eSefarad Noticias del Mundo Sefaradi
Keridos amigos i amigas,
En el Jewish News de la pasada semana se avla de una istoria de amor ke «Leonard Cohen» tuvo en la Isla Grega de Hydra kon una mujer de Norveja ke se yamava «Marianne Ihlen». El Direktor «Nick Broomfeld» izo un dokumentario de esto i este filmo va apareser en el Festival de Filmos Internasionales Judios ke viene en Sydney en serka.
Este artikolo fue presentado por «Sophie Deutsch» i aparesió en «London Jewish News».
Saludes a todos.
——————————————————————————-
EL AMOR DE LEONARD COHEN
Justo dias antes ke eya se murio, Leonard Cohen embio un mesaje a su enamorada de antes «Marianne Ihlen» kon su kansión «So Long Marianne Bird On The Wire». Despues le disho: «Penso ke te esto sigiendo en serka». 3 mezes despues, en Novembre 2016, su profesía fue realizada i se murio a la edad de 82 anyos.
Lo ke izo Nick Broomfeld fue de meter de los archivos unas fotos a la istoria ke mostra la transisión de Cohen de un novelista ke no resistio al impakto ke tuvo sovre Marianne i Axel el ijo de un kazamiento dezastrozo. En el sentro se topa Hydra ande los ex patriotas krearon una Komunidad Bohemania.
Broomfeld konosia bueno a este mundo indo ayi kuando tenia 20 anyos i estudiava leyes. Se izo uno de los amantes de Marianne. En el tiempo Leonard Cohen estava en New York i su album de kansiones venia de salir. Bloomfeld era muy fasinado por Hydra pero komo lugar era difísil al no tener reglas i estruktura. No se iva tan bueno kon los ex patriotas bushkando una vida alternativa i experimentando kon drogas i relasiones. Kuando unos yegaron al punto extremo, Cohen fue siempre mas disiplinado en toda su vida.
Kuando era chiko, su padre kijo embiarlo a la Akademia Militar en Kingston, pero una vez ke se murio su padre, su madre kijo ke tenga otra vida. Cohen siempre admirava a los militares i era tentado de servir an la Armada Israeliana. Otra influensia fue su avuelo, un eskolar del Talmud ke lo enkorajo a meldar textos relijiozos. En una vijita a Broomfeld, Marianne le demando ke la yeve a «Bath» por un aborto. Leonard siendo tradisional supo ke avian otros abortos. Kuando Marianne avlo en el filmo de no tener kriaturas kon el, se veia ke tenia regretos. Broomfeld tuvo el privilejio extranio de ser konosido en primero por eya. Tenia konfiansa en el i savia ke no seria djuzgada. Pero era una experiensia de disturbio kon unos tiempos de soledad i deseo.
Fue en los anyos 1960 ke Cohen i Marianne tuvieron una relasion avierta. Savia komo meter en kompartamentos kada koza en su vida. En New York, Cohen bivía en el Hotel Chelsea i tenia un amor con «Janis Joplin». Marianne se kedava en un apartamento en Clinton Street. Pensava ke eya no era echa para bivir en New York kon todo lo ke se pasava en Chelsea Hotel. Le plazia a Nick otras mujeres. Era una epoka loka. A Marianne no le plazia muncho Leonard, pero pensava ke tendria un amor ke duraria por un tiempo largo mismo en siendo una relasion komplikada. Broomfeld de su lado reklamava ke Marianne nunka tuvo amargura kon Cohen. Solamente se sentia mala porke el no le merko una kaza mueva en Hydra kuando vendió la suya kuando estava luchando. Leonard i Marianne eran devuados uno a la otra. Marianne aprendio tanto de Leonard i el benefisio kuando eya lo izo lo ke era. Vido a esta relasion komo algo positivo i riko en su vida.
Trezladado por Shimon Geron.
Sydney, Australia
Fuente: Ladinokomunita
