La boz de Yehuda: «Quaker»

En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.

«Quaker»

A vezes me ambezo de la Biblia ladinada nombres de animales o plantas i kultivos. Por egzempio, kuando mos konta la Tora por la ferida del piedrisko/granizo sovre Ayifto, mos mensiona tambien kuala fue la situasion del lino, del trigo, la sevada i la espelta, por kavza del piedrisko.

Me maraviyi ke la avena no se nombra del todo en toda la Biblia, i la primera vez ke se enkontra en los eskritos de muestros hahamim fue en la Mishna. El nombre ebreo de la avena, komo uno de los sereales,
es «Shibolet Shual» (ke sinyifika -en kurto- «los pelos de la barvika de la rapoza»). Este es un nombre bien figurativo, ma en realidad, (segun me eksplikan los agrikultores), la avena nesesita una klima mas yelada de la ke egziste en Erets Yisrael. Dunke, mas probable es ke en tiempos antiguas kresiya en los kampos komo una planta silvestre (yaban), i se utilizava, lo mas, komo un buen pasto para las bestias domestikadas.

A la America arivo la avena kon los imigrantes de Escocia, i se vendiya komo un substituto nutriente por el pan (en lugar del trigo). Ma, es solamente en los ultimos anyos del siglo 19 ke unos fabrikantes reusheron a «prosesar» los granos duros de la avena i darmos el produkto ke konosemos oy komo flokos («eskamas»), livyanikos, i ke se kozen bien prestiko para preparar papas («porridge» en ingles, «mazamorra» en espanyol).

Sovre el kuti de tenekiel de la avena aparese un ombre maduro de la sekta kristiana yamada «quakers» vestido a la moda del siglo 18. Este imajen mos kyere dar una aparensia de konfiansa i sanedad. No se si es verdad o lejenda, ma segun se kreye es el imajen de William Penn (ke dyo su nombre tambien al Estado de Pennsylvania en USA).

De toda manera, el produkto se vende mucho en los merkados de Israel. Pokos lo konosen komo «Shibolet Shual»; lo mas de djente lo yaman «Kuwaker» asta oy en dia.

Shabat Shalom!

Yehuda Hatsvi
Erets Yisrael
Para Ladinokomunita