eSefarad Noticias del Mundo Sefaradi
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí.
Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita
Lag BaOmer
En una de las entrevistas, le demandaron a Mao tse tung (1893-1976), el presidente de la Republika popular de China:
– «Ke es tu opinion sovre la la Revolusion Franseza (1789) i sus rezultados?»
Mao respondio:
– Oy en dia, dayinda es muy temprano de evaluar a este evento istoriko. No tenemos bastante perspektiva».
En el mundo judyo se selebra oy la fiesta de Lag baOmer. En mi sentimiento personal, este dia es antes de todo un dia de komemorasion a la revolta (yamada la revolta/rebelion de Bar-Kohva) kontra el Imperio Romano, en el anyo 70. La fayita de los judyos en esta gerra era kaje prevista; ma era esta una gerra djustifikada en absoluto? Si o no?
Me parese ke asta oy, 2012, no tenemos una repuesta definitiva. Es kuryozo ke si ago alguna inkuesta entre djente en Israel, puedo saver (segun las opiniones resividas), i «endevinar» kien i kien son los parisipantes en la inkuesta, i sus apartenesia politika aktual.
Dunke, komo mos disho Mao tse tung, «dayinda es un poko temprano para evaluar». I siendo ke no enkorajamos aki en LK diskusiones politikas, esperaremos ayinda mas tiempo para tener una perspektiva mas apropiada i klara.
Segun muestra tradision, djusto en este dia murio el savio Rabi Shimon Bar-Yohay, el gran Kabalista. Rabi Shimon Bar Yohay enkomendo a sus dishiplos de azer fiesta grande i alegre en el dia de su muerte.
En realidad ya lo aviamos meldado en el livro de Koelet (kapitolo 7):
«Mijor es la buena fama ke el buen azeite, i el dia de la muerte ke el dia del nasimiento».
Entonses, vos puedo kontar ke djustamente en estas oras ya se adjuntaron mas de 200000 judyos -buenos, alegres i kontentes- en una grande selebrasion en la montanya de Meron, ande repoza Rabi Shimon Bar-Yohay su deskanso eterno.
Aki en basho vos do a meldar (kuando tendrash ganas i tiempo libero) un chiko artikolo mio (publikado en el anyo pasado) sovre el atadijo entre Lag baOmer i la Kabala.
Rabi Shimon Bar Yohay es uno de los savios mas admirados por el puevlo judyo.
En muchas komunidades de sefaradim se uza nombrarlo (en dos-tres estrofas chikas de un kante largo) kada noche de Shabat; en otras varyas okaziones judyos rogan al Dio i eksijen salvasion
«por Zehut de Bar-Yohay».
El kante (o mijor dizir Piyut) mas famozo a la memoria de Rabi Shimon Bar Yohay fue kompozado (en 1550) por Rabi Shimon Lavi.
El Piyut, yeno de glorifikasiones ensima Bar Yohay, tiene 10 estrofas (paralel a las diez Sefirot/esferas (emanasiones) de la teoria de la Kabbala.
Bien entendido ke el Piyut tiene «mil i un» remez i aluziones sekretas bazadas en la Biblia i del livro del Zohar. Es posivle ke la melodia fue tambien kompozada por Rabi Lavi, ma durante las jenerasiones enkontramos unas kuantas variasiones, i afilu otras mas melodias, segun las varyas komunidades.
Aki vos do un «enlase» para eskuchar al hazan Moshe Vital kantar el refren del Piyut al uzo de los Judyos de Turkia. Eskuchar>>
Rabi Shimon Lavi, mediko, astronomo i poeta, nasio en 1485 en Castilia, Espania. En la ekspulsion de 1492 imigro kon su famiya a Fes en Maroko. El governador era Mulai Sheik (1472-1505) ke resivio a los jidyos ekspulsados kon brasos aviertos. En 1549 desidio Rabi Lavi a irse a bivir en Erets Yisrael, su aspirasion de siempre. En pasando via la sivdad de Tripoli (en Libya) se le estrindjo el korason de ver el hal negro (la mala situasion) de la komunidad judia aya.
La komunidad judia de Tripoli sufrio mucho i en 1510 tambien, kuando el jeneral espanyol Pedro Navarro, kon sus 50 barkos de gerra i 11000 soldados, izo asedio sovre la sivdad, i la konkisto.
Tripoli sufrio otra una desgrasia en 1551 kuando los turkos konkistaron a la sivdad, i muchos, judyos i otros, fueron matados durante las batalyas de la konkista.
Rabi Shimon Lavi kedo en la sivdad para giar i dirijir a la komunidad durante 39 anyos, asta su ultimo dia. El es renomado no solamente por su Piyut «Bar Yohay» ma tambien por su livro «Ketem Paz» («Oro fino»), ke es un perush muy profundo al livro del Zohar. (Vos akodro, ke segun muestra tradision, el livro del Zohar fue eskrito por Rabi Shimon Bar Yohay).
———————————————————————–
El Atadijo entre Lag-baOmer i la Kabala / Yehuda Hatsvi
En el judaismo ay una dicha ke dize: «El Minhag (kostumbre) de Yisrael – es din (Ley)».
Me parese ke la fiesta de Lag Baomer, korresponde bien a esta dicha.
