eSefarad Noticias del Mundo Sefaradi
Ver todos los artículos de esta sección
En meldando la Megila de Ester
Yehuda Hatsvi
Uno de los famozos komentadores de la Biblia (inkluye, naturalmente, la Megila de Ester), fue el rabino Meir Leibush, nasido en Ukraina (1809-1879), konosido komo aMalb’im.
El es renomado por su estilo espesial de komentario, trayendo entre sus perushim mas sitasiones del Midrash i de las lejendas de muestros Hahamim.
Personalmente, tengo simpatia i un sentimiento de piadad sovre este komentador, ke paso su vida errando entre sivdades i paizes, luchando por parnasa.
*
El Malbi”m me aze akodrar siempre de otro komentador importante de la Biblia: Rabi Avraam Ibn Ezra (1092-1167), nasido “sin estrea” en Tudela, Espania, errando de pais a pais.
Al pareser, su ultima estasion fue en Ingletierra, ke ayi muryo prove i ani.
*
En su lavor sovre la Megila de Ester, eskrivio el Malbim un prefasio largo.
Aki vos do un rezumen de tala akdama.
Los evenimientos kontados en la Megila de Ester, okuryeron en la diaspora, despues de la destruksion del primer Bet -Mikdash.
Esto fue en akeyos 70 anyos de estansia de los judios en el exilo, antes ke se adjuntaron (kon la Deklarasion del rey Koresh), para retornar a Erets Yisrael, i fraguar el segundo Bet Mikdash.
Mordehay, el primo (ijo del tio) de Ester, fue tambien uno de los ekspulsados, i es posivle ke tuvo el zehut de abandonar a Persia (despues de toda la drama relatada en la Megila) i retornar a Yerushalayim.
Para entender mijor los eventos de la Megila, ay de aklarar ke en akeos tiempos avian dos tipos de reynados:
el uno kuando la djente, el puevlo, elije al rey;
la otra situasion es kuando el rey tomava el poder por la fuersa.
En el tiempo ke antes del reynado de Ahashverosh, fue Babiloia la ke dominava kaje todo el mundo antiguo.
Ahashverosh fue una persona muy rika ke reinava solamente sovre Persia i Maday, i despues kontinuo a konkistar otros mas paises.
Para asegurar i enforteser su reynado, el tomo por mujer a Vashti, ke era “eredera al trono” de Babilonia.
Desde su kazamiento kon Vashti, empesa muestra Megila, kon su primera fraza:
“I akontesyo en los dias de Ahashverosh, akel Ahashverosh ke enreyno desde India asta Kush, sien i vente i siete provinsias”.
Aki se termina el rezume del prefasio del Malbim.
Un dia de Purim, en mi chikes, oyi una ekspresion de boka de mi madre:
«Shushan, (la kapitala de Persia la antigua), es la sivdad del gameo.
E, al gameo kualo lo vites derecho?”
1. La reina Vashti izo un kombido de mujeres, i refuzo a venir a la demanda del rey Ahashverosh “para mostrar a los puevlos i a los prinsipes su ermozura; porke era buena de vista”.
El rey se ensanyo mucho, i yamo el rey a los savios (porke ansi era la uzansa del rey delante de todos los ke savian ley
i djuisio). I los mas serkanos eran los siete prinsipes de Persia i Maday…
ke azer a la reina Vashti, por lo ke no izo el mandado del rey”.
Mos demandamos:
Por algun konflikto konyugal se invita a todos los savios del reino?
2. Haman el malo, kon su ravya sovre Mordehay el judio,
“bushko a destruir a todos los judios ke avia en todo el reino de Ahashverosh.
I disho Haman al rey Ahashverosh:
Ay un puevlo esparzido i espartido
entre todas las provinsias de tu reino, i sus leyes son diferentes de todo puevlo, i no azen las leyes del rey;…si plaze al rey, sea eskrito por deperderlos”.
En esto el rey ni ke demando kien es este puevlo. El rey ni ke penso a formaralgun komite de investigasion….
El desidio sin ningun konsejo de los savios del reino, o de los siete prinsipes.
El rey le disho a Haman: “El puevlo, para azer en el komo plaze a tus ojos”.
Ansi fue eskrito i siyado el dekreto kruel kontra el puevlo judio, segun todo lo ke enkomendo Haman el malo.
Komo se atrevo el rey azer un djenosidio i matar milaryas de djente bazandose
solamente a la palavra de Haman?
Ke reino tuerto!!
“Mijor es un ninio povre i savio, ke un rey viejo i nesio, ke no puede ser mas akavidado”
(Kohelet 4, 13).
3. Kuando se troko el mazal para bueno, la reina Ester reusho en su mision a salvar a su puevlo, i el rey kito su aniyo ke avia tomado de Haman, i lo dyo a Mordehay.
Ma, segun las leyes tuertas de Persia, el rey no tuvo la autoridad a kumplir la rogativa de Ester:
“para azer anular las kartas del pensamiento de Haman”.
Ke verguensa!
El rey grande i poderozo no pudo arazgar el dekreto de jenosidio, eskrito i siyado por su propia mano!
Al gameo, gameo de dos korkovas, kualo vites derecho?!
Purim alegre i feliz!
Yehuda Hatsvi
Israel
En esta seksion, muestro kerido amigo Yehuda Hatsvi un estudiozo de la tradision, del penamiento djudio i de la Ley, va a partajar kon todos mozotros sovre variados temas desde su punto de vista djudio i sefaradí. Yehuda es aresivido en Ekonomia de la Universita de Tel Aviv, puvliko un libro de istorias folklorikas sefaradíes para ninyos, sus artikolos i konsejas aparesen en munchas puvlikasiones komo por eksemplo Aki Yerushalayim i El Amaneser, i es uno de los moderadores de Ladinokomunit.
