eSefarad Noticias del Mundo Sefaradi
La persekusion de los djudios ke avia desbrochado en Sevilia, en el anio 1391, se propajo a Kastilia, Aragon i a otros lugares. Miles de djudios fueron masakrados o baptizados. Estas agresiones fueron segidas por la represion del Estado i de la Eglisia.
Durante la perioda de unos syen anios, empesando de 1391 fin’a la proklamasion de la Ekspulsion, munchos djudios espanioles se konvertieron al Kristianizmo. La gravidad de sus persekusiones es eksprimido por Reuben, ijo del Rabino Nisim Gerundi i un sobrebivor de los masakros:
«…el dezastro se repandio a traverso las komunidades santas del egzilo de Israel en Espania. La sorte de Sdom i Gomora transpizo las komunidades santas de Kastilia, Toledo, Sevilya, Mayorka, Kordova, Valensia, Barselona, Tarega i Gerona, kon sesenta de sivdades i kazales vizinos… La espada, el masakro, la destruksion, la konversion forsada, la kaptividad i la espoliasion eran en el orden del dia. Munchos fueron vendidos komo esklavos a los ishmaelites. 140.000 fueron inkapables de rezistir al barbarismo i se konvertieron«.
Kon las ondas de konversion, una mueva komunidad fue formada en Espania. Estos muevos kristianos se adelantaron muy presto en la shena publika i politika, en alkansando a altos postos en la administrasion i en la ierarkia relijioza.
Portanto, sus reushitad no tadro a provokar el selo i la rankor. Aun ke no mankavan de eksprimir sus renegasion del Djudaismo i, sus asimilasion i devosion a la tradision kristiana, los konversos eredaron la inimistad tradisionala ke avia kresido durante siglos kontra los djudios. Konsiderados komo disonestos i koruptos, los konversos se trokaron en viktimas vulnerables, i kontinuron a ser persekutidos.
Aparte de ser konsiderados komo eretikos, achake de la inkulpa de pratikar sekretamente sus relijion antigua, los konversos fueron de mas diskriminados kon la norma de pureza de sangre, konsiderandolos indinyos de okupar postos altos, privados o publikos.
En una ambiansa, ande la violensia kontra los djudios, era konsiderada en tanto ke un akto de inspirasion divina, los konversos duvieron de konfrontar un estatuo prekario de amenaso i de animositad. Esto empidio sus yena asimilasion i, kon el tiempo desveloparon sus proprias perspektivas i kustumbres, i mismo sus propria liturjia kon una sierta organizasion interna.
La prezensia de los konversos no manko de ser dominante i en el domeno del arte i de la kultura de Espania, i de ser una de sus fuentes iminantes de su kreativitad.
La perspektiva de los konversos se manifesto en primero a traverso el umor. Konosido i basho el apelido deprekatorio truhán, el bufon de la korte se avia konvertido en el siglo XV, en uno de los imajenes karakterístikos de la korte espaniola. Los bufones eran en grande parte konversos. Esto, aparte de ser el rezultado del konsepto kultural djudío del umor, refleto tambien el imajen meprizado de los konversos en la sosietad espaniola. Lo ke fue mas konvenible para los kristianos viejos de burlarsen de los djudios resientes, todo ke estos puederian ser a sus torno, mas fasilamente, skeptikos i ironikos enverso la sosiedad kastiliana.
De esta manera, un koriente de poezia, kononosida entanto ke la poesía cancioneril, emerjo i se desvelopo. Una grande parte de su kreatividad era bufoneria, ande abondava la satira, la impudensia i, mismo la obsenidad, teniendo komo eskopo de entretener la korte real i la aristokrasia, i de gozar de sus patronaje.
El Ropero de Kordova
Nasido en Montoro, Andaluzia, de una famiya djudia modesta, en 1404, Anton de Montoro fue un poeto ke enfloresio durante el reyno de Enrique IV i, Ferdinand i Isabella. Su nombre djudio era Saul. La mas grande parte de su vida, la paso en Kordova, ande muryo probablamente en la primera meatad de los anios 1480. Mizmo ke se avia konvertido, kedo djudio en su korason.
Montoro ke avia admitido aviertamente sus raizes djudios, es una de la mas notables figuras de los kansioneros konversos. Uzo un linguaje de satira i de sarkazmo en la dramatizasion de la detresa de los konversos, en sus lucha kontra la diskriminasion i la persekusion, i en sus esforsos para la integrasion en el Mundo Kristiano. De estos puntos de vista, su kreasion poetika fue unika.
Se mantuvo del komersio de vistidos viejos. Por esto es konosido komo el Ropero de Kordova, un titolo ke el mismo avia adoptado.
El ofisio de ropero tenia un estatuo inferno en la sosiedad kastiliana. Un shastre servia la aristokrasia, i kada uno en pagando su moneda puedia komendar vistidos muevos. Mientras ke un vendedor de vistidos viejos o de vistidos reparados o prontos puedia servir la djente de poder ekonomiko limitado ke no tenia la posibilidad de komendar vistidos muevos i modernos. De este punto de vista, su kondision de ropero, se adapto a su imajen de mizerable i de asendensia de djudio umilde i denigrado, emfasizado en su ovra. Lo ke le favorizo de konformarse en mizmo tiempo, a las performasiones de los kansioneros/bufones, ke uzavan de burlarsen de eyos mizmos.
En una de sus poemas satirikas, se avia adresado a su kavayo en admetiendo ke tiene kreyaturas, inyetos, parientes, i una ermana, ke no se avian konvertido. En una otra poema, intitulada, Montoro a una mujer que todo era tetas y culo, Montoro riposta a una mujer, ke lo avia denigrado en yamandolo «djudio». De mizmo, tuvo polemikos achakes de la degradasion de los konversos ? entre otros ? kon tres poetos konversos renomados: Juan de Valladolid, Juan Alfonso de Baena i Rodrigo de Cota de Maguaque.
