eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
El enganyo de David
David, kuando se estava fuyendo del sanyo de Shaul, avia arivado a Gat despues de Nob. Gat, kon Gaza, Ashdod, Askelon i Ekron, era una de las sinko sivdades situadas en la Banda de Gaza i ke apartenian a los Pilishtis. Era de esta sivdad ke Goliat fue mandado a la Valeya de Ela para kombatir kontra los Israelis, ande fue vinsido por David. I agora, David se avia refujiado a esta sivdad, para protejarse de Shaul.
Lo ke pusho a David de eskojer a Gat no es klaro. Es posible ke, topandose en una situasion de perikolo, penso ke porke un largo tiempo avia pasado de su viktoria, no lo ivan rekonoser.
Portanto, fue pishin rekonosido i su prezensia fue reportado al rey Ahish. Los Pilishtis se avian eksklamado:
«No es David? El rey del teritorio? No es akel ke por el kantan i baylan: ‘Shaul mato a miles, i David, a diezes de miles?'»
Lo ke prova ke la fama de David era bastante konosida en el teritorio de los Pilishtis, i su prezensia en Gat era una okazion para ke pueden vengarsen de el. De mas, era mizmo konsiderado komo rey de Israel.
Entonses, los Pilishtis aferraron a David i lo trusheron delantre de Ahish. David se avia rendido kuento ke estava en perikolo de ser kaptivado i mizmo de ser matado. Le tomo un espanto muy grande i se izo del malo i se desmodro en eskuriendo bavas de su boka i en eskriviendo bavajadas a las paredes.
Ahish, en konstatandolo lo delivro kon estas palavras:
«No estash viendo ke este es un loko? Deke me lo trushitesh aki? Mankan aki lokos, para ke i el se dezmodre delantre de mi? Kaliya ke vinyera ande mi? Arondjaldolo de aki!»
Mas tadre, David se adreso a Ahish:
«Agora ke topi la favor en tus ojos, dame un lugar en una de tus sivdades para ke puede bivir ayi».
Entonses, Ahish le akordo de bivir en Ziklag. David estuvo ayi kon sus doz espozas: Ahinoam i Abigayl, durante un anyo i kuatro mezes. I kuando Shaul fue informado ke David bive en el payis de los Pilishtis, no lo bushko mas.
* * *
Los atadijos entre Shaul i David no fueron siempre negros. Uvo tiempo ke Shaul se avia komportado de una manera amable verso David, i avia mizmo fiestado su viktoria kontra Goliat i los Pilishtis.
El profeto Samuel avia untado a David komo el suksesor de Shaul en el trono de Israel, no achakes la ambision de David ma, porke Shaul no lo avia konsiderado en ofresiendo el olokosto sin asperarlo antes de la gerra kontra los Pilishtis.
Mas tadre, aunke Shaul tempto munchas vezes de matar a David, le ofresio de kazarse kon su ija Mihal. En una de las birras de Shaul kontra David, Yonatan, el ijo de Shaul, lo kalmo. I mas despues, kuando akavido a David de la intension de Shaul de matarlo, David empeso a fuyirse de Shaul.
David, despues de aver vinsido a Goliat, avia kombatido a los Pilishtis i los avia persegido fina los sivdades de Gat i Ekron. Por esto, el fakto ke David se refujio en el payis de los Pilishtis, enemigos de Israel, es bastante kuriozo.
Portanto, en akeos tiempos, akseptar refujiados de payizes vizinos no era un fenomeno tan raro. Estos refujiados puedian ser un sorte de trofeo i el testimonyo de la superioridad de la nasion ke los estava protejando.
De mas, David en amostrandose komo loko, avia reushido a konvenser a Ahish ke no era mas el gerreador valiente ma, un hazino inkapache de danyarlo.
—————————————–
Gad Nassi
