eSefarad Noticias del Mundo Sefaradi
Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–
Avshalom i las Konkubinas del Rey David
Despues ke avia asasinado a su ermano Amnon, para pueder protejarse del sanyo de su padre, el Rey David, Avshalom se avia refujiado ande su eshuegro en Geshur, en el Norte del payis,.
Tres anyos despues, kon la intervansion de Yoav, el komandante en kapo de la armada, Avshalom obtuvo la permision de David de aboltar a Yerushalayim. Portanto, duvo asperar otros dos anyos para ser resivido por su padre i rekonsiliarse kon el.
Avshalom era en akeos tiempos probablamente el mas favorable kanditato para eredar el trono. Portanto, en segito de su rekonsiliasion, se revolto kon su armada kontra David i topo un apoyo grande en la populasion del teritoryo de Yuda ansi ke una parte de la populasion en jeneral.
Paso en primero a Hebron, la vieja kapitala de Yuda, i ayi se proklamo el Rey de Israel. Esta revolta fue tan reushida ke David se avia fuyido de Yerushalayim a Mahanaim en la Transjordania.
Ahitofel ke era el shefe konsejero de David, lo avia dezertado a David para ser esta ves el shefe konsejero de Avshalom. Avshalom entro a Yerushalayim i se suvyo al trono sin dinguna opozision.
Avshalom demando a Ahitofel:
«Entretiempo kualo devo de azer?”
Ahitofel:
«Kale ke amostres a tu puevlo ken es ke lo esta dirijando. Kale ke proves ke tu soz sus Rey«.
«I, de ke modo?”
«Enpatronate del bien real lo maz valutozo, de sus mujeres. I toda la djente ke esta kon ti, lo savera i se sientera maz poderozo«.
«Avlas de las konkubinas, ke David desho en su palasio?”
«Si. Echate kon eyas«.
«I, komo el puevlo lo savera?»
«Azelo en publiko. Alevanta una tienda djusto aki en el tejado, i desha al puevlo para ke venga a observarte«.
Biblia de San Isidoro, 1162
En oyendo a esto, Avshalom sonrio. Le avia plazido este konsejo, i metyo su mano al ombro de Ahitofel. Alevantaron una tienda en riva del tejado, i Avshalom estuvo kon las diez konkubinas delantre de Israel.
Kuando avia salido de Yerushalayim, el Rey David avia deshado ayi a tres de sus servitores, Hushay i doz otros ijos de saserdotes eminantes. Estos avian semejado ke estavan de la parte de Avshalom.
Hushay avia reushido a konvenser a Avshalom de no komportarse asigun el konsejo de Ahitofel, ke avia rekomendado de pursuivir a David antes ke ariva kon su armada a la Transjordania i ke tope ayi mas apoyo.
Kuando Ahitofel supo ke su konsejo no fue segido, estando siguro de lo ke iva afitar, se suvyo a su azno i se hue a su kaza en su sivdad. Metyo orden a su kaza i se suisido en enforkandose.
En la batalya subsekante en el foresto de Efrayim en la Transjordania, las fuersas de Avshalom fueron vensidas por los mersenarios de David i su armada, basho el orden de Yoav i de Avishay, sus dos komandantes de valor. Avshalom en retirandose en riva de su mula, fue aferado de sus kaveyos entre los ramos de un arvole de roble.
Yoav kuando lo avia remarkado se aserko del i aunke el orden de David de eparniar su vida, mato a Avshalom kon golpes de lansas.
Este akto avia kavzado una grande tristesa en David ke se lamanto
durante dias enteros.
* * *
Avshalom es akodrado en tanto ke una persona de aparensia ermoza, de avla elokante i impresionante. Achakes ke sus ijos se avian murido en edad chika, su nombre no iva kontinuar. Por esto, erijo ainda kuando biviya, un monumento a su nombre, en la Valeya de los Reyes en Yerushalayim. Un monumento ke ainda egziste en este lugar, es falsamente konosido en tanto ke la «Tomba de Avshalom».
El pelegrino Bernardin Surius reporta ke en el anio 1666, kuando avia vizitado a Yerushalayim, los moradores de Yerushalayim uzavan de trayer a sus kreaturas para ke echen piedras a esta Tomba, i ke griten en suhetando ke la fin de las kreaturas ke no respektan a sus jenitores sea komo la fin de Avshalom.
Konsernando las diez konkubinas, el Rey David kuando abolto a Yerushalayim las alesho de su palasio i las enserro en un mizmo lugar. I, eyas no konosieron mas ombres.
—————————————–
Gad Nassi
