los idoles paganos de los templos, de mizmo ke el Kulevro de Kovre ke Moshe avia instituado ainda en el dezierto.
En konsentrando la aktividad relijioza en el Templo de Yerushalayim, enfortesio los atadijos del puevlo djudio kon la dinastia de David ke reynava en Yerushalayim i kontribuo a desvelopar la konsiensia de la unidad entre los Trivos de Israel. La Biblia rakonta ke en este buto, mando letras en Israel i en Yuda, invitando los Ebreos a partisipar a la seremonia de Pesah en el Templo, i adjusta ke esto fue una festividad tan somptuoza i alegre, ke no se avia visto una ansina otra durante munchas jenerasiones.
La menasa asiriana
Ainda antes ke Hezkiyau avia suvido al trono, el Rey de la Asiriya avia konkistado a Israel, el Estado del Norte, i deportado munchos de sus sujetos. Avia i impozado su otoridad en Yuda. Kada anyo, se arekojia una suma grande de moneda del puevlo para pagar un tributo a la Asiriya.
Hezkiyau se avia desidado de no pagarlo mas. Por esto, arekojo su armada, i se apronto kontra un atako de los Asirianos. Ancheo su estado en el Sude, en vensiendo a los Pilishtis i arivo fina Azza. Se alio kon Ayifto i kon Babel, para empidir la ekspansion de la Asiriya. Restoro las murayas de Yerushalayim, i kavako un tunel subterreno para abasteser agua a la sivdad en kavzo de un siejo.
Portanto, la armada del enemigo era muncho mas poderoza de su armada. Los Asirianos entraron a la tierra de Yuda en kokistando sus sivdades una detras de la otra, i avansaron verso Yerushalayim.
Entonses, Hezkiyau se rendio kuento ke no iva pueder rezistir al enemigo, i ke avia echo un yerro muy grande en refuzando de pagar el tributo a la Asiriya. Mando un mesaje a Sanherib, el Rey asiriano, prometiendole de no rezistir a su armada i de pagar todo lo ke demandaria.
El Rey de la Asiriya se konvinsido ke el momento de akapararse de toda la rikeza de Yuda se avia prezentado, i demando un tributo munche mas grande de lo ke resivia de antes. Hezkiyau arekojo todo el oro i la plata de su palasio, todo lo ke su puevlo tenia, i mizmo todo el oro i la plata del Templo Sakro para pueder pagar lo ke le fue egzijado.
Ma, ni kon esto el Rey de la Asiriya no fue satisfecho. Mando una repuesta ande estava eskrito:
«Me esto aparejando a destruir vuestra kapitala i a deportarte a ti i a tu puevlo a un payis leshano, asigun lo ke ize kon vuestros ermanos del Estado de Israel. Los dios no les aprovecharon kuando los vinsi, i vuestro Dio no sera kapable de salvarvos«.
La intervansion de Yeshayau
Hezkiyau se avia muncho espantado. Tomo la letra del Rey asiriano i se hue al Templo, ande etalo la letra delantre del altar para demandar el ayudo del Dio. Despues mando a unos de sus ijos ande el Profeto Yeshayau, para konsultarlo.
Ansi Yeshayau avia respondido:
«El Dio proklamo ke el Rey de la Asiriya no entrara en esta sivdad, i no mizmo le lansara ni una flecha. Ma, retornara a su payis del mizmo kamino ke vino, i ke sera matado kon la espada».
La mizma noche un andjelo del Dio vijito el kampo asiriano en provokando una epidemia terrible ke aharvo a sus soldados. Fina la demaniana, munchos de eyos kayeron muertos, i todos los komandantes de la armada estavan entre estos. En segito, Sanherib se abolto en prestez atras a su payis. I, nunka no lo atako mas a Hezkiyau. Despues, afito ke kuando estava orasionando en el templo de su dio en Ninova, dos de de sus ijos se aserkaron de el i lo mataron.
*
La Biblia rakonta ke un diya, Hezkiyau se avia echo muy hazino, i no se estava topando un remedio a su malatia. El Profeto Yeshayau vino a vijitarlo i le disho:
«El Dio ordeno ke te aprontes a deshar a este mundo, porke kale ke te mueras».
Portanto, Hezkiyau no estava sintiendo ke era kapable de abandonar a su puevlo. Se abolto verso el Dio i Le rogo para ke su hazinura se amahe. Empeso a verter lagrimas, i akodro al Dio ke avia governado Su Puevlo kon fidelidad. El Dio avia eskuchado su rogasion.
Kuando Yeshayau estava en kamino para su kaza, el Dio le avlo de muevo:
«Aboltate ande el Rey i dizele ke ya lo eskuchi i vide sus lagrimas. I agora va adjustar otros kinze anyos a su vida. En tres diyas, el Rey sera kapable de ir al Templo i orasionar».
Hezkiyau se avia buen karar alegrado. Demando del profeto de amostrarle un sinyo. Yeshayau respondio:
«Este sinyo sera asigun tu eskojo. Keres ke la solombra de la ora solara se ayga atras o adelantre?» Hezkiyau demando ke la solombra vayga atras. Yeshayau orasiono de muevo, i la solombra se hue atras de diez grados. De este modo, Hezkiyau fue amahado de su hazinura, i bivyo otros kinze anyos.
* * *
Es reportado ke antes de asiejar a Yerushalayim, Sanherib, el Rey de la Asiriya, avia konkistado 46 sivdades fortifikadas de Yuda, ansi ke un munchidumbre de kazales.
Asigun lo akodrimos mas ariva, Hezkiyau se avia aprontado kontra este siejo en kavakando un tunel subterreno para abasteser agua a Yerushalayim. Este tunel ke sovrebivio fina muestros dias, aze el objeto de un artikolo separado.
Asigun la Biblia, la invazion asiriana se avia terminado despues ke el andjelo del Dio, avia matado durante la noche, 185.000 de los soldados de Sanherib, en segito a la orasion de Hezkiyau. El istoriano Herodotus rakonta ke esto fue kavzado por una epidemia de pesta ke se avia repandido en sus kampo.
Una otra eksplikasion es ke la armada asiriana estava muy kansada i agotada despues de un siejo largo, i no estava pronta a una konfrontasion posible kon la armada de Ayifto i de Kush, ke eran los aliados de Yuda.
La kayida atras de la solombra de la ora solara es referada a una eklipsa solara ke avia akontesido en este mizmo momento. Egzistia en akeos tiempos una kreensia, ke asigun ke avia afitado a Hezkiyau, el hazino se sanava durante una semejante evenimiento.
Despues del abandono del siejo de Yerushalayim, el Rey Hezkiyau gano un respekto grande, i payizes vizinos no mankaron de felisitarlo i de prezentarle regalos valutozos.
Hezkiyau es konosido komo el mas grande rey en la istoria del Estado de Yuda. Durante su reyno, Yuda fue el abrigo de munchos refujiados de Israel, ruinado por la Asiriya.
Yuda kontinuo a egzistir durante serka de un siglo despues del reyno de Heskiyau, fin’a ke Yerushalayim fue konkistado i su Templo derrokado por Babel, basho la dominasion de Nabukadnezar.
—————————————–
Gad Nassi
