La rubrika de Gad Nassi – Estorias de los tiempos biblikos: El Masakro en Nob

Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

El Masakro en Nob 

Nob era una sivdad en el teritoryo de Binyamin, al lado de Yerushalayim. David kuando se estava fuyendo del Rey Shaul, avia pasado por esta sivdad povlada por rabinos.

En esto, kuando David vijito a Ahimeleh, el Rabino en Kapo del Sanktuario, Ahimeleh le demando:
«Ke bushkas aki?»

David le respondio:
«El Rey me kargo de una mision. Tengo menester de pan…»

Ahimeleh:
«Lo ke tengo es solo pan sakro. Si tus servidores se alesharon de las mujeres, te lo puedo dar”.

David le respondio ke sus servidores eran limpios. I aparte del pan, el Rabino le ofresio la espada de Goliat ke David avia matado.

Doeg el Edomito, el shefe pastor de Shaul, ke se estava topando en akel momento en el Sanktuario, aviya observado este enkontro.

Mas despues, kuando Shaul estuvo enterojando el puevlo para saver ande David se estava eskondiendo, Doeg tomo la palavra:
«Al ijo de Jese, lo vide vinir ande Ahimeleh en Nob. Ahimeleh lo bendizio, le dyo komanya, ansi ke la espada de Goliat el Pilishti».

En esto, Shaul izo trayer a Ahimeleh i a todos los miembros de la famiya de su padre:
«Ijo de Ahituv, agora eskuchame bueno».

«Si, mi Rey,” le respondio Ahimeleh.

«Deke konspirates kontra mi, tu kon el ijo de Jese ke se revolto kontra mi, en dandole pan i una espada, i en arogando al Dio por el?»

«Ken de tus servidores es el mas fidelo komo David, tu yerno, i tu gerreador, ke es tan respektado en tu korte? No es por la primera ves ke demandi el ayudo del Dio por el. No akuzes tu servidor, porke ni yo i ni la famiya de mi padre, estamos al koriente de lo ke se pasa,» respondio de muevo Ahimeleh.

Shaul:
«Toparas la muerte, Ahimeleh, tu i toda la famiya de tu padre».

Despues Shaul se abolto verso sus soldados:
«Mataldolos a estos rabinos, porke eyos tuvieron kudyo de David en saviendo ke se estava fuyendo de mi, i no me lo disheron».

Portanto, los gerreadores, inkluido sus komandantes nombrados: Avner i Amasia, refuzaron de alevantar la mano a los saserdotes del Dio, i aprovaron en vano de konvenser a Shaul ke Ahimeleh era inosente.

Entonses, Shaul se adreso a Doeg:
«Aharva i mata los saserdotes».

I esto lo izo Doeg. Ochenta i sinko saserdotes de Nob ke yevavan la vesta sakra, nomada efod, fueron pasados por la espada, ansi ke los ombres i las mujeres, las kreaturas i los rezin nasidos, las vakas, los aznos i los kodreros de la sivdad.

Aviatar, el ijo de Ahimeleh reusho a salvarse de este masakro. Se fuyo i topo refujio ande David i le konto todo lo ke avia pasado.

David le disho:
«Este mismo diya, kuando Doeg el Edomito estava aya, fue siguro ke iva reportar todo a Shaul. Yo so responsable de la matansina de toda la famiya de tu padre. Kedate ande mi i no te espantes. La persona ke esta bushkando tu vida, esta bushkando i la miya. Seras en seguritad ande mi».

Despues ke David suvio al trono, iva nomar a Aviatar komo el Rabino en Kapo del Sanktuario.

* * *
El nombre de la sivdad de Nob es mensionado por la primera ves en la Biblia, en este konteksto. Kuando David avia vijitado el Sanktuario, Ahimeleh avia konsultado los Urim i Tumim a la demanda de David. Urim i Tumim es el nombre de un pandantif – kon dodje piedras reprezentando los Tributos de Israel – ke se enkolgava en la garganta del Rabino en Kapo del Sanktuario. Solo el puedia konsultar su prezaje, jeneralmente a la demanda de la persona ke dirijava el puevlo – o de un personaje muy alto – i solo en sirkonstansias muy kritikas i muy partikulares.

Shaul avia aklamado ke este akto fue un sakrilejio, siendo ke su uzo era akordado solo si el Rey lo demandava. Ahimeleh, de su parte, avia mentenido ke este privilejio era permetido en el kavzo de David, ke era uno de los jenerales de la armada de Shaul, i siendo el marido de Mihal, la ija de Shaul, era i el yerno del Rey.

Lo ke Doeg bushkava en el Sanktuario durante la vijita de David no es klaro. Portanto, el fue la sola persona ke lo iva denonsiar. De mizmo ke iva ser la sola persona ke fue pronta a matar a los rabinos de Nob i a devastar la sivdad.

La leyenda konta ke Doeg avia murido kon yesurin, en periendo su meoyo i en kontraktando la lepra. De mizmo ke, en sus alkavos diyas, Shaul fue tormentado por el remorso de aver masakrado a los rabinos de Nob.

—————————————–

Gad Nassi