eSefarad Noticias del Mundo Sefaradi
Ver todos los artículos de esta sección
Ken eskrivyo la tefila por el Estado de Israel?
Yehuda Hatsvi
Sigiendo el mesaje de Rachel Ken eskrivyo la tefila por el Estado de Israel?
La tefila por la paz del Estado de Israel fue kopozada por el gran rabino ashkenazi, Itzhak Herzog (i, al pareser, despues de konsultarse kon Rabi Ben-Zion Hai Uziel, el gran rabino sefaradi).
Segun una nota guadrada en la Biblioteka Nasionala en Yerushalayim, Rabi Itzhak Herzog eskrivyo en el anyo 5708 (1948) al eskritor S.Y. Agnon, demandandole “ke eche un ojo” al teksto por redaktar el estilo de la tefila.
Es posivle, ke Agnon fue el ke propozo las palavras del primer pasuk:
“Muestro padre ke en los sielos,
la penya de Yisrael, i su regmidor,
bendize al Estado de Israel,
el presipyo de muestra rehmision”.
Orasiones por el bienestar del paiz, o de los governantes i reyes, se uzavan por los judios ayinda en tiempos mas antiguos.
Arkeologos deskurieron en la kueva de Kumran, (serka de Yam aMelah), un pedaso de megila kon una orasion al onor del rey judio Alexander Yanai, antes algunos 2120 anyos.
En Pirke Avot (3,2) topamos la rekomendansa de Ribi Hananya:
“Azer orasion por la pas de el reyno, ke si no fuese su temor,
kada uno a su kompanieros se englutieran”.
En partikolar en la Galut (Diaspora), fueron imprimidas orasiones, en los siddurim i mahzorim (en livros de tefila), por la paz de los reyes en los paizes ande bivian los judios.
Estas tefilot, adresadas al Dio, empesan kon las palavras:
הנותן תשועה למלכים וממשלה לנסיכים
“El ke da salvasion a los reyes i da poder a los princhipes”…
En la kehila de mi chikez, se deziya solamente en Dia de Kippur (en favor de George VI, el rey de Gran Bretania), ma kada komunidad, sea en Erets Yisrael o en la Diaspora, teniya sus propios i diferentes uzos.
A propo, el eskritor S.Y. Agnon, en resiviendo el Premio Nobel en 1966, disho aya una tefila al onor del rey de Suesia, Gustaf VI Adolf.
I un otro apropo:
Antes muchos anyos, yo avia eskuchado una gravasion del kantador Hayim Efendi, kantando (en 1920 ?) esta tefila.
Ay alguno de vozotros, amigos, ke tiene kon el akea gravasion?
Yehuda Hatsvi
Israel
Fuente: Ladinokomunita
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunita.
