eSefarad Noticias del Mundo Sefaradi
Ver todos los artículos de esta sección
I LO KONTARAS A TU IJO
Yehuda Hatsvi
Keridos amigos i amigas,
El kuento ke vos konto oy, es bien konosido en Israel, ma me parese apropriado a kontarlo esta noche al derredor de la meza sel Seder, en judeoespanyol tambien:
En 1954, David Ben Gurion, el ke era el primer ministro de Israel en akel tiempo, viajo a los Estados Unidos a enkontrarse kon el prezidente Eisenhower.
En uno de los enkontros, fue prezente i John Foster Dulles, el Sekretario de Estado, el kual le demando, (kon un poko deburla), a Ben Gurion:
– “Dime, senyor premier, a kien reprezentas tu, o tu Estado de Israel?
Es ke a los judyos de Russia, Maroko, Irak, Yemen o Turkiya?
Es ke son los mizmos, despues de 2000 de exilo?
Dunke, sera posivle, si es ke lo es, de avlar sovre alguna unika kultura, una eredad o tradision mutual?
Ben Gurion le respondio:
– “Mira, senyor Sekretario de Estado. Antes 200 anyos partyo el vapor Mayflower desde Ingletierra, yevando a los primeros pelegrinos los kual se instalaron en el pais, konosido oy komo un imperio demokratiko, yamado Estados Unidos de America.
Por favor, senyor, sal afuera de tu buro, i demanda por la kaye algunos diez ninios
nort-amerikanos:
*Kien fue el kapitan de el vapor?
*Kuanto tiempo turo el viaje?
*Ke kumieron los pasajeros durante el viaje?
*Komo se “komporto” la mar?
Me parese, disho Ben-Gurion, ke no resiviras repuestas presizas. Verdad?
Alora, mira, senyor Sekretario del Estado:
Antes mas de 3300 anyos, salieron los ijos de Yisrael de Ejipto.
Te rogo, en kualker de tus viajes en el mundo, trata de enkontrarte kon diez ninios judios de varyos paizes. Demandales:
*Kien fue el lider en akea salidura de Ayifto?
*De kien fue ke obtuvo akel lider esta mision?
*Kual fue el propozito del viaje?
*Kuanto tiempo turo el viaje?
*Ke es lo ke kumieron los ijos de Yisrael durante el viaje, i ke paso kon la mar?
* * *
Esto es lo ke mos manda la Tora (Shemot 13, 8):
“I le kontaras a tu ijo en akel dia!”
Moed alegre i bueno !
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