Montoro se remarko partikularmente kon sus ultimas poemas ke kompozo entre 1473 i 1474, en segito a los pogromes kontra los konversos en Kordova i Karmona. Estas ovras son un grito de dezespero ansi ke, de revolto i de solisitasion de piatad. En este konteksto, las koplas ke dediko a la Reyna Isabel, son konsideradas en tanto ke una de las mas impresionantes kreasyones literarias del siglo XV.En esta poema, Montoro despues de aver notado sus esforsos i sufriensas para ser un buen kristiano… se eksklama ke es ainda yamado, «viejo puto y judío!» La poema se termina kon la prediksion ke en serka seran formados ogares, i demanda de la Reyna, si en kavzo ke deveria de kemar a los konversos, no seria preferable ke lo aga en la perioda de la Navedad, kuando sus kalor sera mejor apresiado.(*)
Montoro reprezenta, entanto ke un ombre de letras, un «epilogo» i en mismo tiempo un «mesajero». Un «epilogo», por la razon ke, kon la impozision de la Inkizision i de la norma de la «pureza de sangre», los artistos konversos no pudieron mas referarsen kon fiertad a sus apartenensia djudia, i se undieron en una egzistensia de klandestinidad. Lo ke eksplika el fakto ke, en segito a Montoro, dos kreasiones klasikas de la literatura, La Celestina i Lazarillo de Tormes fueron inisialmente ovras anonimas. Un «mesajero», porke la aktidud del kansionero de uzar klasas infernas de la sosiedad en la ekspresion de la ironia i de obsenidad, para atakar las afektasiones de la aristokrasia, konstituo el fondo i la fuente de la emerjensa de la literatura pikareska, ke fue a su torno, un konstituente en la fondasion de la literatura moderna.
Montoro murio probablamente entre los anios 1483 i 1484, en la epoka de Isabel i Fernando, despues ke Sixto IV firmo la Bula de la Inkizision i el Tribunal del Santo Ofisio fue instorado en Kordova.
Aun ke fue famozo komo poeto, Anton de Montoro no niego su ofisio i no renunsio a su apelido, el Ropero de Kordova.
————————————————————————————–
(*) A la reina doña Isabel
!Oh ropero, amargo, triste, / que no sientes tu dolor! / !Setenta años que naciste / y en todos siempre dixiste / imiolata permamisíe / y nunca juré al Criador! / Hice el Credo y adorar, / ollas de tocino grueso, / torreznos a medio asar, / oír misas y rezar, / santiguar y persignar, / ¡y nunca pude matar / este rastro de confeso!
Los hinojos encorvados / y con muy gran devoción / en los días señalados / con gran devoción contados / y rezados / ios nudos de la Pasión; / adorando a Dios y Hombre / por muy alto Señor mío, / por do mi culpa se escombre, / ¡no pude perder el nombre / de viejo puto y judío!
Pues alta reina sin par, / en cuyo mando consisto, / gran razón es de loar / y ensalzar / la muy santa fe de Cristo; / pues reina de gran valor, / que la santa fe alienta, / no quiere Nuestro Señor / con furor / la muerte del pecador, / mas que viva y se arrepienta.
Pues reina de gran estado, / hija de angélica madre, / aquel Dios crucificado, / muy abierto su costado, / con vituperios bordado / e inclinado, / dixo: «Perdónalos, Padre». / Pues reina de autoridad, / esta muerte sin sosiego / cese ya por tu piedad / y bondad / hasta allá por Navidad, / cuando sabe bien el fuego.
————————————————————————
Referensas:
- Jeffrey Gorsky , Better to be Jews than Christians, Anton de Montoro and the Spanish Converts. http://www.jewishmag.com/128mag/spanish_forced_conversion/spanish_forced_conversion.htm
- Francisco Marquez Villanueva, «Jewish ‘Fools’ of the Spanish Fifteenth Century», Hispanic Review, L, 4, (Autumn, 1982), pp. 385-409
- Yirmihayu Yovel, «Converso Dualities in the First Generation: The Cancioneros«, Jewish Social Studies, IV, 3, Indiana University Press, (Spring – Summer, 1998), pp. 1-28
- Marithelma Costa, El poeta y el bufón Anton de Montoro: algunos aspectos dramáticos de su poesía, XVII Jornadas de Teatro Clásico, Almagro, 1994
- Erasmo Buceta, «Anton de Montoro y el cancionero de obras de burlas», Modern Philology, The University of Chicago Press, XVII, 11, Mar., 1920, pp. 651-658
- Anton de Montoro, Encyclopaedia Judaica
- Antón de Montoro, A la reina doña Isabel, Edición de Rafael Herrera Guillén para la Biblioteca Saavedra Fajardo. http://saavedrafajardo.um.es/WEB/archivos/LIBROS/Libro0205.pdf
España tiene que aceptar su vergüenza. Si, nosotros, djudíos, queremos perdonarles, lo haremos si escogimos de hacerlo. Si no, nó!
Olvidar nó tampoco! Hoy día podemos vivir en un estado fuerte, inteligente. Resistimos a todas las presiones politicas que nos hace el mundo exterior. El día que queremos podemos machucar a nuestros enemigos. En los tiempos de Isabel, maldicha que sea, no podiamos hacerlo. Si los sacerdotes católicos, tuertos de cabeza, de la Inquisición, existian hoy y quisieran matarnos, les pondriamos un Jericho con cabeza nuclear justo encima de su catedral. España lleva en sus hombros una maledición muy pesada. El que la castigará es nuestro Señor del Universo, omnipotente, que no tiene ni mujer ni hijo!