Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.

————————————————————————————————————————————————–

Avimeleh
el rey ke no kijo ser matado por una mujer

Avimeleh kere dizir en ebreo: mi padre es rey. Era ijo del djuzgo Gidon, de una de sus konkubinas de Sh’hem.

Gidon fue el djuzgo el mas poderozo de de Israel. El puevlo de Israel avia demandado de Gidon de proklamarse Rey. Ma, el pensando ke solo el Dio tenia el dirito de ser rey, no fue pronto a akseptar a esta demanda.

Portanto, Avimeleh no pensava ansina. Kuando Gidon se muryo, ovro para azerse el Rey de la rejyon de Sh’hem. Por esto, uzo la influensa de los miembros de la familya de su madre, en mirando de obtener el apoyo de los shefes feodales de la rejyon.

La sivdad de Sh’hem rekonosio a Avimeleh komo su governor en dezinyandolo su rey. Despues arivo kon su armada a Ofra, ande sus 71 medyo-ermanos bivian. Masakro a 70 de entre eyos. Solo, Yotam kon su mujer reusheron a salvarsen. Yotam se suvio al Monte Grizim i maldizio a Avimeleh.

Avimeleh, avia dezinyado a Zebul en tanto ke el governor de Sh’hem para pueder mas libramente okuparse a espandir su poder.

Kon el tyempo la populasion de Sh’hem ya avia empesado a enfasiarse de Avimeleh, i los krimenes estavan pujando. En este tyempo, un etranjero yamado Gaal avia pasado kon sus ermanos a morar en Sh’hem. No paso muncho tyempo ke Gaal topo apoyadores entre los hivites, ke eran los fondadores de la sivdad i ke konstituavan una sinifikante parte de su populasion.

Zebul, el Governor de Sh’hem paresia apoyarlo. De otra parte, mandava informasiones a Avimeleh sovre las aktividades de Gaal. Un diya, Gaal apersivio un grupo de personas ke se estavan aserkando de Sh’hem. Ma, Zebul reusho a konvenrserlo ke estos eran las solombras de las montanyas. En fin, Gaal se rendyo kuento ke estos eran los soldados de Avimeleh i ke Zebul estava mirando a enganiarlo. I kuando la armada ke arekojo no reusho a rempushar a las fuersas de Avimeleh, Gaal fue obligado de renunsiar a la sivdad i se alesho de ayi kon sus ermanos.

A la amaniana, kuando sus moraderos salieron al lavoro en los kampos, Avimeleh atako la sivdad de munchas direksyones. Masakro a su puevlo por aver kooperado kon Gaal. Ravajo la sivdad i la maldizio en echando sal a su tyerra.

Despues se atako al Sanktuario El Berit. Mas de mil feodales ke en su tyempo avian apoyado a Avimeleh i ke avian bushkado refujio en el sanktuario fueron kemados bivos.

Despues de esta viktoria, Avimeleh kamino sovre la sivdad de Teb. Una vez la sivdad konkestada, una sivdadina aedada, ke estava sovre la torre de la sivdad echo una piedra de molino de mano a la kavesa de Avimeleh.

Avimeleh, firrido mortalamente, sintyiendo ke su fin ya avia arivado, ordeno a su ayudante de matarlo kon su espada para ke no sea matado por una mujer.

* * *
Avimeleh ke reyno durante tres anyos sovre Israel, fue nominado Rey por los sivdadinos de su kapitala, Sh’hem. Portanto, Shaul, i no Avimeleh, es konsiderado en tanto ke el primer Rey de Israel. La istoria de Israel, no lo konta ni mismo entre los djuzgos. Su estoria parese en el Livro de los Djuzgos, por la simple razon ke era el ijo de Gidon i ke su reyno koensida a esta perioda.

Despues de su muerte, Tola fue nominado en tanto ke djuzgo. Sh’hem i sus environes apartenieron enteramente a Israel, i la paz reyno por vente anyos.

—————————————–

Gad Nassi