eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
El Adulterio de Batsheva
Esta estoria empeso un diya de primavera, kuando el Rey David despues ke se avia espertado de su siesta remarko de su tejado a una mujer tomando un banyo. I esta mujer era muy ermoza.
En esto, David se informo sovre eya, i le disheron:
«Es Batsheva, la ija de Eliam, la mujer de Uria, el Hiti».
Uria, ke era un komandante valiente de su armada, estava gerreando leshos de la kapitala kontra el enemigo. David embiyo mesajeros a Batsheva, i la yamo a su palasio. La tomo a su kama, i se echo kon eya.
Batsheva, despues ke se pUriafio asigun la tradision, abolto a su kaza. En segito, rendiendose kuento ke estava prenyada, lo informo a David.
David konsiderando la gravidad de esta situasion, mando un mesajero a Yoav, komandante en kapo de su armada ke estava en la gerra, demandandole de enbiyayarle a Uria.
De este modo, David avia planifiado ke puedera eskonder las konsekuansas de su komplisidad en lo ke avia afitado. Despues ke invito a Uria a un pranso real, le demando de lavarse sus piezes i de irse a su kaza para estar kon su espoza. Portanto, Uria al lugar de ir a su kaza, prefero de kedarse en la entrada del palasio, pasando la nochada kon las servantes.
Kuando David lo supo, yamo a Uria de muevo i le demando eksplikasiones sovre su akto. Uria le respondio ke kuando su komandante Yoav i sus soldados estan gerreando en los kampos, el no puedera permeterse de ir a su kaza para komer i bever, i echarse kon su mujer. Djuro por su vida i por la vida de David, ke no azera esto.
David le ordeno de kedarse otrun diya. Lo invito de muevo a un pranso i lo enboracho. Uria de muevo se kedo kon las servantes, i no hue a su kaza. A la demanyana, David eskrivio una letra en demandando de Uria de remeterla a Yoav.
Eskrivio en la letra:
«Metelo a Uria en el fronte de los kombates los mas fuertes, i despues aleshavos de el para ke sea aharvado, i se muere».
En efeto, kuando la kapitala de los Amonites fue enserklada por los Ebreos, Yoav enbiyo a Uria al fronte lo mas avansado, ande los soldados los mas valientes del enemigo estavan defendiendo la sivdad. Estos soldados salieron de la sivdad i kombatieron kontra Uria. Syertos de los soldados de David kayeron, i Uria el Hiti entre eyos.
Batsheva kuando supo ke su marido no estava en vida, observo las leyes del luto asigun la tradision. Despues ke la perioda de luto se termino, David la yamo, i se kazo kon eya.
De esta union nasio mas despues Shelomo, ke iva ser Rey de Israel.
* * *
Entre todos los evenemientos ke el Rey David tuvo de afrontar, la epizoda del adulterio kon Batsheva fue uno de los mas gravos. El akto ke en si-mizmo es un sakrilejio, fue segido de un asasinato perpetrado por el kulpable para disimular su akto.
Lo invikto a Uria, probablamente basho la fasada de darle un dover espesial. Esto era un trapo para ke Uria tenga relasyones kon Batsheva, i de este modo la kreatura ke iva naser sea rekonosida komo suyo.
Portanto, Uria no kijo violar la Ley de Israel, ke no permetia a los soldados en servisio aktivo, de no kitar sus trupas. La sola koza ke David no avia previzido era la onestedad de Uria de no kerer gozar de los plazeres de estar en su kaza, kuando sus kompanieros estavan gerreando en los kampos.
Uria, el etranjero, avia provado ke era mas fidelo verso el Puevlo Eskojido ke su Rey. I de este modo, invito sin saver su muerte.
Kuanto a Batsheva, eya kontinua a ser, una de las mas kontroversiales mujeres de la istoria fina muestros diyas. No savemos si rezistio al dezeo de David, i de ke manera avia luchado kon el konflikto entre su fidelidad a su marido i el dover de akumplir el orden del Rey.
Portanto, una koza es siguro: el fakto ke fue la madre de uno de los reyes de los mas leyendarios de la istoria, el Rey Shelomo.
—————————————–
Gad Nassi
