eSefarad Noticias del Mundo Sefaradi
Karos todos
Tradisionalmente tenemos los djudios shakas konsejas i konsejikas, no emporta ni el tiempo ni la sezon. El buto es kitar riza i sonriza, malgrado los malos tyempos i la sufriensa.
Las konsejas son imajinarias o realistikas, i en vezes, afilu el kontador se burla de el mizmo, para fazer a los otros ke riyan…
Vos traigo una konsejika folklorista sovre Sukot.
Dos vizinos moravan uno en frente del otro. El uno prove, ama kontente de su vida, i de lo poko ke tiene, siempre alegre i orozo. El otro es riko, kon kaza grande, i no le manka nada, siempre kon kara seria, sin riza, sin sonriza, siempre keshozo, araviado i amargado.
El prove kada anyo fraguava en Sukot una suka en el kurtijo, i los kantes i bayles se sintiyan al deredor. El riko se enyervava de este bruido, i desidio de preventar este kostumbre.
Antes de Sukot, avlo kon los merkaderes de los materyales de fraguar la suka, i afilu les dio paras para ke no le vendan nada al vizino. El prove bushko i ningunos no le venden, i Sukot ya viene.
Entendio ke el vizino riko no kere ke fieste en Sukot. A la bushka de tavlas, se entro el prove al semiteryo de la sivda, i topo tavlas ke no tienen de menester, tavlas de mizura, o tavlas de entener el chemento etc., tomo i fraguo la Suka, i aide, alegriyas i bailes…
El riko se maraviyo, komo puede ser? Fue ande el prove i le demando: komo parvinites a fraguar la
Suka? de onde tomates los materyales? .
El prove (kornaziko) le konto ke un diya antes de Sukot, vido al Guerko en el deredor, serka de la kaza del riko i le demando: ke fazes aki?, disho el Guerko ke bushka al vizino riko para tomar su alma. Deke, deke? grito el prove, es persona buena, solo un poko selozo, ama por esta razon no se toma una alma! Bueno disho el Guerko, ya lo salvates a tu vizino el riko,lo desho bivo…
I le konto el prove al riko, ke el guerko le dio todo lo ke tiene de menester para fraguar la Suka.
Bueno, disho el riko i lo abraso al prove, me salvates la vida, disho, i se fizieron amigos buenos, i fiestaron endjuntos en una Suka.
Nissim Ashkenazi