La Tora mos enkomenda a kontar siete semanas desde el moed de Pesah asta el moed de Shavuot. Esta kuenta de 49 dias, dia por dia, la yamamos en ebreo Sefirat aOmer. Segun muestra tradision, el puevlo de Yisrael resivio la Ley en dia de Shavuot antes mas de 3300 anyos, (i la resive -o mijor dezir, la adopta- kada anyo de muevo).
Muestros hahamim enshemplaron este evenimiento alegre komo si es un kazamiento de amor entre el novio Yisrael kon la Tora ke es la novia amada.
Dunke en metafora podemos imajinar ke esta kuenta del Omer es komo si fuera el novio (Yisrael) impasiente, kontando «kon alma akorada» los dias asta el dia de la Hupa.
Al pareser, ke estas semanas ermozas de primavera i de fiestas alegres se ennuvlaron por kavzo de la revolta de Bar Kohva kontra el imperio romano (entre los anyos 132-135). El rezultado de esta gerra (ke en mi opinion era djustifikada ma «kontra todas las posibilidades»), fue un desastre a muestra nasion. Pero, aun kon todo, no savemos komo entraron las reglas i las kostumbres de avelut (luto). Por un solo egzempio vos konto ke el Rav Hay Gaon (939-1038) bien renomado por sus miles de responsas rabinikas, ayinda teniya de tratar a eksplikar los varios uzos i los distintos sentidos de duelo en los dias de Sefirat aOmer. Esto mos mostra ke la kostumbre no fue bien konosida en akea epoka.
En medio de estos dias mos aparese la fiesta de Lag baOmer (33 del Omer) sin ke sepamos por seguro la razon de su egzistir. Mos kontan por 24000 elevos de Rabi Akiva ke muryeron en una magefa (peste), ma en este propio dia asezo la epidemia. A mi, personalmente, me sona komo un argumento muy frajil. Ma, el nombre de Rabi Akiva en este konteksto me yeva a bushkar otro sendero.
El gran savio Rabi Akiva era el «ideologo» de la revolta kontra los romanos asta rekonoserlo a Bar Kohva komo el mashiah; este fato mos amostra el otro lado de Rabi Akiva: No solamente okupado en el mundo real i praktiko de la Alaha (ley Talmudika), ma tambien embolvido en las onduras peligrozas de la Kabala.
En el Talmud (masehet Hagiga 14) topamos un kuento sovre «los kuatro ke entraron al «Pardes». (Literalmente, «pardes» es «verjel»). Kuatro entraron a a revelar «los sekretos de la Divinidad»… Ben-Azai miro, i murio; Ben-Zoma observo i salio loko; Ben-Avuya abolto a ser eretiko (kofer); Rabi Akiva salio bivo i sano.
Este kuento talmudiko me gia, afilu sin kerer, a Rabi Shimon Bar-Yohay, un elevo de Ribi Akiva. Segun muestra tradision, Rabi Shimon murio en dia de Lag baOmer, i fue enterrado en la montania de Meron en Erets Yisrael.
Rabi Shimon Bar-Yohay se nombra mucho en el Talmud en relasion a varyos debates; ma mas de todo el gano la admirasion del puevlo por su livro de kabala konosido komo «El Zohar».
(En parantez vos akodro ke ay investigadores ke insisten ke el Zohar fue eskrito, o al menos editado, por Rabi Moshe de Leon (1250-1305), nasido en Guadalajara, Espania.
Ma esta teoria no kave en el kuadro de este chiko artikolo).
Desde el siglo 16, empesaron los kabalistas de Safed la tradision de azer «ziara», vijitar la fuesa de este savio i kabalista antiguo. Kon el tiempo, i asta muestros dias, esta kostumbre se izo una festividad grande kon muchidumbre de partisipantes de todas partes del pais.
Es posivle ke una de las raizes del uzo de ensender fogueras en la noche de Lag baOmer estan enfinkadas en el kuento ke aparese en el livro del Zohar, diziendo ke en el dia ke paso Ribi Shimon Bar Yohay al mundo de la verdad, se incho su kaza de una luz grande i misterioza.
Ribi Hayim Vital (1543-1620) avia kontado ke el gran kabalista Rabi Yitzhak Luria Askenazi de Safed, trusho a su ijo de tres anyos serka de la tomba de Bar-Yohay, para araparlo (kortar su kaveo) por la primera vez.. Esto fue egzaktamente en dia de Lag baOmer.
Muchos en Erets Yisrael sigen esta kostumbre. No todos saven ke en este uzo tambien se eskonde una intension kabalistika: a dedikar a los ninios al kulto.
Esta aluzion kabalistika esta bazada sovre un pasuk en el livro de Vayikra (19, 23): «I kuando plantaresh todo arvol de komer…….tres anyos vos sera komo serrado (insirkunsizo). Su fruto no se komera. I al kuatren anyo todo su fruto sera santedad de alavansas a Adonay».
El dia de Lag baOmer es un dia okulto, yeno de sekretos de kabala. Ma, al pareser, ke el puevlo oy esta «kristalizando» un diferente, i mucho mas alegre, karakter de esta fiesta, al enkontro del moed de Shavuot.
Yehuda Hatsvi
Erets Yisrael
Fuente: Ladinokomunita
