La rubika de Gad Nassi – Estorias de los tiempos biblikos: Atalia La Reyna Pagana de Yuda

Nacido en Estambul, Gad Nassi graduó de la Galatasaray High School y de la Facultad de Medicina de la Universidad de Estambul. Comenzó su carrera como autor durante sus estudios de secundaria, escribiendo para revistas locales. se desempeñó como director de Shalom, el periódico de la comunidad judía de Turquía, como corresponsal de varias publicaciones extranjeras, y también dirigió la oficina de prensa del consulado israelí en Estambul. Es uno de los promotores y fundadores de El Amaneser, un suplemento mensual en judeo-español del periódico Shalom en Estambul. Kada semana Gad mos dará artikolos de su kreasion para kompartir kon muestros lektores.
————————————————————————————————————————————————–

Atalia
La Reyna Pagana de Yuda

Atalia era la ija de Ahav, Rey del Reynado de Israel i, de Jezabel, la Reyna pagana de Israel. Se avia kazado  kon Yoram, Rey de Yuda. Yoram era el ijo de Yoshafat, el kuatren rey del Reynado de Yuda. Yoshafat se avia remarkado kon su relijiozidad i su poder. De mizmo, por aver kontaktado una aliansa politika i ekonomika kon el Reynado de Israel. Esto fue la razon de aver kazado su ijo Yoram kon Atalia.

Yoram reyno en Yuda durante 6 anyos entre 851 i 843 AE. La Biblia rakonta ke kuando suvio al trono, avia asasinado sus sesh ermanos mas mansevos i siertos dirijentes. Durante su reyno, Yuda deklino en pedriendo su supremasia sovre los trajektorios de komersio verso la peninsula araba, achakes ke Edom se avia revoltado i la sivdad de Livna avia aksedado a la indepensia. De mas, los Pilishtis kon los Arabos avian reushido a invair el payis en matando a sus ijos aparte de Ahaz, ke lo iva suksedar.

Este deklino fue remarkado i en el domeno espiritual, pormodo ke avia enkorajado el kulto de Baal en segiendo a Atalia, ke, asigun sus jenitores, era i eya una adepta del paganismo fenisiano.
Kuando avia asistado al Rey de Israel – yamado il el Yoram – kontra los Arameos, Yoram fue asasinado por la revolta de Yehu en Israel.
Ahaz, de mizmo ke su padre, fue un adepto de Baal. Pudo reynar solo durante un anyo kon su padre ke se avia adolensiado. Fue matado kon su padre, en el mizmo evenimiento.
En segito de la muerte de Ahaz, Atalia asasino a los posibles kanditados al trono, asigun ke su marido Yoram se avia komportado. Solo Yoash el mas chiko ijo de Ahaz, fue salvado en seando eskondido i engrandesido en sekreto por Yosheva, la ermana del Rey Ahaz i la la mujer del grande pretro Yehoyada.

Sesh anyos despues, Yehoyada proklamo una aliansa entre el Dio, el rey i el puevlo. El puevlo se presipito al sanktuario de Baal, en demolisando sus altares, sus estatuos, i mato a Matan, el pretro de Baal. Izo suvir a Yoash al trono i lo untyo entanto ke Rey. I el puevlo se alegro en aplodisando i gritando, «Biva el rey!» en el sonido de las trompetas. Kuando Atalia fue al koryente de todo lo ke se paso, koryo al Templo. Vido ke, asigun el kustumbre, el muevo rey estava enpyez enriva de la estrada. I los komandantes kon el puevlo estavan en su entorno, regalandosen de su prezensia. Arazgo sus vistimientos i empeso a gritar:

«Traision! Traision!»
En esto, Yehoyada ordeno a los komandantes:
«Kitaldola de aki! Kada uno ke la segira sera matado kon la espada!»
I adjusto:
«No kale ke sea matada en la Kaza del Dio».
La tomaron a Atalia i, la mataron kuando arivaron a la entrada de los kavayos del palasio.
Atalia fue Reyna de Yuda, durante el reyno de Yoram i akeyo de Ahaz. Despues del asasinato de Ahaz, durante sinko anyos, avia okupado eya sola el trono de Yuda.

—————————————–
Gad Nassi