eSefarad Noticias del Mundo Sefaradi
Livro de kuzina sefaradí
«Nihoah pilpelim kluyim» – «Aroma de pimintones asados»
En estos dias salyo a luz un livro muevo en el kampo de la kulinaria sefaradi. El livro, es en ebreo, titulado «Nihoah pilpelim kluyim» («Aroma de pimintones asados»).
La autora, Ruth Davidov-Shaul, komensa su livro kon una revista amplia, deskriviendo las raizes de los Judyos sefaradim en jeneral, i los de su famiya en partikolar.
A kontinuasion, avla la autora sovre la kulinaria sefaradita, refranes, kostumbres i dichas folkloristikas, i tambien unas kuantas konsejikas simpatikas («para avrir la gana»), relasionadas a las komidas i la alimentasion.
Aparte de las fotografias ke akompanyan a las resetas, ay en el livro unas ilustrasiones maraviyozas,
(en la teknika artistika de collage), kreadas tambien por Ruth Davidov-Shaul.
Las resetas mos avren una ventana grande para konoser a los gizados al uzo de los djuyos de Bulgaria.
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
