eSefarad Noticias del Mundo Sefaradi
Ver todos los artículos de esta sección
En mi chikez, en la eskola primaria, me fasino eskuchar a mi maestra, i ambezar de su boka, sovre la vida de Benvenida Avrabanel, la rika i brava mujer entre los siglos 15 i 16.
Espesialmente me intereso el atadijo de Benvenida Avrabanel kon David aReuveni (konosido en muestra estoria komo un Masiah Falso. Ma, ke en diferente de los otros, el trusho kon el una idea, o estratejia, de azer una aliansa kon los reyes de Evropa, i levanter una armada de judios i kristianos para gerrear kontra el Sultan turko i konkistar la Tierra Santa)
Benvenida Avrabanel, entre otras aktividades, fue la ke brodo una bandiera impresionante para David aReuveni.
La vida de Benvenida Avrabanel ensendio mi imajinasion en mi chikes, i muchos anyos pensava yo a eskrivir algun livro en el sujeto. Ma, mi destino me yevo a otros kaminos, i ansi ke no lo ize.
Al pareser, este livro espero asta oy a la mano de Zehava Chen-Turiel, una autora talentuoza, bien konosida por sus otros livros interesantes, todos tratando de famiyas i eventos de los judios sefaradim, ladinoavlantes.
Su muevo livro (en ebreo) “la bankiera de Napoli” esta yeno de aventuras i eventos, empesando en Israel de oy, yevandomos etape detras de etapa, a la vida de Benvenida Avrabanel tambien.
Es un gusto espesial a meldar este livro eskrito por Zehava Chen-Turiel, i gozar de kada oja i oja.
Semanada buena i klara!
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
