eSefarad Noticias del Mundo Sefaradi
Ver todos los artículos de esta sección
En mi chikez, le avia preguntado a mi padre “kual es el orijin de la palavra “haftona”.
El me respondio: – “No se. Ma yene te kontare.
Un dia, en 1930, ayinda en Salonik, me kombidaron komo un paytan voluntario a la kehila de los «mashemehos» (lehlis, muestros ermanos ashkenazim), para partisipar en la tefila de Shabat, i despues kantar unos kuantos piyutim en la tanda. ”Tanda”, komo ya lo saves, es un enkontro de los yehidim/miembros de la Kehila kada Shabat, despues de la tefila.
En la tanda uzamos de adjuntarmos, komer algunas buenas borekas, mezetes, guevos enhaminados, kon algun vaziko de «Maim Azim” (raki). Ma, lo mas importante en este enkontro es para eskuchar a los hazanim i paytanim kantando piyutim.
En akel dia de Shabat en la kehila de la “Moshka” (Moskova?), se avrio un “moabet de tanda”, i uno de los yehidim demando al rabino:
– “De ande mos vino la palavra haftona? del ebreo?”
– “De ande para ande??” respondio el rabino en preguntando una vez mas (ke ansi es el uzo de los lehlis a responder kon pregunta).
– “Komo ya savesh” -kontinuo el rabino- lo tenemos eskrito en el livro de Mishle: «El ke detiene su vara/verga, aborrese a su ijo; ma el ke lo ama, madruga a kastigarlo». Dunke, la palavra “haftona” la emprestimos del turko”.
– “Del turko?” salto uno de los yehidim, ayinda kon un bokado de pastel en la boka.
– “Si, si!” disho el rabino. “Mirando aki. La palavra “hafta” en turko es “semana”. i “haftada” es: “por semana”. Entonses, kada semana, en salida de Shabat, ay de kastigar a los ijos i darles una buena haftona”.
– “Ke manera? porke? deke?” demando un otro miembro.
– “Deke? porke?” disho el rabino “Si tu no saves porke, tus ijos por seguro ya savran por ke!»
* * *
Mi padre termino su kuento, i yo lo miri en la kara kon un poko de konfuzion.
– “No lo tomes en serio” me disho. “Ansi es el umor de muestros ermanos ashkenazim”…
Semanada buena!
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
