eSefarad Noticias del Mundo Sefaradi
En una tadrada de la semana pasada, se enkontro (el la sala del Bet Avot Recanati), un grupo de ladino-avlantes.
El Bet Avot Recanati ye se izo de kuando uno de los sentros kulturales de los sefaradim en Israel. Ma, la tadrada por la kual vos konto, fue emosionante en partikolar: los prezentes todos son ijos de sovrebivientes de la Shoa.
(En realidad, digo yo, ke todas las famiyas de jidios de Salonik, i Gresia en jeneral, ke izieron Aliya a Erets Yisrael antes de 1939 – son realmente los sovrebivientes del Olokausto).
Kurto, la tadrada en Recanati fue un enkontro espesial para konkluir las impresiones i los sentimentos de kada uno i una de este chiko grupo en akel viaje triste ke tuvo lugar en la maldita tierra de Polonia, en los sitios ke azen estremeser a kualkier judyo: Auschwitz, Treblinka, birkenau.
En la foto ke en el anekso podesh ver a Sara Bejerano, una de las partisipantes, dando sus relatos del viaje. Tambien se ve en la foto al Prof. Shmuel Refael, a Roni Aranya, Yehuda Saporta, Orit Salinas, i otros.
Kon el enlase, aki mas abasho, podesh asistir virtualmente, en la seremonia de la Ashkava a la memoria de los ke peresieron trajikamente en la Shoa.
Yehuda Hatsvi
Erets Yisrael
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
