En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, kada mes va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.

ENSENDER LAS KANDELAS DE SHABAT

La bendision de kandela de Shabat (en judeoespanyol), es:

«Bendicho Tu Adonay nuestro Dio, rey de el mundo,
ke nos santifiko kon sus enkomendansas, i nos enkomendo
por ensender kandela de Shabat.»

De aki endelantre, me parese, ke kada mujer es libre de orasionar i rogar al Dio en simples palavras, asegun dezea su korason, i demandar vidas i todo bueno para su propia famiya i por todo Yisrael.

En el Siddur «Tefilat Kol Pe», imprimido en Vienna 1891, topo eskrito lo siguente:

(bueno ke diga la mujer esta rogativa ANTES de ensender kandela de Shabat):

«Patron de el mundo, ek, yo vinien por ensender kandela de Shabat
por afirmar la enkomendansa ke Vos enkomendates por ensender
kandela en dias santos. Sea veluntad delantre de Ti, Adonay mi Dio
i Dio de mis padres, ke muchigues en mi kaza luz de alegria,
i bendision, i paz, i vidas buenas, i arrelumbres nuestras almas
kon luz de Tus fases.

Bendicho Tu Adonay nuestro Dio, rey de el mundo, ke nos santifiko
en sus enkomendansas i nos enkomendo por ensender kandela de Shabat.»

(despues de ensender, dira):

«Sea veluntad delantre de Ti, Adonay mi Dio, i Dio de mis padres,, ke agrasyes a mi i a mi marido, i a todos mis keridos, i todo Yisrael Tu puevlo, kon vidas buenas i largas, i prosperamiento de todo bien, i membres a nos kon membrasion buena, i nos bendigas bendisiones de siempre, i NON sea en nos desijado ni desijada. I nos mereskas a ijos machos i entendidos, temientes de Ti. I ago mi rogativa delantre de Ti, ke por Zehut de muestras madres Sara, Rivka, Rahel i Lea, ke alarges luz de nuestra vida ke no se amate, i arrelumbra Tus fases a nos, i salvamos en prisa en nuestros dias. Amen»

Aki abasho, vos do una de las versiones de orasion (en J-E), i me imajino ke ay i otras mas versiones:

Venid resiviremos al Shabat.
Sea su briyo iluminando muestros korasones,
en ensendyendo estas kandelas.

Luz es el simbolo de la Divinidad (de la Shehina)
«Adonay es mi luz i mi salvasion» (Tehilim 27, 1)
Luz es el simbolo de la Divinidad en el Benadam
«Kandela de Adonay es la alma del ombre» (Mishle 20, 27)
Luz es el simbolo de la Ley del Dio
«Porke kandela es la enkomendansa, i la Ley es luz» (Mishle 6, 23)
Luz es un simbolo de la mision de puevlo de Yisrael
«Yo, Adonay, te yami en djustidad, i sostenare tu mano,
i te guadrare, i te dare por firmamyento de puevlo,
por luz de las nasiones» (Yeshayahu 42, 6).
Entonses, en el kamino de muestra tradision antigua,
ke santifika i auna a Yisrael en todos los paises, i en todos los tiempos, nozotros ensendemos las luzes del Shabat:

Bendicho tu Adonay nuestro Dio, rey de el mundo,
ke mos santefiko kon sus enkomendansas, i mos enkomendo
de ensender kandela de Shabat.

Adonay bendizira a nos (i a todo su puevlo Yisrael) kon la paz, la alegria,
i la santedad de Shabat.
Amen.

Shabat bueno i alegre !

Yehuda Hatsvi
Erets Yisrael
Para Ladinokomunita