eSefarad Noticias del Mundo Sefaradi
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí.
Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita
La Fiesta de las Frutas
Al enkuentro del mez de Shevat, venid avlaremos un poko sovre la fiesta de las frutas.
Esta fiesta ermoza i savroza, la selebramos en el kinze del mez de Shevat, kuando «la luna en kinze».
Es un poko kuriozo, siendo ke desde siempre, el Rosh Hodesh (el primo de kada mez ebreo) es en la tradision de muestro puevlo un dia festivo. Indemas, en los tiempos de Bet-aMikdash, kada Rosh Hodesh era tambien komo un Rosh- aShana chiko.
Entonses, el primo del mez de Shevat era devido ser el Rosh aShana de los Arvoles.
Pero en konsekuensia de un debate (antes kaji 2000 anyos), entre los savios de Bet Shamai i Bet Hillel, se fikso ke esta fiesta sera selebrada en el kinze de mez de Shevat.
La razon fue nada mas ke ekonomika: Bet Hilel reprezentaron a los agrikultores del Galil i de las montanyas de Erets-Yisrael, ke en el primo de Shevat ayinda aze aya frio, i no konviene de kontarlo komo una anyada mueva de arvoles i frutas.
Aun kon todo, no ay mucho de kontar sovre el 15 de Shevat asta el siglo 16, ke en akeyos tiempos, los kabalistas de Safed, kon el dezeo ke teniyan por la Geula, elevaron a este dia, i ordenaron de komer, (espesialmente en noche de la fiesta), frutas de la Tierra Santa, i dizir siertas bendisiones i orasiones, Esta kostumbre ke empeso en primero entre los Sefaradim, se espandio despues en todas partes del puevlo Judio en la diaspora.
Entre los Kabalistas de Safed, la seremonia de la fiesta era komo la del «seder» de Pesah. Se adjuntavan al derredor de meza endorada de flores i kandelas asendidas, i komiyan las frutas, i meldavan paragrafos de la Biblia, del Talmud i del Zohar.
Es interesante, ke en realidad el plan i los detalyos de la nochada de esta fiesta, fueron eskritos en el livro Hemdat Yamim ke su autor es -al pareser- Natan Eskenazi (1643-1680), konosido komo el profeta de Sabetay Sevy, el mashiah falso.
La Fiesta de las Frutas en boka de muestros padres Sefaradim, tomo desde el empesijo del siglo pasado, un nombre mas: «Tu biShvat».
En ladino se kompozaron para Tu bishvat varyas koplas, ma malorozamente-
ya no mos akodramos de las melodias de estas komplas.
En esta noche de las frutas se perkurava mucho de merkar, a tanto ke se topava en el merkado, alguna fruta mueva, para dizir la beraha de «She’ehuyanu».
Por seguro ya konosesh la dicha: «un She’ehiyanu vale mil dukados».
En el «seder» de Rosh aShana tambien, en el segundo dia (en la diaspora), se uza dizir la bendision de She’ehiyanu, jeneralmente sovre agranada (mangrana).
En el sentro de la meza de Tu bishvat bien kave el Ashure.
La lejenda dize, ke el ashure fue inventado por Noah, ke en saliendo de la arka (de la Teva) despues del deluvio, tomo de todas frutas i komania ke le sovro, i izo todo una meskla, ke se yama en turko Ashure.
Otra una komida dulse ke se uza en Tu biShvat es el Trigito: Trigo buido i gizado asta ke se ablanda, kon asukar o miel, i kanela.
En dia de Tu bishvat ay una kostumbre de echar trigo o migitas de pan al kortijo para los pasharos, ke koman.
La raiz de este Minhag es una lejenda mensionada en el Talmud:
Muestros padres en el dezierto resivieron, de los sielos, el «man», (lo ke yamamos en muestra lingua mana, o magna), Moshe Rabenu enkomendo al puevlo ke en Shabat, el dia de olgansa, no van a topar la magna en el kampo. Entonses, en dia de viernes arrekojeron los ijos de Yisrael dos tantos de magna.
Segun mos dize la Biblia, la mana abastava en el dezierto, ambos por dia de viernes i para dia de Shabat.
Ma ke izieron Korah, Datan i Aviram, los rebeldos?
Eyos kijeron mostrar ke Moshe no avla verdad.
Dunke, salieron en dia de Shabat, muy temprano de la maniana, i empesaron a dispersar magna en el kampo.
En mientres vinieron muchos grupos de pasharikos i komieron todo el man/mana ke estava en el kampo.
Kuando salieron los Ijos de Yisrael a bushkar la mana en el kampo, no toparon nada, komo ansi disho Moshe.
Por zehut de este favor «servisio» de los pasharos, les ofresemos trigo para ke gozen i eyos el Tu biShvat.
Makare, esta fiesta de los arvoles aga kreser mas i mas alegrias, a nos i a todo Yisrael.
Yehuda Hatsvi
Israel
buenas tardes.
Soy una persona que desde España pretende aprender Ladino, cosa harto dificil por la falta de medios, pero quiero animaros y agradeceros en vuestra continua lucha por mantener vivo un tesoro de la humanidad como es el idioma y la cultura ladinos.
desde eretz sefarad, Paco
p.d.: espero mi proximo comunidado sea en ladino,,,