eSefarad Noticias del Mundo Sefaradi
Saludes i vidas buenas, de el lugar ke me topo, a todos los keridos.
La semana pasada, sali de mi sujetto; para esplikar un estado. Tornaremos a la kesion nuestra.
Sovre las provas de muzika, ya eskrivi. Oy va provar a kontar; los aparejamientos, para la prova jeneral.
La prova jeneral se aze; una semana antes de la data, ke tenemos de salir en shena. A esta prova, se envita jeneralmente; miembros de las famias de todos los ke toman parte en el djugo. Para las artistas i artistos, es una okazion: de puder konsintir djente ajena, ke se asentan i los ven de serka. Ansi ke la eksitasion, sera maz alta de lo ke konsintieron en las provas.
Para los ayudantes; es un egzamen, ke deven de provar a kumlir sus dover en una manera ekzakta i mezurada kon tiempo realo.
Para el rrjisor sera la okazion de entender: si el mesaj ke pensa de pasar a el ekspektador; funksiona komo penso, i si no, se anbezara kualo enderechar, la semana de alkavo. Ansi kompletar el djugo, komo deve de ser.
Jeneralmente, en la prova jeneral, no se keda el djugo para korijar. Ni en estado ke la artista o artisto, por la razon ke estan kon una grande emsion; se olvidan (Blackout) el tekst. Ay ke kontunear kon el djugo. Ansi se prova la posibilidad de endjeniar en shena. Ke ez una koza difisil. No enporta, kual de las artistas prova a enjeniar o en ke manera lo aze. Lo emportante sera, ke el djugo kontuneara. Kon la esperansa ke tengamoz una semana de sanedad i alegria.
La verdad, komo siempe me asentii frente la komputadora para empesar. Enduna sono el telefon, mi espoza feu la ke respondio, de manera ke se adelanto la konversasion; se entendia ke egziste una problama. Me alevanti a entender lo ke pasa. Mi kunyado el chiko «Rafael Sadi» ganeden bueno tenga, moz desho las vidas buenas…
Este avizo era una koza, difisil de entenderlo. Mansevo, ke no sintimoz degun dezrepozo en los dias de alkavo. Komo puede ser?! El buen Judio se fue a echar a durmir la noche, sin pueder espertar demanyana.
Kuando entri en kaza de mi espaza, lo ke teniya solo 11 anios. Lo ke kero dizir ke para mi era komo segundo ermaniko…
Sano ke este su ijo estava en viaje, ansi ןke deviya de okupar kon los aparejos… desorte serri la komputadura i salimos ala kaye.
No penso de eskrivir la vida aki, esto ya lo izo Rafael en vida. Siendo ke el mi sujetto es » la fin de el tiatro ladino» kero notar siertas memorias ke tuvimos kon Rafael en el anbiente de tiatro.
Rafael nasido en Istanbul entre todo; teniya una experiensa en la shena, siendo ke fue miembro de «Yildirim spor».
Kuando meti en shena el jugo yamado » Bustan Sfaradi» de el onoravle senior Yitshak Navon; Rafael kumplio la ovra de el primer artisto.
Esto i mas; eskriviendo el jugo (Bizim Karakol) (LA POLISIA MUESTRA) ke se jugo en la lingua Turka, me avia consultado kon el, para deklarar siertas kozas ke pasan en la estasion de polisia. En mizmo tiempo el tomo lugar komo primer artisto en el jugo.
Rafael era persona, ke le gustava ayudar a la djente, si tomo a eskrivir los pasajes ke fueron espartidos entre nozotros, nesesito a eskrivir un livro entero.
Ganeden bueno tenga. Kon esperasnsa de enkotrar a todos, i ala semama ke vyene kon sanedad.
Albert Anah.
(A kontunear)
Bizim Karakol 1992 yılında Albert Anah tarafindan yazılıp sahmelenmiştir.
Fuente: BÜLTEN de los Turkanos de Israel – turkisrael.org.il
