eSefarad Noticias del Mundo Sefaradi
El tyempo esta pasando muy presto. Dainda ayer parese ke mandi la eskrita de la otra semana ya me vino el torno. Siguro en mandandola seya por meil seya por whatsupp kale meter emojis.
Sin emojis no es posivle de eskrivir mesaje, munchas vezes una kara ke riye, es ke es komik, u byen una kara yorando es ke le embaraso, un dedo es ke ya esta dakordo, palmas es ke ya le plazyo. Komo estos miles de semboles, rozas, pacharos, korasones no se kere dicho.
En pasadas me vino un meil de una amiga kon una fotografiya de tefilin. dishe sera del inyeto, le eskrivi “ ijo de buena ventura” por siguro allado vente emojis. Una semana dospues otra amiga me telefona :
——Forti en indo al tefilin del inyeto de Suzan me tomas i a mi?
—— kon grande plazer ma yo no esto envitada
——atyo komodo no te mando meil?
—– si ya me mando
——eee kestas asperando muy bueno te envito
—– no lo tomi por envitasyon
—- ande estas bivyendo? agora es esta manera se emprima una envitasyon i se manda a mil personas, ayde amanyana demanyana a las 8 tomame .
Para ambezar no ay edad, biride kale tomar regalo, no ay tyempo, si agora es esta manera i yo me azere moderna, de vista le mandi un meil kon una foto de una lira de oro i le eskrivi “MAZALTOV”.
Kuando eskrivo me plaze oyir musika. En sintyendo una ermoza musika me vyene mas presto inspirasyon. En la radyo empeso la kantika de ORSON WELLES, esta kantika en tomando anyikos me vyene mas sinyifikativa.
“I know what it is to be young
but you, you don’t know what it is to be old “
“yo ya se kualo es ser manseva ma tu, tu no saves lo ke es ser vyeja.”
Antes 50 anyos si me dizian ke un diya va pensar komo mi madre me riyiya. Akeos tyempos, me burlava de los konsejos ke me dava i munchas vezes me inyervava, agora esto pensando i azyendo todo lo mezmo, en savyendo ke los mansevos no keren oyir konsejos. Achakes de los teatros, syempre tuve relasyones kon los mansevos, es otra enerjiya, otras konversasyones otras ideas. Estar kon eyos es ambezar luguares de komer salatas, de la moda, estar al koryente de las eskolas, de la teknolojiya i lo mas mijor de no bivir por la djente. No ay avlar de hazinuras i de kuras, komo estan todos byen estudyados me ambezo munchas kozas ke no se i tomo plazer. Es kuryozo i eyas topan plazer de konversar kon mi. Kreygo porke ya me ambezi a oyirlos sin kortarles la palavra, no demandarles demandas ke no ay menester, peno a estar en en mezmo nivel.
Es verdad ke tomo plazer de estar kon la manseves, ma no vos pareska ke no tomo plazer de estar kon las amigas de mi edad. Por siguro mi luguar es allado de eyas, a todas las kero muncho byen. Ma de vez en kuando ay unas ke kontan una operasyon ke se izyeron atras 20 anyos, kon la sal i la pimyenta. Por ekzempyo una amiga, ke oyo ke una se va travar el dyente guaydimi ya bolimos…. De vista empesa, de la ora ke salyo de kaza i se suvyo a la araba, se fue al ospital, komo se opero, komo se durmyo i dospues de una ora i medya eskapa ke se suvyo a la araba i torno a kaza. Esto se konta en kada fixo. Fin ke una otra amiga sale enmedyo i dize ayde yabasta! la kestyon de medisino ya se serro.
Ay amigas ke son mas de ermanas para mi, dingunos ke no mos manken, ni las mansevas ni las ke pensan komo mansevas. Kale saver la valor porke
“la manseves es una ves”.
Forti Barokas
Fuente: turkisrael.org.il
