eSefarad Noticias del Mundo Sefaradi
Keridos amigos i amigas
En el Jewish News de esta semana tenemos el artikolo de «Yossi Aron» ke trata de los Kabalistos i Rabinos Grandes Sefaradis ke bivIan en TZFAT i ke eran enterrados en MERON. Eyos desharon una legasia ke se sige mismo oy kon vijitas de Judios de todas partes del mundo.
Saludes a todos.
RABI YITSHAK LURIA
En estos tiempos pensamos a Jerusalem ke su estatua es una parte esensial de la Tora. Mos akodramos de las trajedias repetidas del tiempo pasado. Kon el templo en medio de la sivdad se tratava de la Praktika Judia. Mismo en su estado de destruksion se keda siempre una marka de la vida Judia indo asta la Era Mesianika. Pero Jerusalem no era la sola sivdad i una otra era TZFAT. El Mierkoles ke viene ke es el 5 dia de «MENACHEM AV» representa el «Yahrzeit/ Aniversario de muerte» del Mistiko «YITSHAK URIEL» konosido como «ARIEL» o «ARI/Leon» en las ensenyansas de la Kabala. Nasido en Yerushalayim en 1534, izo sus estudios de HALAHA I KABALA en Ejipto ande paso muncho tiempo antes de instalarse en Tzfat en 1569. Esta sivdad era desvelopada komo el Sentro de Kabala basho la influensia del famozo Rabi «MOSHE CORDOVERO» el «RAMAK» Autor del livro «PARDES RIMONIM» «Jardin de frutas». Pero solamente despues de unos mezes de su yegada, RAMAK se murio i el tuvo ke tomar su lugar en la Komunidad Kabalistika. Malgrado el fakto ke ARIEL era asosiado a TZFAT, el no avia bivido ayi muncho tiempo, muriendo de una epidemia. Tenia 37 anyos, deshando una legasia tan maraviyoza ke dura asta oy en el Mundo de la Tora. Otra legasia en Tzfat era la identifikasion kon MERON, el lugar ande Rabi «SHIMON BAR YOHAI» fue enterrado, serka de Tzfat. Se avio echo un lugar de munchas vijitas ande las ensenyansas de ARIEL eran la baza del Estudio de la Kabala. Se puede dizir ke el tuvo un impakto grande sovre el Mundo de los Ortodokses. Su version del SIDUR fue adoptado en el Mundo de los Hasidim.
Su tomba en el sementerio viejo basho la sivdad de Tzfat se izo un lugar de perelinaje de los Judios viniendo de todas las partes del mundo. Se lavan en la MIKVA en un rio. Tienen 2 Shules en Tzfat echas en su nombre. La Shule Prinsipal es Sefaradi nomada ARI ke remplasa la vieja ke fue destruida por un terremoto en 1837. La Ashkenazi ARI es mas vieja. Echa en su memoria. ARIEL era solamente una de las personalidades grandes del Siglo 16 enterrados en Tzfat. Sus kolegas inkluyen tambien al Rabi «JOSEPH KARO» ke eskrivio el livro «SHULHAN ARUH» «Gia de la Praktika Judia». Avia kompilado su lavoro del komentario «BEIT YOSEF» de antes ke era «ARBA TURIM» «4 Pilares» echo por Rabi «JACOB» ijo de «RABENU ASHER» ke bivia en la Vaye del Rhein i en Espanya un siglo antes. Sentia la nesesidad de krear un livro mas fasil a entender. Oy mismo tenemos el uzo del SHULHAN ARUH. Siendo de Orijin Espanyol, segia la Kostumbre Sefaradi. Rabi «MOSES ISSERLES» de «KRAKOW» kompilo el Ashkenazi. Si el model en komun era el de ARIEL, el era de la jenerasion de «JOSEPH KARO». RAV i DAYAN. El BAAL HA TEFILA era Rabi «SHLOMO HALEVI ALKABETZ» kon su legasia «LEHA DODI». Los Mistikos veian esto komo la «ERA DE SHABAT/Deskanso kompleto» ke vendria despues de 6000 anyos de egzistensia en el mundo.
De verdad es difisil de topar un kazal de la Komunidad Judia desde la Era del Talmud ke tenia personalidades diversas i ke avian deshado la marka sovre la vida Judia por siglos i siglos despues.
Trezladado por Shimon Geron, Sydney
