eSefarad Noticias del Mundo Sefaradi
Tenia el onor tomar parte en el enkontro del Salon Ladino por la Memoria de muestro kerido Selim Amado De Bindicha Memoria ke se izo en el Bet Avot Rekanati Lunes 1 April.
Era un enkontro yeno de emosiones, enteresante i kaptivador.
Tomi la permision para kontar sovre la primera ves ke lo konosi a Selim, antes de 15 anyos en el sirkolo de’l Ramat Hasharon, kuando termini mi konser vino sinyor Selim me abraso kon las agrimas de alegria, i me konto ke mi granpapa Haham Itshak Karmona lo ambezo a el la parasha de la Bar Mitsva suya, tambien me disho ke tengo la boz de mi granpapa (ansina diziyamos en Izmir, nono)
Tambien kero kontarvos ke depuez de tanto anyos ya konosi a muestra kerida Rachel Bortnick, mos abrasimos kon bezos, me emosyoni muncho a verla i no solo virtualmente. Tenia tambien el onor a ver muestro amigo kerido Yeuda Hatsvi.
Por el memorio de Selim kanti la kantika » a la una yo nasi «, kuande se termino la seramonia kijeron ke kante otra kantika, i les kanti la kantika de Neomi Shemer » La Orasion «.
Vos va meter aki unas kuantas fotografias para ke podesh gozar los momemtos ke pasimos djuntos.
Selim kerido ke era para mozotros un luz, i persona ke nunka mos artamos a sintirlo, una persona komo se dize en ebreyo » MALE KE RIMON «-yeno komo la agranada, una persona muy Savya.
Mos mankas muncho, repozate kon paz entre los Malahim.
Moshico Cohen
Fuente: Ladinokomunita
