LA ISTORIA DE «MAGDA GROZINGER» [1918-2021] trezladado por Simon Geron

Magda Grozinger [Malka Bath Jisroel] nasio en 1918 en tiempo de la epidemia espanyola, en uu kazal chiko en Hungaria. Era la mas grande entre 3 kriaturas en una famiya Relijioza Judia ke al prinsipio era prospera en la Klasa Mediana. Despues se toparon en la mizeria kon la Depresion i el Antisemitismo en Hungaria. La edukasion era importante para eyos i Magda era una eleva eksepsional. Ansi fue akseptada al jimnazium en Debrecen i era una de las 5 ijas entre sienes de ijos. Su marido futuro Alexander era tambien un elevo, pero las ijas siendo estriktamente shaperonadas, no se puedian enkontrarsen. A la fin de sus estudios Magda resivio las mas altas markas. Por razon de las restriksiones sovre los elevos judios en la entrada a la universidad, fue la sola ke gano su lugar. Su marido futuro Sanyl fue akseptado en el Rabinato ke paresia mas fasil a entrar. Magda tenia una pasion por la literatura i el teatro i kijo ser eskrivana. Pero su padre penso ke no seria una karriera de reushita. Insistio ke sea farmasista. No era fasil entrar en este kurso i solamente los ke eran konvertidos al Kristianismo eran akseptados. Eya no se konvertio i pudo entrar solamente despues de 2 anyos grasias a su padre ke tenia kontaktos de influensia. De muevo Magda mostro ke era una eleva extraordinaria i a la fin resivio su diploma i una medaya. Malorozamente esto se paso en el dia ke los Nazistos okuparon Hungaria i no le dieron la medalya. Magda i Alexander se enkontraron en la universidad de muevo i tuvieron una relasion ke durava. Magda le ayudo para ke no sea embiado al Kampo de Lavoro durante la gerra, porke seria fatal para el. Se servio de su konosimiento farmateuko i lo izo bever muncho kafe antes de la examinasion medikal. Esto tuvo un efekto sovre su korason i fue refuzado. Despues Magda lo yevo a Budapest tan ke era posivle de viajar.

Magda i Alex bivieron a traves la gerra. kon papeles falsos lavorando por el Movimiento Sionisto subtereno salvando a otros Judios i metiendo a las kriaturas perdidas kon sus parientes. Era un lavoro peligrozo. Servia komo un courier porke era blonda linda i tenia ojos blu. No tuvieron un kazamiento sivil asta la fin de la gerra. Su ija nasio en 1945 i la famiya se desidio de partir en 1948 kuando los Rusos se preparavan a okupar el pais. Bushkavan a atrapar a los ke estavan en la Rezistensia. Pasaron 2 anyos en Fransia kon la intension de imigrar a Israel i despues se desidaron de irsen a la Australia por razon de las problemas de salud del marido. Otra ija nasio en Fransia yamada «Judith». Sovrebivio solamente unos kuantos dias. La tresera ija nasio en Sydney i se yamava «Mary». Magda tuvo ke azer sus estudios de muevo para ke sea rekonosida. Mismo si konosia poko el Ingles, kompleto sus examenes. Entro en el ospital de ojos en Sydney. Despues de la muerte de Alex se izo una miembra importante de la Komunidad Judia. Aparte de sus kapachidades profesionales Magda era una mujer i una madre dedikda. Lavoro kon su marido i lo soporto en su lavoro en la sinagoga i en la komunidad judia de Maroubra. Perdiendo a Alex muy temprano en 1966 kuando tenia 50 anyos dio todas sus energias a sus ijas i despues a sus inyetos ke los adorava. Se kedo siempre pasionada de las linguas i se torno a la universidad para estudiar la literatura Franseza i Ingleza. Le gustava viajar i eya kon sus ijas izieron el Tur de Evropa i de Israel. Era difisil de segirla kon sus vijitas a tantos muzeos i galerias de arte. A traves su vida se kedo relijioza siendo kometida al Judaismo.
saludes a todos.

Sumetido por»Mary Grozinger»
Trezladado por Shimon Geron, Sydney