La recheta de los Boyos paso a paso por Liliana Benveniste

Yo me ambezi este modo de azer boyos de mi esfuegra Alicia, i eya se ambezo de su madre Leonor ke era nasida en Rodes, ke por siguro se ambezo ansimizmo de su madre…

Mi nona también los azia de este modo.

Recheta:

Podesh ver  fotos de kada paso aki enbasho

BOYOS
Para azer 50 boyos

Masa

• 3/4 kg. de arina 0000
• 1 punyado de arina levdante –  de la ke ya viene kon polvo de ornear endjunto (aki dizimos «Blancaflor», esta es la marka), lo ke va a entrar en tu mano serrada.
• 2 pilishkos de sal – no muncha porke el kezo ke se uza es salado.
• 1 poko de alzete – no de oliva, mijor de «girasol» o uno suave kon poko savor – puede ser una kuchara de sopa.
• Agua – lo ke sea menester – puede ser unas 2 kupas.

Amasar bastante asta ke kede bien lisa (no agregar mas arina o muy poko).Tomar un piziko de masa i enriva de la palma de la mano azer un boyo aredondo en metiendo la masa para adiendro de la palma de la mano.

Deves ir metiendo estos boyikos adientro de un tepsin kon alzete ke los tape del todo i no desharlos al ayre porke se sekan i no serviran (podemos tapar kon film) i deshar ahi toda la noche.

Gomo (relleno)

• Pazi (acelga)
• 400 gr. Kezo salato «reggianito» o Kashkaval o semejante
• Sal
• Kezo

Kitar al pazi (acelga) los filos duros ke tiene al sentro kada oja, lavar i deshar sekar un poko en un tendjere burakado.

Tomar unas kuantas de las ojas de pazi i meter una oja enriva de la otra (puede ser 4 o 5 ojas) azer un royo (aroscar komo un shtrudel) i kortar fino komo se ve en la foto enbasho.

Meter estas tiras finas de pazi en un paylon en avriendo estos rolyos para ke le entre ayre i dejar de mezmo toda la noche.

Aparte rayar el kezo.

Armado de los boyos:

A la demanyana meter un poko del pazi en una tendjere, echar un pokitiko de alzete i un punyado de kezo rayado i un pokitito de sal. Aparte en un kaziko  chiko (chanaka chika) meter un punyado de arina komun i una punyado de arina levdante por igual i un pokitiko de kezo rayado.

Kon esto apatejafo lo deshamos a un lado para segir kon la masa.

Meter los dedos en el alzete del paylon ande tenemos la masa (non aze menester para esto de uzar alzete muevo) i pasar por la meza (yo uzi el mármol de kuzina) ande se va a lavorar. Tomar un boto de masa del paylon (de kada uno de estos van a salir dos o tres boios reyenados) meterlo a la meza i kon los dedos, muy suave, empesar a estirar desde el medio, kudiando de alevantar tambien los bodres para ke no se keden pegados a la meza.

Kuando ya tiene un sierto tamanyo se kontinua a estirar, ma agora ke el sentro esta delgado se toma de un bodre i ay de levantar un poko la masa de la meza, kon kudiado de ke no se aga un burako. Puede ser ke se aga algun algujero ma si es chiko no tiene importansia, se sige estirando de otra parte i ya sta.

Kuando ya esta muy fina i se puede ver la meza por al traves de la masa ya está bueno. Se esparse enriva de esta masa estirada un poko de la mezkla del kaziko chiko i se korta la masa en tiritas mas o menos de 6 cm, puede ser ke sean unas 5 o 6 tiritas. Se toma un punyado del pazo apatejado i se mete en una de las tiritas i se empeza a aroyar una vez a la siedra i otra la derecha, kuando se eskapa (termina) la primer tirita i todavia se ve el gomo entonses se mete este boyo enriva de la sigunda tirita i se aroya otra ves. Puede ser kada boio va a yevar 2 tiras o dos i media, esto es a ojo.

Tenemos menester (necesidad) de tener preparado otro platiko chiko kon un punyado de kezo rayado. Kuando eskapamos de azer el boyo, ansi komo lo tenemos en la mano, sin soltar, lo metemos de kaveza al platiko de ke o para ke se pege un poko de este kezo por enriva i lo akomodamos en un paylon o fuente para orno. Los boyos sin koser no deven de tokarse unos kon otros i no es menester (necesario) meter alzete en el paylon ni enriva de los boios. Kuando tenemos el paylon yeno de boyos lo metemos al orno. Este orno deve estar a fuego medio i ya kalentado de antes, i los boyos estan prontos kuando se ponen de kolor dorado por enriva.

Komo ven es muy difisil de eksplikar ma vos sueto ke vos salgan muy savrozos.

Yuhulum, me lo komi!!!!!!

Liliana

————

Toka kada foto para ver más grande

Ke lo disfrutesh kon salu i alegria.
Liliana Benveniste